Luuka 21 - UTESITAMENTI UMPYA

¹ Pwu UJesu akinamuka akavalola avamosu vwu vilaha isyu vagegile nkihava kya kulaha isya kulaha.

² Akambona nundala ujyunge unswile ungatsu vwu namwene ilaha mumwa utusenti tuvili.

³ Pwu akavavula avakongi va mwene akata: Jilweli ndikuvavula ndita: Undala unswile ungatsu uju avalutile voni ukulaha.

⁴ Mańa voni ava upwu vilaha isya kulaha kwa Nguluve, pwu vitola vwu vavwene sidigile, umwene uju mbugatsu vwa mwene alahile isyu ali nasyo isya munzala.

⁵ Pwu avange vakadega vakata: Udege ińumba jya Tempeli vanotsitse namaganga amannonu nutunu twa kuvalatsa! Pwu umwene akavavula akata:

⁶ Tsoni itsu mwilola lino,–likwitsa ilitsuva pwu nalilalekwe iliganga ilinge palinine ilyu nalilamamulwe.

⁷ Pwu vakambutsa avene vakata: Vi mańisi tsu tsikwitsa ndali tsitsitsi? Nikimańilo kyu kiliku ikya kumańilapwo ukuta pwu tsiva pakwitsa tsitsitsi?

⁸ Umwene akata: Mbandikage mulole ujyunge alavatekaga. Mańa valitsa va vongosu valagendela mwitavwa lyango valata: Nene. Valata umwaka gwitsile. Vwu ndavakongaga.

⁹ Lungave lusiku ngave mupulika niligoha nuvuhambuke avanu pwu ndakeńemukaga, Mańa tsu upita tsilongolage ukuvoneka tsitsitsi, mańa itsene itsa kuvusililo vwu tsikanale tango.

¹⁰ Pwu akavavula akata: Nikivumbuko ikinge kya vanu kilakihambukila ikivumbuko ikinine nunkuludeva va kilunga ikinge alamambukila unkuludeva unine uva kilunga ikinge.

¹¹ Nikilunga kilalindima pongosu nsilunga nsilunga. Ninzala jilagwa ńongosu tsilava ninduve. Kukyańa silavoneka isipelwa isipelaludwado nisidego isivaha.

¹² Vwu tsikanale tsoni tsitsitsi pwu valavibata uńe valavaswima valavagega nanńumba tsa vene tsa kwisajilamwo nanńumba tsa vańololo, valavalusila nakuvakuludeva nakuvalolelasilunga ulwakuva ndi nilitavwa lyango.

¹³ Tsu tsikuvitsila tsitsitsi ukuta tsive tsa kumańilamwo uńe.

¹⁴ Mwidulusage munumbula tsińo mutetsage pwu natulisagile ṅani itsa kwitsovela.

¹⁵ Mańa pwu ndilavapa namameńu mundomo nuluhala ulwu voni avikuvamena lulavalema nukuvanda nukuvalema uńe.

¹⁶ Valavalusa navahotsi vińo navamyavińo navalukololwińo navajińo, Avange uńe ndabudwa.

¹⁷ Voni vakavasula ulwakuva ndi nilitavwa lyango.

¹⁸ Mańa nulunge ulujwili lwa pantwe gwińo nalulavejangike.

¹⁹ Uvwumi uńe ndakavila mbusindamasu uvwu ngave mukijumilitsa.

²⁰ Lungave lusiku ngave mbwene isipuga sya ligoha sivunyengelye uvutsenge mu-Jelulsalemu, pwu mumańage vwiva pakupalaṅanivwa,

²¹ Pwu vakańilage nsidugala voni avali mu-Jutai navali mbutsenge mu-Jelusalemu vahame vabihe mbunge navali nkilunga kya mumbale valitsaga ukwingila mu-Jelusalemu.

²² Mańa gwu matsuva ga luvujitso gago, pwu tsilitsa tsilasila tsoni itsivigilwe mwa kalata.

²³ Muli viki ńi vadala ńi vańimali ńi mukwosa avańa mmatsuva aga! Mańa valakuvilwa sitso avankilunga kyoni, lulava lu luvipo lwene ulwa kukivipila ikivumbuko kya vanu ava.

²⁴ Valagwa uvwuge vwa lwuvo. Valavakunga vavalusilage nsilunga syoni sya vapanzi. Uvutsenge vwa mu-Jelulsalemu valakada namalunde avapanzi sikutsoni vuvule ukutsisika upwu gilasila imyaka gya vapanzi.

²⁵ Pwu silavoneka isya kudega namwitsuva namumwetsi namunondwe. Nkilunga umwu avanu isivumbuko sya vapanzi valańilitsivwa uludwado, valavona kujagile kulekile vuvule vwu najińanza jikwujila amajiga.

²⁶ Avanu valatsilika nuludwado vwu amiho galotsitse ku itsikukitsilaga ikilunga. Ulwakuva navene navamaka ava kukyańa valajunganikaga vuvule.

²⁷ Pwu valambonaga Uńamunu ukwitsila mwivingo vwu ikwitsa namaka nuvudwadwa uvwongosu.

²⁸ Lungave lusiku ngave mbwene tsitengula ukwitsa tsitsitsi, pwu mwitse ndungamile amiho mwinamuke imitwe gińo ulwakuva ukuvangwa kwińo kuhegelye.

²⁹ Pwu akavavula nikihwanihitso akata: Ndolage unkuju nimibiki gyoni.

³⁰ Upwu ngave mwivona gilemba pwu mulolela baho vwu ujyunge navavulili, pwu mumańila baho ukuta iminga jihegelye.

³¹ Vuvule-vule nuńe ngave mutsivwene tsitsitsi ukwitsa, pwu mwitse nkamańilage baho ukuta lwitsile uludeva lwa Nguluve.

³² Jilweli-lweli ndikuvavula ndita: Avanu va lino navalajage voni vwu natsipelilwi tango tsoni tsitsitsi.

³³ Nikya kukyańa nikya pasi ikilunga syu silajagaga, amameńu gango gwu nagalajage lusiku.

³⁴ Mbandikage ndolage inumbula tsińo tsilipelaga nzito nukusyota nukwinegelela nukwisagila isinu sya pakyańa apa, pwu mungavone ilitsuva lilyo livambulinye vuvule ukwitsila vwu mukanale ukwinotsa.

³⁵ Ulwakuva lilavambulanyaga vuvule ukuta kipindo kińalwonzo ukuvitsila voni avanu avatsengile poni pakyańa pakilunga.

³⁶ Mbetsage miho sikutsoni mwisajage nuńe ukuta mwitse nkanogele ukupona tsoni itsiva pakwipela nukwima kumiho ku Ńamunu.

³⁷ Sikutsoni pamuńi akavavula inongwa mwa Tempeli avanu, pakilo pwu akahuma mbutsenge akatsigona pakidugala kya mono.

³⁸ Voni avanu vakalava ukubiha mwa Tempeli vakata tupulikage itsu itsova umwene.