Luuka 23 - UTESITAMENTI UMPYA

¹ Pwu vakasisimuka voni umwuvavelye vakangega kwa Pilate.

² Kwu vakatengula ukumbulila vakata: Umunu uju tuvwene ikilivula ikivumbuko iki kyoni, ikuvabetsa ita ndasangulaga amasango kwa Kesali. Ita nene Kilisiti, nene nkuludeva.

³ Umwene UPilate akambutsa akata: Uli nkuludeva va va-Juta? Umwene akanda akata: Nduvwuvwitsova.

⁴ Pwu UPilate akavavula avateketsi avavaha navanu voni akata: Uńe umunu uju nandikujivona ijyinge inongwa.

⁵ Avene vwuvakamwumilitsa sitso vakata: Ikuvahambulanya avanu upwu itsova inongwa tsa mwene mwoni mu-Jutai. Mańa atengwe mu-Galilai asike umu.

⁶ Umwene UPilate vwu apulike vwu vita Galilai pwu akavavutsa: O, humbe va mu-Galilai umunu uju?

⁷ Vwu vambulile ukuta ahumile nkilunga kya Heloti pwu akata: Mbihage nave kwa Heloti. Mańa namwene agonaga mu-Jelusalemu mmatsuva aga.

⁸ Umwene UHeloti vwu ambwene UJesu pwu akahekela sitso. Mańa alondile ukummańa kakatale ulwakuva apulike ńongosu itsu vantsovaga avanu nukuhuvila ahuvilaga ukuta pange ikumelelaga akange aka kudega.

⁹ Akambutsa amameńu mongosu sitso mańa umwene nakamwanda kinu.

¹⁰ Navene avateketsi avavaha navamańakalata vakava baho vakambulila sitso.

¹¹ Mańa UHeloti navasikali va mwene vakamelula vakameka. Pwu vakanswika unsabwa ugwaṅalikaga uvuvalasu, vakambutsa kwa Pilate.

¹² Pwu nu-Pilate nu-Heloti vakamańana ilitsuva ili. Mańa vale ngoso sikutsoni ukusika palitsuva ili.

¹³ Pwu UPilate akavalundamanya avateketsi avavaha navavaha navanu vuvule.

¹⁴ Akavavula akata: Lola mungegye umunu uju mukata ikuvapilusa avanu. Lola ndimigile vwu pwunde, mańa nanditsivweni inongwa itsu mukumbulila umunu uju.

¹⁵ Namwene nu-Heloti ibela mańa ambutsitse. Pwu ndita natulili itsinge itsa kumbudila.

¹⁶ Pwu ndita ndikuntovaga pwu ndikumbopolaga.

¹⁷ (Lino pwulwale ulwiho lwa kuvavopolela mpamato umunu sikutsoni palitsuva ilivalatse.)

¹⁸ Avene pwu vakilanga paninye voni umwu vavelye vakata: Umbuse uju utuvopolele UBalaba.

¹⁹ Umwene ale nńumba jya vańololo akilivuṅinye mbutsenge abudile numunu.

²⁰ Umwene UPilate akavuja akatsova navo ulwakuva atetsaga ndimbopole UJesu.

²¹ Avene pwu vakilanga vakata: Vi untovelelage pakidamiṅanye, Vi untovelelage pakidamiṅanye.

²² Umwene akavuja ulwa datu akata: Vi avombile imbivi ńiki uju? Mańa nandijivweni inongwa ijyinge jya kumbudila.

²³ Pwu avene vakangatatsa ukwilanga sitso, vakamwumilitsa vakata: Untovelelage pakidamiṅanye. Pwu umpwato gwavene gukandema.

²⁴ Pwu UPilate akahiga ilyakuta: E twidikage itsuvasumbilwe.

²⁵ Pwu akavavopolela uvivandovaga, uvi adindilwe nńumba jya vańololo ulwakuva akilivuṅinye mbutsenge ulwakuva abudile numunu. Umwene UJesu akavapa ukuta abudwagwe nduvwuvatsovaga avene.

²⁶ Pwu vwu vikungega UJesu vwu vibiha nave pwu vakamwibata ujyunge umunu USimoni va mu-Kilene, uvi ahumile kukilimila kya mwene. Vi vakantwika ikidamiṅanye vakata ampimbile ankonge nakyo UJesu.

²⁷ Vakankonga avanu ikipuga ikyongosu navadala vwu vakankutila vakandilila nulwihotsi.

²⁸ Umwene UJesu akavakilivukila akata: Ńi vahinza va mu-Jelusalemu, kwu bako ukundilila ulwihotsi une, mwilililage ńivene, mbalililage navana vińo.

