Luuka 18 - UTESITAMENTI UMPYA

¹ Pwu akavavula ikihwanihitso ukuta umunu upita isajage sikutsoni kitańolomboka.

² Akata: Alemwo ujyunge umiganongwa mbutsenge uvunge uvi nandwadili Unguluve, uvi nali nisoni nakuvanu.

³ Lino ale mbutsenge umwu undala unswile uvi akitsa sikutsoni kumwene akata: Uńigilage inongwa jyango ku uvi ikunzigila sikutsoni.

⁴ Tango umwene akabela ukummigila. Pambele pwu akitsova mwene akata: Upwu nandidwada Unguluve nakuvanu nandili nisoni,

⁵ pwu undala unswile uju ndikummigilaga inongwa tsa mwene ulwakuva ikungatatsa, pambele pwu ukuta alambańilitsaga vwu ikuńumilitsa vuvule.

⁶ Pwu unkuludeva akata: Mudege itsu itsova umiganongwa umbivi uju!

⁷ Umwene Unguluve lino pwu ate abelage ukuvagolohetsa inongwa tsa vene avahalilwe va mwene avikuta kumwene napamuńi napakilo, nda asuvilage ukuvapoka?

⁸ Ukwa ndivavule uńe: Nalahave umwene ukuvagolohetsa inongwa tsavene. Apene mańa pwu angave itsile Unńamunu, ndeti pwu itse aluvonage ulwidiko nkilunga umu?

⁹ Avange lola vakitsova vene vakata tuli vagolosu uvwe, vakavagilila avajyavo, vwu akavavula ikihwanihitso akata:

¹⁰ Ulunge avanu vavili vakatoga vakabiha mwa Tempeli nkwisaja. Ujyunge ali mpalisai, ujyunge ali nsangutsi.

¹¹ Pwu umpalisai akima baho akitsova mwene vwu ikisaja akata: Uve vi Nguluve ndisana kwave ulwakuva nandili ndavange avanu, navahumbi navatekavajyavo navaligu. Namwene unsangutsi uju nandiliṅanili nave.

¹² Nisinu nditsila kavili ijuma mamato. Syoni isyu ndikava, syu ndigava pandevulo (isya kumpa Unguluve).

¹³ Umwene unsangutsi akima kuvutale, akadwada nukulola kukyańa. Bako akitova pakipambaga akata: Vi Nguluve undekepelage ndi ngalo.

¹⁴ Ukwa ndivavule uńe: Uju vi akavuja kuńumba jya mwene ndungolosivwa vuvule inongwa tsa mwene. Umwene unine ulyavi bako. Mańa voni avikijimika vene vwu valisivwa, voni avikijisa vene vwu valatotsivwa.

¹⁵ Pwu vakagega navana kumwene vakata akavabasage mumana. Avene avakongi va mwene vwu vavavwene, pwu vakavatanila

¹⁶ Umwene UJesu vi akavilanga akata: Mbaleke avańa vitse kwane, mukuvabetsa viki? Mańa uludeva lwa Nguluve lwa vene avali vuvule-vule.

¹⁷ Jilweli-lweli ndikuvavula ndita: Uvi uludeva lwa Nguluve nikulwupilila uta mwana, vi nalingilemwo lusiku.

¹⁸ Pwu ujyunge uńivaha akambutsa akata: Vi mańisi vi nnonu ndivombe kiki ikya kwingilila pavuhale vwa vwumi vwa sikutsoni?

¹⁹ Umwene UJesu akata: Vukunzova kiki uvunnonu? Nda kwale ujyunge unnonu? Ndita unnonu ali mpamato vuvule vi Nguluve mwene.

²⁰ Indagilo utsimańile ndita? Nulwita ulaligupaga, nulwita ulabudaga, nulwita ulahitsaga, nulwita ulanwaṅilaga unnino nulwita umwimike udadajo nuvańoko,

²¹ Umwene akata: Tsu nditsikongile tsoni tsitsitsi ndihumile natso mbudebe.

²² Pwu vwu apulike ili UJesu pwu akambula akata: Kwukale akene akasigye uve. Ugutse nikyuma kyako kyoni uvagavanyage avagatsu, vwu pwu ukavile ikyuma kukyańa. Pwu ukitse uṅongage uńe.

²³ Umwene vwu apulike ili, pwu akasusuvala sitso ulwakuva ale mmosu sitso.

²⁴ Umwene UJesu vwu ambwene ukususuvala pwu akata: Kutalamu avańakyuma ukwingila ndudeva lwa Nguluve!

²⁵ Ulwakuva ningamila ukwingila nkiho ka kahonelo nummosu ukwingila ndudeva lwa Nguluve–kwebepe ukugenda ingamila nkiho ka kahonelo.

²⁶ Avene avapulikaga vwu itsova pwu vakata: Pwu veni uvi ipona lino?

²⁷ Umwene akavavula akata: Nitsu tsivalemile vuvule avanu, umwene Unguluve vi natsindemili.

²⁸ Pwu UPetele akata: Lola uvwe tusilekile syoni isitu tukukongile vuvule.

²⁹ Umwene akanda akata: Jilweli-lweli ndikuvavula ndita: Voni avita nińumba vita navadala vita navajyavo vita navahotsi va vene vita navana,–syoni vikusilekela paludeva lwa Nguluve,

³⁰ vwu valatetsaga nisitupile valupilila nkilunga kya pasi umu, valatetsage namumwa mulya nkilunga ikikwitsa valatsikwupilila nuvwumi vwa sikutsoni.

³¹ Pwu umwene akigava navo avakitsigo navavili akavavula akata: Lola twitoga twibiha lino mu-Jelulsalemu, mwu tsilatsisilila tsoni itsivigilwe kuvańamalago pa ndi Ńamunu.

³² Lola valampetsaga avapanzi, vwu valamelulaga valankinilaga valambehelaga namati,

³³ valantovaga nisonzo vita nukumbuda. Palitsuva lya datu pwu alatsukaga umwene.

³⁴ Avene vakalemwa ukutsimańa itsinge, vakavuta vatsivye, pange vapulike itsu atsovaga.

³⁵ Vwu ahegelye mu-Jeliko pwu akaganila numunu umbosu akatama paluvasu panzila akadova isya kudova.

³⁶ Vwu apulike unsindo gwa vanu pwu akavutsa akata: Kyu kiki?

³⁷ Vakambula vakata: Vi Jesu va mu-Nasaleti ilutiṅanya.

³⁸ Pwu umwene akamwilanga akata: Vi Jesu vi ńa-Ndaviti uvetsage nikisa kwane.

³⁹ Pwu avanu avalongwe mbulongolo vakantanila vakata: Nunala. Umwene pwu akongela sitso ukwilanga akata: Vi ńa-Ndaviti uvetsage nikisa kwane.

⁴⁰ Pwu UJesu akima akata: Mungege kunu. Vwu vitsile nave pwu akambutsa akata:

⁴¹ Ndigehe nuve? Umwene akata: Vi nkuludeva ndale ndilolage!

⁴² Pwu UJesu akata: Lolaga, lukuponitse lu lwidiko lwako.

⁴³ Pwu umwene akalola ṅani-ṅani vuvule. Pwu akanginya Unguluve. Voni avanu avalolaga navene vakanginya Unguluve.