Luuka 16 - UTESITAMENTI UMPYA

¹ Pwu akavavula navene avakongi va mwene akata: Alikwo ujyunge ummosu uvi ale nundolelańumba jya mwene, vi vakamendama kumwene vakata: Ijetsanya ikyuma kyako.

² Pwu umwene akamwilanga akambutsa akata: Tsu nongwa ńi itsu ndipulika? Ukwa valaga isya pavuloleli vwako, mańa pwu navwiva ndoleli va ńumba jyango lino.

³ Pwu umwene undolelańumba akisagila mwitumbu mwene akata: Ino ndigahe ndeti lino? Mańa unkuludeva vango ipoka uvuloleli kwane. Ukulima kwu nandivumańili, nakwene ukudova isya kudova ndili nisoni.

⁴ Ena nditsivwene itsu ndivombaga itsa kumelela ukuta vitse vakańupilile nńumba tsa vene vwu ndivingilwe pavuloleli vwango.

⁵ Pwu akamwilanga mpamato-mpamato avatanile sininye kunkuludeva va mwene. Akambutsa undongotsi akata: Uve vwatanile kiki kunkuludeva vango?

⁶ Umwene akata: Ndatanile isibake sya mono imilevulo kitsigo. Umwene akata: Kota kalata vako uju, tama pasi apa uvige imilevulo gihano ṅani-ṅani.

⁷ Akavuja akambutsa ujyunge akata: Uve vwatanile kiki? Umwene akata: Ndatanile isidoto sya ngano imilevulo kitsigo. Umwene akata: Kota kalata vako uju uvige imilevulo nnana.

⁸ Pwu unkuludeva akanginya undoleli umbivi uju akata avombile aka luhala. Mańa avankilunga upwu vikina navajyavo, pwu vavalutile uluhala avańalumuli.

⁹ Ukwa nuńe ndivavule: Mwikavilage avakuva vajińo numamoni untsilavugolosu, pwu ukuta lungave lusiku angave ivona umamoni ukuta vitse vavupililage muhema itsivakwo sikutsoni.

¹⁰ Uvi iva ngolosu napavudebe, vi iva ngolosu napene pavuvaha. Uvi nigolosa napavudebe, vi nigolosa napene pavuvaha.

¹¹ Ino ngave namwiva vagolosu napamamoni untsilavugolosu, pwu veni ate avapetsage isya jilweli?

¹² Ino ngave namwiva vagolosu pakyuma kya vange, pwu veni ate avapetsage ikińo?

¹³ Nakuli ungulano uvi avumańile ukuvavombela avatwa vavili paninye. Mańa angave ita ndivavombele vwu vavili, pwu ndili ikunsula ujyunge uju, ndili ikungana ujyunge unine ulya, ndili ikumbadama ujyunge uju, ndili ikungilila ujyunge unine ulya. Bako ndatetsaga pange tuvavombelage paninye vwu vavili nu-Nguluve nu-Mamoni.

¹⁴ Tsu vakapulika tsoni tsitsitsi navapalisai avaganandalama, pwu vakamelula.

¹⁵ Umwene akanda akata: Uńe ńivene mukipela uvugolosu vwu vipulika avanu. Umwene Unguluve vi atsimańile inumbula tsińo, Mańa itsu vatsimike avanu, tsu atsivwene ukuva mwiko Unguluve.

¹⁶ Nisimilitso navańamalago vasike pa-Johani. Ukuhuma baho pwu tsitsovwa inongwa innonu tsa ludeva lwa Nguluve, voni vikijumilitsa ukwingila.

¹⁷ Ukujaga ikilunga nikya kukyańa nikya pasi nukuvusivwa akańusu kapamato kene ka mundagilo–kwebepe ku kujaga ikilunga.

¹⁸ Uvi ikumumya undala itola ujyunge, vi aligwipe vuvule. Nuvi ikuntola undala uvi agotwilwe, namwene vwu aligwipe vuvule.

¹⁹ Alikwo umunu ujyunge umosu uvi aswalaga imisabwa imiduṅu nimivalasu nimińogotasu, akakina mbunnonu sikutsoni.

²⁰ Alepwo nujyunge ungatsu uvi ale vi Lasale ilitavwa, vi vambikile pandyango gwa ńumba jya mosu, vi ale nisikoṅo ummana gwoni.

²¹ Akanogwa ukwiguta utulagalila utwu asigatsaga ummosu vwu alye. Natsene imbwa tsikamyanga isikoṅo sya mwene.

²² Pwu ungatsu akaswa. Avasuṅwa vakampimba vakatsikumbika ndupagato lwa Abulahamu. Namwene umosu akaswa akasilwa.

²³ Lola vwu ali mbutsuka vwu ikuvilwa, pwu akinamuka amiho akambona Abulahamu kuvutale, akavona ampagite naju-Lasale.

²⁴ Akilanga akata: Vi dada Abulahamu uvetsage nikisa kwane, usuṅilage ULasale atomye ulukonze lwa mwene mmagasi itse atsitsimye ululimi, lola ndikuvilwa ndulimbo umu.

²⁵ Umwene Abulahamu akamwanda akata: Ukumbuhitsage vi mwana vango, mańa uve vwupilye ṅani uvunnonu vwako vwu uli miho mavalasu, umwene ULasale lola upilye vu vuvivi. Lino lola pwu umwene itsesivwa apa, uve vukuvilwa.

²⁶ Nalwene ulugenge ulutale luvikilwe pagati ulwa kutugavanya nuvwe nuńe, ulwa kuvakilivula navakunu vangave vita tulovoke twitse kwańe ukwa, navakukwa vangave vita tulovoke kwavwe kunu.

²⁷ Pwu umwene akata: Pwu humbe nditekelesa kwave vi dada ndita usuṅage kuńumba jya dada.

²⁸ Mańa ndili navalukololwango vahano, vwu ndita akavahumyage ukuta valitsaga navene umwu ndikuvilwa une.

²⁹ Pwu umwene Abulahamu akanda akata: Mańa vali navo nu-Mose navańamalago vapulikage kuvene.

³⁰ Umwene akabela akata: Bako vi dada Abulahamu, vangave vivona ujyunge ahumile kuvutsuka ikuvavonekela pwu pange vikilivuka.

³¹ Umwene Abulahamu akanda akata: Vangave navipulika nakwa Mose nakuvańamalago, pwu navalatsivone avene angave ujyunge atsukile kuvuswe.