²⁹ Lola likwitsa ilitsuva pwu valatetsaga: Vandugataluko avagumba navamihana igyunagiholili navamavele ugwu nagositsi avańa.

³⁰ Ilitsuva ili pwu valatengulaga ukutsova kusidugala valatetsaga: Mutugwilage nakuńika mutusilage.

³¹ Mańa vangave vwu vigaha vuvule-vule numbiki umwigu, pwu valagaha ndeti numwumu?

³² Vakavagega luninye nave avange avanu vavili avatulanongwa avakubudwa luninye nave.

³³ Vwu vatsisike upwu vita pwu paliṅalalyantwe, pwu vakavatovelela pasidamiṅanye sya vene namwene navatulanongwa, ujyunge vakambika kukivoko kya mwene ikyandyo, ujyunge kukivoko kya mwene ikyaṅigi, umwene akava pagati.

³⁴ Pwu umwene UJesu akata: Vi dada uvasyikilage, mańa navimańili itsu vivomba. Pwu vakalagulila pakugavańa imisabwa gya mwene.

³⁵ Avene avanu vakava baha navene vakalola. Navene avavaha vakameka vakata: Avange avapokaga sikutsoni alinakiki ukwipoka mwene lino, humbe vi Kilisiti jilweli, humbe vi Mmalwa va Nguluve.

³⁶ Navene navasikali vakamelula vakagega nuvugimbi vwa asiki vakata tunnwese.

³⁷ Vakata: Ungave vi nkuludeva va va-Juta jilweli, pwu vwipoke vimwene.

³⁸ Lino pwuvwale nuvwene nuvuvige pakyańa uvwakuta: UJU NKULUDEVA VA VA-JUTA.

³⁹ Lola avatulanongwa avatovelilwe ujyunge akammelula namwene akata: Ungave veve Kilisiti jilweli pwu vwipoke uve, pwu utupoke nuvwe.

⁴⁰ Akamwanda ujyunge unnine akantanila akata: Nuve nda navukundwada Unguluve nupwu ndiṅanile vuvule ukuvungwa?

⁴¹ Uvwe tuli viki vwevwe tunogye, mańa tukwupilila isihwanine nimbombo itsu twavombile, uju lweli vi navombili itsinge imbivi.

⁴² Pwu akatsova kwa Jesu akata: Vi Jesu vwitse ukaṅumbuhitsage vwu vukwingila ndudeva lwako.

⁴³ Umwene akanda akata: Jilweli-lweli ndikukuvula ndita: Tutsiva twivoni mbutsuka vwa vannonu ilelo iji.

⁴⁴ Pwu jikatengula pakavalilo ka ntanato (vwu lili pantwe), pwu iṅisi jikagwa nkilunga kyoni jikatsisika pakavalilo ka budikakupamato (vwu litembile).

⁴⁵ Nalyene ilitsuva likabosola, nagwene unsabwa ugwadindile kuńumba imbalatse gukalenduka pagati napagati.

⁴⁶ Pwu UJesu akakuta ilimeńu ilivaha akata: Vi dada untima gwango ndivika mmavoko gako! Lola vwu atsovile ili pwu akatsilika.

⁴⁷ Umwene undongotsi va vasikali vwu atsivwene tsoni tsitsitsi pwu akanginya Unguluve akata: Lweli ngolosu umunu uju.

⁴⁸ Navanu voni avalundamine baho pakulola, vwu vatsivwene tsitsitsi, pwu vakitova pakipambaga vakakilivuka ukubiha kuvutsenge.

⁴⁹ Navene navamańani vamwene voni vimile pavutale, navadala avankongaga ukuhuma mu-Galilai voni vakalola.

⁵⁰ Pwu vakakeńemuka itsile ujyunge umunu, uvi ilitavwa lya mwene ale vi Josepu uńivaha umunu unnonu ungolosu.

⁵¹ Umwene nidike itsu vidinine nitsu vavombile. Ahumile mu-Alimatya mbutsenge uvunge vwa va-Juta.

⁵² Vi akabiha kwa Pilate akatsidova ummana gwa Jesu.

⁵³ Pwu akagutumbula pakidamiṅanye akagubinila munsabwa ummbalasu, akatsikuguvika mbuguli uvwu vapunzile ndunalavwe, uvwu navambikili lusiku mumwa ujyunge umunu.

⁵⁴ Tsu vakavomba palitsuva lya kwinotsa vwu liva pakutengula ilya sabati.

⁵⁵ Avene avadala avankongaga ukuhuma mu-Galilai vakankonga UJosepu vakatsilola nuvuguli nummana gwa mwene ukuguvika.

⁵⁶ Pwu vakabiha kuvutsenge vakatsigaha nimituguva nimono inalamu. Mańa pasabati pwu vakagataluka vuvule nduvwu tsilagye indagilo.