Luuka 20 - UTESITAMENTI UMPYA

¹ Pwu palitsuva ilinge vwu umwene ali pakuvamańisa inongwa avanu mwa Tempeli vwu ali pakuvavula inongwa innonu, pwu vakahegelela kumwene avateketsi avavaha navamańakalata navańivaha avenekivumbuko.

² vakambutsa vakata: Utuvule itsu vuvomba vuvombela mmaka maki? Veni akupye amaka aga?

³ Umwene akanda akata: Leka nuńe ndivavutse ilinge ilimeńu, nuńe lyu mumbulage.

⁴ Ulwa kwotsivwa lwa Johani lwahumile ndaku? Nda lwahumile kukyańa pange kuvanu vuvule, ndeti?

⁵ Pwu avene vakitsova vene vakata, lola tungave twita lwahumile kukyańa, pwu umwene alata: Pwu namumwidiki kiki?

⁶ Mańa tungave twita lwahumile kuvanu vuvule, pwu voni avanu valatuhoma namaganga. Ulwakuva voni avanu vita UJohani ali namalago.

⁷ Pwu vakamwanda vakata: Bako natulumanili ukwulwahumile.

⁸ Pwu namwene UJesu akata: Pwu nuńe nandikuvavuli ukwu gahumile amaka ugwu ndivombela tsitsitsi.

⁹ Pwu akavavula ikihwanihitso avanu akata: Pwale ujyunge umunu, vi akavyala ungunda gwa mwene gwa masilu, akavika navanu va kuvombela mumwa, pwu akabiha kukilunga ikinge mwu akagona.

¹⁰ Vwu gwitsile umwetsi gwa masilu, pwu akansuṅa unkivaga uva kuntolela itsinge iseke tsa masilu kuvene avavombelaga. Avene avavombeli vakantova vakantavula vuvule vwu navampili kinu.

¹¹ Pwu umwene akavuja akansuṅa ujyunge unkivaga. Namwene vakantova avene vakamelula vakantavula vwu navampili kinu,

¹² Umwene akavuja akansuṅa uva datu. Namwene vakantova vakandematsa vakanńalula,

¹³ Pwu umwenengunda gwa masilu akata: Ndigahe ndetilino? Ena ndikunsuṅaga unswambango ungane kwane. Vi pange valandwadaga vwu vambwene.

¹⁴ Mańa avene avambombelaga amasilu vwu vambwene umwene pwu vakavulana vakata: Vi mwenevuhale uju, tumbudage pwu uvwe twiva twivenevuhale.

¹⁵ Pwu vakahuma nave mungunda gwa masilu vakambuda. Alagaha ndeti navo lino umwenengunda gwa masilu avanu ava?

¹⁶ Alavabuda avavombelamasilu ava. Ugwene ungunda gwa masilu alapyanihitsa avange. Vwu vapulike tsitsitsi pwu vakata: Tsu tsilavetsaga.

¹⁷ Umwene akavalola akata: Ndita tswitsitsu tsivigilwe mwimeńu ilita: Iliganga ilyu vagilye avatsengańumba lyu lyipelile ukuva lya kwitotekapwo ińumba jyoni.

¹⁸ Voni avigwa piganga ili, vwu vibatsuka vuvule, uvilingave likungwila, vi likumbatsula.

¹⁹ Avene avateketsi avavaha navamańakalata vakata tumwibate, mańa vakadwada kuvanu. Ulwakuva vakivwene ikihwanihitso iki vakata ikututsova uvwe.

²⁰ Pwu vakantegelela vakansuṅila avatanditsi vakata: Muve nda vagolosu vuvule pwu mumbutsambutse ilimeńu mundomo, pwu tutsikumbika kundolelakilunga, vi amige ankunge.

²¹ Vwu vakambutsa umwene vakata: Vi mańisi tuvwene uli ngolosu vuvule nupwu vwitsova nupwu vukuvavula inongwa avanu, pwu nujyunge umunu navukumalila mbunnonu kumiho, bako vukuvavula voni avanu ija jilweli inzila jya Nguluve.

²² Pwu tukukuvutsa twita: Ndapannonu ukusangula amasango kwa Kesali pange mwiko?

