Luuka 22 - UTESITAMENTI UMPYA

¹ Lola ilitsuva ilivalatse lya sivanda isitsilansabe ilyuvita vi Pasa ilitavwa, lyahegelye.

² Avene avateketsi avavaha nava mańakalata vakatsovana itsa kumbuda vakata: Tugahage ndeti nave? Ulwakuva vavadwadaga avanu.

³ Mańa USetano vi ingye mwa Juta uvi vampye ilya Va-mu-Kalyoti uvi ale va kitsigo navavili.

⁴ Vi akabiha kuvateketsi avavaha nakuvalolela-Tempeli, akatsitsova navo itsa kuvapa UJesu.

⁵ Pwu avene vakahekela vakata: Tukukuhombaga indalama.

⁶ Pwu umwene akidika. Pwu akalonda pavunnonu pakuvapa pavutsilavanu vongosu.

⁷ Pwu ilitsuva lya sivanda isitsilansabe likitsa ilya kuhinzila nakakolo ka Pasa.

⁸ Pwu UJesu akavasuṅa va-Petele nu-Johani akata: Mbihage nkagahage akakolo ka Pasa tukalitsage.

⁹ Avene vakata: Vwita tugahe ndaku?

¹⁰ Umwene akavavula akata: Lola ngave musike mbutsenge mulya, pwu mulaganila numunu uvi itwikile ninzilo jya magasi. Vi nkankongage nkingilage nave nńumba umwu ikwingila.

¹¹ Mwu nkatsove nave umweneńumba nkatetsage: Ummańisi atye: Nkambutsage nkatetsage: Ińumba jya kulilamwo akakolo ka Pasa nuńe navakongi vango jyu jiliku?

¹² Pwu ndavonaga umwene ikuvavonya ińumba imbaha ijyu vatandike nisitamilo. Mwu nkagahage mumwa akakolo.

¹³ Pwu vakavuka vakatsivona nduvwuavavulile. Pwu vakagaha akakolo ka Pasa.

¹⁴ Mańa vwu pasike pakavalilo ka kulila, pwu akatama pakulya navapositili.

¹⁵ Pwu akavavula akata: Ndasukilwe jilweli sitso ukuta tulitsage twivoni UPasa uju nune nuńe vwu tango ndikanale ukukuvilwa.

¹⁶ Mańa ndikuvavula ndita: Ndihumaga ilelo iji nandilavuje ukulya UPasa uju ndilatsisikaga upwu ndinditsage unduti kuludeva lwa Nguluve.

¹⁷ Pwu akatola ikinwelo akasana akata: Koti ikinwelo iki mugavanage.

¹⁸ Mańa ndikuvavula ndita ndihumaga ilelo iji nandilavuje ukuńwa uvwa seke tsa masilu uvu, ndilatsisika upwu lwitsage uludeva lwa Nguluve.

¹⁹ Pwu akatola ikivanda akasana akameńulanya akavapa akata: Ugu gwu mmańa gwango ugwiva pakuvaswila uńe. Vwu nkagahage vuvule-vule sikutsoni kavetsage ka kuṅumbuhitsa uńe.

²⁰ Nakyene ikinwelo vuvule-vule vwu valye isya kwigoneka, pwu nakyene akatola akata: Ikinwelo iki lwu lwidiṅano ulupya ulwa munkisa gwango uguvadudikye uńe.

²¹ Lola ikivoko kya uvi ikuńendama kyu kili nuńe baha pakisanza kya kulilapwo.

²² Umwene Uńamunu vi viki, vi ibiha vuvule nduvwu tsisimilitsivwe ṅani, Lweli uli viki vi munu vi vukumendama!

²³ Pwu avene vakavutsanya vakata: Vi veni uvi ipela tsitsitsi?

²⁴ Pwu vakakaniṅana ulukani umwu vavelye ulwakuta: Ino veni uvi iva vi mbaha twivoni umwutuvelye?

²⁵ Umwene akavavula akata: Navakuludeva va vapanzi vikuvalesehetsa ulwa vutwa avanu va vene, navavibite amaka avanu va vene vwu vikuvapa ilya Ndekedeke.

