Luuka 19 - UTESITAMENTI UMPYA

¹ Pwu vakatsisika mu-Jeliko mwu akata ndigendemwo.

² Vwu ali mbutsenge umwu umunu uvi ale vi Sakai ilitavwa, umbaha va vasangutsi uva kyuma kyongosu.

³ Vi akata ndimmańe UJesu umwu avelye. Akalemwa ukumbona ulwakuva avanu vale vongosu ikipuga vuvule, umwene ulwakuva ali nsupi.

⁴ Pwu akańilila mbulongolo akatsitoga munkuju akata mwu ndikandolelage vwu iluta, ulwakuva ambwene ukuta mwu igenda.

⁵ Umwene UJesu vwu asike upwu ale, pwu akalola nkyańa akambona akatsova nave akata: Sakai ikaga ṅani-ṅani, mańa nditye nditame nńumba jyako ilelo iji.

⁶ Pwu umwene akika ṅani-ṅani akahekela sitso ukumwupilila.

⁷ Vwu vambwene pwu voni vakihiva vakata: Lola ikwingila nńumba jya ntulanongwa mwu ilinda.

⁸ Pwu umwene USakai akima pavuvalasu akambula unkuludeva akata: Lola nkuludeva, lino pwu ikyuma kyango kyoni ndigavanya pagati napagati ikinge ndikuvapa avagatsu. Uvi ndingave isya mwene ndilye nuvuteki, vi ndikumomba kani pakipamato-kipamato ikyu ndilye.

⁹ Umwene UJesu akanda akata: Ilelo iji pwu uvupoki vwitsye nńumba iji, mańa numunu uju na-Abulahamu.

¹⁰ Mańa Unńamunu itsile nkulonda avajagile, itsile nkuvapoka.

¹¹ Lino vwu vali pakupulika tsitsitsi pwu akongeletsa ukuvavula nikihwanihitso. Kyu akavavula ulwakuva avwene ahegelye mu-Jelusalemu ulwakuva avwene vikisagila vita uludeva lwa Nguluve lwiva pakuvoneka ṅani-ṅani lino.

¹² Pwu akahwanihitsa akata: Umunu ujyunge uva ndudeva abihaga kukilunga ikya kuvutale kukwupilila uvutwa akata ndilavuja.

¹³ Lino vwu iluta pwu akavilanga avakivaga va mwene kitsigo akavapa indalama kitsigo akata: Tsu mwolosage lino vwu ndilutile.

¹⁴ Avene avanu va mwene nduvanza vansulile, pwu vakasuṅa avakusuṅa mumbele mmwene vakata nkatetsage: Natunogwa uve ukuta uvetsage nkuludeva vitu.

¹⁵ Vwu avwene lino itsile ukwu ale kukwupilila uvutwa vwa mwene pwu akata: Muvilange avakivaga uvwundavapye indalama tsango, ndivamane ukwolosa mpamato-mpamato.

¹⁶ Pwu akahegelela undongotsi akata: Nkuludeva ulutalama lwako lwolwike itsinge indalama inine kitsigo.

¹⁷ Pwu umwene akata: Mwalimi vi nkivaga vi nnonu! Vwale ngolosu pavudebe, pwu lino vuvetsaga navwo uvuńivaha isilunga kitsigo.

¹⁸ Pwu akahegelela uva vili akata: Nkuludeva ulutalama lwako lwolwike itsinge indalama inine ihano.

¹⁹ Namwene akambula akata: Nuve vuvetsaga ńivaha isilunga sihano.

²⁰ Namwene ujyunge unjyavo akahegelela akata: Nkuludeva lola ulu ulutalama lwako ndabinile munsabwa gwa masuke.

²¹ Mańa ndadwadaga kwave ulwakuva uli ntalamu, vutola vuvule isyu nuvikili, vwibena umwu nulahili.

²² Umwene akata: Tsikukulemaga tsitsa mundomo gwako vi nkivaga vi mbivi uve. Humbe vwamańile ukuta ndili munu untalamu, vwamańile nukutola isyu nandivikili nukubena umwu nandilahili?

²³ Pwu vwale nakiki ukuvapa ulutalama lwango avikwolosa? Lino vwu nditsile pwu ndili nditolela paninye nivana.