²³ Mańa umwene akavamańa uvugalagala vwa vene

²⁴ akata: Mumbonehetsage ulutalama lwa masango ndilole. Ndeti ikihwani iki kyani? Nuvuvige uvu vavigile vwani? Vakata: Vwa Kesali.

²⁵ Pwu umwene akavavula akata: E mumpetsage UKesali isya pavu-Kesali vwa mwene, namwene Unguluve mumpetsage isya pavu-Nguluve vwa mwene.

²⁶ Pwu vakalemwa itsa kumbutsambutsa ilimeńu mundomo vwu vipulika avanu. Vakadega vuvule ukwanda umwene, vakanunala.

²⁷ Pwu vakahegelela kumwene avange navasatukai avibela vita ukutsuka kwu nujyunge nitsuka lusiku. Navene vakambutsa ilinge vakata:

²⁸ Vi mańisi lola UMose alagye mwa kalata atye: Angave ulukololwe va munu untegulandala angave iswa untsilamwana pwu upita ulukololwe amwingile undala amolelage avańa ulukololwe.

²⁹ Lola pwuvale baha avanamunu lekelakupamato. Pwu umbaha akatola undala akaluta pakuswa untsilamwana vuvule.

³⁰ Pwu akamwingilapwo uva vili undala. Namwene akaluta pakuswa untsila mwana vuvule.

³¹ Pwu akapyanilapwo nuva datu. Vuvule-vule voni vwu lekelakupamato. Voni vakaswa vatsilamwana vuvule.

³² Kumbele kuvoni pwu namwene undala akavakonga ukuswa.

³³ Lungave lusiku vwu vatsukile avanu, pwu alava ndala vani? Mańa voni lekelakupamato vantegwe.

³⁴ Pwu UJesu akanda akata: Avene avagosi navadala va nkilunga iki vwu vita nukutegula vita nukutegulwa.

³⁵ Mańa avene avanogye nukutsisika kukilunga kilya nukutsuka kuvaswe, vwu nukutegula navalategule nukutegulwa navalategulwe.

³⁶ Mańa navalavuje vaswe. Mańa vali ndavasunwa va Nguluve, vana va ju Nguluve ulwakuva vipelile ukuva venekutsuka.

³⁷ Mańa itsene itsa kutsuka avaswe, tsu atsitsovile UMose pavuvalasu mulya ikutuvula itsa pakasitu palya. Mulya ikuntsova untwa ita vi Nguluve va Abulahamu ita vi Nguluve va Isikaka ita vi Nguluve va Jakobu.

³⁸ Umwene Unguluve nda vi Nguluve va vaswe? Bako va vumi. Mańa umwene voni vumi vuvule navaswili.

³⁹ Pwu avange avamańakalata vakamwidikila vakata: Vi mańisi ugolwise utsovile vunnonu.

⁴⁰ Pwu vakadwada ukumbutsa ikinge.

⁴¹ Pwu akavavutsa akata: Lyu vatsovage ndeti ilyu vita: UKilisiti ńa-Ndaviti?

⁴² Pwu umwene UNdaviti mwa kalata va ńimbo ita: Unkuludeva atsovile nkuludeva vango atye: Tama kukivoko kyango ikyandyo

⁴³ ukasike upwu avatavangwa vako ndikuvapelela katamilo ka kuvikapwo amalunde gako uve.

⁴⁴ Lola UNdaviti ikuntsova ukuva vi nkuludeva va mwene, pwu iva mwana va mwene ndeti?

⁴⁵ Pwu akavavula avakongi va mwene vwu vipulika voni avanu akata:

⁴⁶ Mbandikage avamańakalata aviswala igyańingilitsa imitale vwu vitsungutila mbutsenge, avita vatupembetsage avanu nduvanza namuńumba tsa kwisajilamwo vita tutame pasitamilo sya vuvaha, nupwuvibiha pakutama pakulya isinu napene vikihalila papimikivwe avene.

⁴⁷ Vivona valye vuvule nńumba tsa vadala avaswile, pwu viluta pakwisaja ińisajo ińale. Vwu valalutililwagwa ukuvungwa vwu vihigwa.