²⁶ Uńe lweli vwu ndagahaga vuvule-vule. Bako uńe uvi ita ndive mbaha kuvajyango, vi upita ipelage ukuva vi ndebe kuvoni, umwene uvi ita ndive vakuvalongola mbulongolo mbajyango, vi upita ipelage ukuva vakuvavombela ńi vanine.

²⁷ Uvi atamile pakulya nuvi ikungegela isinu mbaha vi aliku? Ndita mbaha uvi atamile pakulya. Une Upwu ndikina nuńe ndipelile ukuva va kuvavombela uńe.

²⁸ Uńe lweli ńi twavetsaga twivoni nune sikutsoni vwu ndigelivwa.

²⁹ Pwu nune ndikavalekela uludeva nuńe nduvwu nune udada andekye uludeva,

³⁰ nuńe ukuta tulitsage twivoni nuńe isinu tuńwetsage twivoni vwu nditsile ukwipela ukuva nkuludeva, nuńe ukuta ntamage pasitamilo sya vutwa muhigage isivumbuko syoni kitsigo nasivili sya vańa-Isilaeli.

³¹ Pwu unkuludeva akata: Vi Simoni, Simoni lola USetano avadovile uńe atye ndikavapetage nduvwu umunu ipeta ingano.

³² Mańa ndikudovye ulwidiko lwako ukuta lulasilaga. Nuve lungave lusiku ungave uvujile ukilivwike, pwu uvadulusage avanino.

³³ Umwene UPetele akata: Nkuludeva ndiliṅanihitse ṅani nditye vangave vikukudindila nńumba jya vańololo, vangave vikukubuda, pwu tuve twivoni nune.

³⁴ Umwene akanda akata: Ukwa ndikuvule vi Petele, ilelo iji vwu inongove jikanale ukuvika vwu vwibelile kadatu kwane vwu utye nummańili une.

³⁵ Pwu akavavutsa akata: Upwu ndivasuṅage inzila, upwu nditetsage kwu bako ukuva nakapako ka ndalama, kwu bako nakasaka ka mbopo, kwu bako nisikato ukuva nasyo, pwu nda mwalemilwe isinge? Avene vakata: Bako nakinu.

³⁶ Pwu akavavula akata: Lino uvi ali nakapako ka ndalama pwu akolelage natwene nutusaka twa mbopo vuvule-vule. Lola uvi nali nakinu vi agutsage ugwańingilitsa gwa mwene alondelage ulwuvo.

³⁷ Mańa ndikuvavula ndita: Lisigye tango ukwitsa ilimeńu ilikunzova uńe mwa kalata ilita: Vammanzitse navagalo. Mańa goni amameńu agikunzova une, gwu gikwitsa gisila.

³⁸ Avene vakata: Nkuludeva, lola tulinatso ińuvo ivili. Pwu umwene akata: Vuvule.

³⁹ Pwu akahuma panzi akabiha kukidugala kya mono nduvwu agahaga sikutsoni. Navakongi va mwene vakankonga.

⁴⁰ Lino vwu avye atsisike pwu akavavula akata: Mwisajage ulugelo ukuta lulavagwilaga.

⁴¹ Umwene akidatula kuvene akabiha akavona umwu kavelye akapindo ka kulahila akaganga. Pwu akasugama pasi akisaja

⁴² akata: Vi dada ungave vwidikaga uve ukuta ikinwelo iki kilutage pane! Mańa nene viki itsu ndinogilwe uńe, ńage jyuve tsitsu ungave unogilwe uve.

⁴³ Pwu akambonekela unsuṅwa va kukyańa akandulusa amaka.

⁴⁴ Lino vwu inumbula jili nkyańa vuvule uludwado, pwu akijumilitsa sitso nukwisaja. Pwu inugutila jya mwene jikava nduluholosolelo lwa nkisa vwu jigwa pasi.

⁴⁵ Pwu akasisimuka umwuisajaga akabiha upwu vale avakongi va mwene akatsivona vagonile itulu jya lususuvalo.

⁴⁶ Akatsova navo akata: Pwu mwigona kiki itulu lino? Musisimukage mwisajage ulugelo ukuta lulavitsilaga.

⁴⁷ Pwu vwu alipakutsova amameńu aga pwu akakeńemuka, avanu ikipuga vuvule nu-Juta uva kitsigo navavili alongwe mbulongolo ihegelela kwa Jesu ita nukuntsiba kundomo.