²⁴ Pwu akavavula avimile baho akata: Ntole ulutalama lwa mwene ulu mumpe uvi ali nindalama kitsigo.

²⁵ Avene vakańaga ṅani-ṅani vakata: Mańa ali natso indalama kitsigo.

²⁶ Umwene akata: Ukwi ndivavule uńe, uvi ali nasyo isinge, vi ikwongeletsivwagwa ukupevwa nisinge, umwene uvi nali nako akange, vi ipokwagwa nakukwa angave ali nako.

²⁷ Avene avatavangwa vango avabelaga ukuva nkuludeva va vene uńe, vwu mbagege kunu mbabude vwu ndilola.

²⁸ Vwu atsovile tsitsitsi pwu akavuka ukubiha ukutoga mu-Jelusalemu.

²⁹ Vavwene vwu vahegelye namu-Betipage namu-Betanija vwu valotsitse kukidugala kya mono, pwu akasuṅa avakongi va mwene vavili

³⁰ akata: Mbihage mbutsenge vulya mulolana navwo. Vwu musike pwu ndavona ilyana lya ligogovwe-vakungile–ilyu ujyunge umunu nitogili lusiku. Lyu nkavopole mungegele kunu.

³¹ Ngave mbwene ujyunge umunu ivutsa ita: Muvopola lyiki? pwu nkatetsage: Mańa unkuludeva ikulilonda.

³² Pwu vakavuka avene uvwu avasuṅile, vakatsivona vwu tsitso atsovile umwene

³³ Vwu vivopola ilyana lya ligodovwe ili, pwu avenenalyo vakavutsa vakata: Muvopola lyiki ilyana lya ligodovwe ili?

³⁴ Avene vakata: Unkuludeva ikulilonda.

³⁵ Vakaligega kwa Jesu. Pwu vakatandika isilundwa sya vene pakyańa palyana lya ligodovwe vakantotsa UJesu.

³⁶ Vavwene vwu igenda, pwu vakatandika isilundwa sya vene munzila.

³⁷ Vwu ahegelye vwu ikile kukidugala kya mono, pwu avakongi va mwene ikipuga kyoni umwu vavelye vakahekela vakanginya Unguluve, vakasitsova syoni isipelwa sya maka isyu vasivwene

³⁸ vakata: Nsajivwa unkuludeva uvi ikwitsila mwitavwa lya ntwa, lwu lunotsehetso lwene kukyańa, lwu lwimiko lwene kwa Nduti.

³⁹ Pwu avange avapalisai avale nkipuga umu vakatsova nave vakata: Vi mmańisi uvatanilage avakongi vako valaswanganyaga.

⁴⁰ Akanda umwene akata: Ukwa ndivavule uńe, vangave vinunala ava, pwu galalulutila amaganga aga.

⁴¹ Lola vwu atsisike vwu ilola uvutsenge pwu akavulilila ulwihotsi

⁴² akata: Nuve ungale utsimańe ilelo iji vwu tango pwile itsa kukupelela ulunotsehetso! Lola lino ndisihile kumiho kwave.

⁴³ Mańa gikukwitsilaga amatsuva ugwu avatavangwa vako valalima uvuguli vwa kukunyenga, valasigilanila vivigilanila kunu nakunu,

⁴⁴ valakuhemula nuve navana vako mwave mumwa, navalalileke ilinge iliganga palinine. Ulwakuva ubelile ukugamańa amatsuva gako ga kulolwa uve.

⁴⁵ Pwu akingila mwa Tempeli, pwu akavinga voni avagegaga isya kugula.

⁴⁶ Akavavula akata: Mańa livigilwe mwa kalata ilita: Ińumba jyango ńumba jya kwisajilamwo. Uńe lola njipelile ukuva mako jya vanambuda.

⁴⁷ Sikutsoni akavavula inongwa mwa Tempeli. Avene avateketsi avavaha navamańakalata navańivaha avenekivumbuko vwu vakata tumbude,

⁴⁸ tsikajaga lweli itsa kuntega ulwakuva voni avanu vambadamaga vapulikaga tsitsu atsovaga.