⁴⁸ Umwene UJesu pwu akata: Vi Juta lwu lutsibo lwa vumańane ulwu utye lwu vikummańilaga Uńamunu uvwu uvapye.

⁴⁹ Avene avale nave UJesu vwu vatsivwene umwu tsilotsitse, pwu vakambutsa vakata: Nkuludeva nda tuvahome pange nulwuvo?

⁵⁰ Pwu ujyunge unjyavo akantema unkivaga va nteketsi umbaha akampyatula imbulukutu jya kukivoko ikyandyo.

⁵¹ Pwu UJesu akanda akata: Leka vuvule. Pwu akamwabasa imbulukuta pwu jikavuja jikamela.

⁵² Pwu UJesu akatsova navo avateketsi avavaha navalolela-Tempeli navańivaha avenekivumbuko voni avamwitsye akata: Upwumwitsile kukuńibata une pwu mutye tutsikumwibataga ummitsi mukolye nińuvo nisonzo.

⁵³ Sikutsoni upwu tukinige twivoni mwa Tempeli pwu namuńibiti kiki? Mańa lino kwu kavalilo kińo aka, gwu maka ga muṅisi aga.

⁵⁴ Pwu vakamwibata vakangega vakatsikwingila nave nńumba jya nteketsi umbaha. Umwene UPetele akankonga pavutale.

⁵⁵ Pwu vakakotsa umwoto nduvanza ngati pakutama pakwota umwoto. Namwene UPetele akatama navo pakwota umwoto.

⁵⁶ Pwu ujyunge umunu va vene undala akambona vwu atamile mundulangalilo lwa mwoto, akandungamila pakundola akata: Namwene uju avetsaga numunu ulya.

⁵⁷ Umwene UPetele akibela kumwene akata: Vi ndala mańa nandimmańili lusiku.

⁵⁸ Vwuvakinile padebe pwu akitsa ujyunge umunu akata: Nuve vwu vanino valya. Umwene UPetele akabela akata: Lugosi bako.

⁵⁹ Lino vwu palutile pakavalilo kapamato pwu akima pakuńwilitsa ujyunge akata: Jilweli namwene avetsaga nave ulya. Mańa va mu-Galilai.

⁶⁰ Umwene UPetele akabela akata: Lugosi nanditsimańili itsu vwitsova. Pwu ṅani-ṅani vwu ali pakutsova vuvule-vule pwu ing'ongove jikavika.

⁶¹ Pwu unkuludeva akakilivuka akandola UPetele. Pwu UPetele akakumbuhitsa ilimeńu ilyu unkuludeva ambulile ilyu atye: Vwu niṅongove jikanale ukuvika vwu vwibelile kadatu kwane vwu utye nandimmańili.

⁶² Pwu akahuma panzi akatsilila ulwihotsi uludindila nakunsingo.

⁶³ Avene avanu avamwibite UJesu vwu vakankinila vuvule vakantova.

⁶⁴ Vakangubikila kumiho, vwu vakangubikye vambutsage vatetsage: Ukwu ulagage lino veni uviakutovile?

⁶⁵ Vakanduka nitsinge itsa madusi ńongosu vuvule.

⁶⁶ Vavwene vwuvukye pavusiku pwu vakalundamana avańivaha avenekivumbuku navateketsi avavaha navamańakalata vakangega kululundamano lwa vahiganongwa.

⁶⁷ Pwu vakata: Ungave veve vi Kilisiti pwu utuvulage. Umwene akanda: Apene ndingave ndatetsaga ndivavule pwu namukwidika.

⁶⁸ Ndingave ndatetsaga ndivavutse itsinge pwu namukuńanda.

⁶⁹ Itengulaga lino Uńamunu itamaga kukivoko ikyandyo kya Nguluve Unńamaka.

⁷⁰ Pwu voni vakambutsa vakata: Pange uli nswambe va Nguluve? Pwu umwene akata: Nduvwu mwitsova, vi juńe.

⁷¹ Pwu avene vakavulana vakata: Pwu twatetsaga tutsilondage tsiki itsinge itsa kumigila vwu twivoni tupulike itsu itsova mundomo.