Luuka 15 - UTESITAMENTI UMPYA

¹ Pwu vakahegelela kumwene voni navasangutsi navatulanongwa vakata tupulikage itsu itsova.

² Avene avapalisai navamańakalata vwu vakihiva vakata: Umunu uju mumbwene ikuvupilila avatulanongwa ilya navene isinu.

³ Pwu umwene akavavula ikihwanihitso iki akata:

⁴ Uńe umwumbelye angave umunu ali niṅolo imilevulo kitsigo, pwu mamato jijage ndita pwu ikutsileka paludasi tsoni inine imilevulo budikakupamato nabudikakupamato, ikonga kulonda ijijagile, ilonda, ilonda ikilekelwa vwu ajivwene ndita?

⁵ Apene vwu ajivwene pwu ivegala pivega ihekela sitso.

⁶ Lola vwu iva pakusika kuńumba, pwu ikuvalundamanya voni navanine navabadiṅine uvwu atsenginye vwu ikuvavula ita: Ukwi tuhekelage twivoni, mańa ndijivwene iṅolo jyango ijikajagile.

⁷ Leka ndivavule uńe: Vwu valagahaga vuvule-vule avakukyańa, navalavalole avagolosu imilevulo budikakupamato nabudikakupamato uvwu navasumbilwi ulukilivuko ulunge, valahekela pantulanongwa mpamato uvi ikilivuka.

⁸ Namwene undala angave ale nindalama kitsigo, lola ulutalama lupamato lujage ndita ikotsa ińale, ikuna nńumba ikilivuṅana nukulonda, ilonda, ilonda ikilekelwa vwu aluvwene ndita?

⁹ Vwu aluvwene ikuvalundamanya avanine navabadiṅine uvwu atsenginye ita: Ukwi tuhekelage twivoni, mańa ndiluvwene ulutalama ulukajagile.

¹⁰ Leka ndivavule uńe: Vwu valahekelaga vuvule-vule avasuṅwa va Nguluve pantulanongwa mpamato mwene uvi ikilivuka.

¹¹ Akavavula akata: Ujyunge umunu ale navaswambe vavili.

¹² Mańa undebe akatsova kwa dadaje akata: Vi dada utugavanyage ikyuma, umetsage ikyango ikyuma ikyu ndilinaṅile nakyo une. Pwu umwene akavagavanya ikyuma,

¹³ Lola vwu galutile padebe pwu umwene undebe akalundamanya syoni isya mwene akahama akabiha kukilunga ikya kuvutale. Kwu ikyuma kya mwene kikajaga ulwakuva ivejanga vuvule mwene.

¹⁴ Lola vwu amalile syoni isya mwene, pwu inzala ńongosu jikagwa nkilunga kikyo, pwu umwene akava ngatsu vuvule.

¹⁵ Pwu akabiha pakuvomba imbombo pamunu ujyunge uvi atsengile nkilunga mumwa. Vi akansuṅa kuludasi lwa mwene akata kwu adimage ingube tsa mwene.

¹⁶ Umwene akanogwa amakona ga mange ugwu tsalitsaga ingube, gwu vangave vikuma ukuta ndigutage vuvule mwitumbu umu. Nagene vakamwima.

¹⁷ Pwu akisagila akasaganya akata: Pwu ndikatye ndiswitsage inzala vwu padada avavombi vongosu avikwiguta vuvule isinu isidigile?

¹⁸ Pwu lino ndibiha kwa dada pwu nditsova nave ndita: Vi dada nditulile inongwa kukyańa nakwave.

¹⁹ Lino pwu nandinogili ukutsovwa ukuva ndi nswambo, uńupililage ndive munu vako vuvule va kukulimila.

²⁰ Pwu akima ukubiha kwa dadaje. Lola vwu ali kuvutale, pwu udadaje akambona, pwu ikisa kikambona udadaje mwitumbu, pwu akańila kukumwupilila, akamwibata kunsingo akantsiba kundomo.

²¹ Umwene unswambe vi akata: Vi dada nditulile inongwa kukyańa nakwave, lino nandinogili ukuva nswambo.

²² Umwene udadaje akavavula avakivaga va mwene akata: Nńilage nkatole ugwańingilitsa unnonu gulya unduti kuginge, gwu munswalitsage. Mumpetsage nuluseṅeti lwa ndukonze nisikato sya mmalunde.

²³ Mugege niṅambako ilya mbude, tulitsage tukinage vunnonu.

²⁴ Mańa unswambango uju aswe, lino avujile atsukile, umwene ajagile, lino pwu avonike lweli. Pwu vakakina sitso.

²⁵ Umwene unswambe umbaha lola vi ale kwilima, lola vwu itsile vwu ahegelye nńumba pwu akapulika imwato, pwu akapulika nulwimbo ninengela.

²⁶ Pwu akamwilanga ujyunge undume akambutsa akata: Kyu kinu kiki ukwa?

²⁷ Vi akambula akata: Unnunavo itsile pwu udadajo abudile iṅambako ilya ulwakuva ambwene ndulusu vuvule.

²⁸ Pwu umwene gukavipa akabela nukwingila nńumba, Pwu udadaje akahuma panzi akantekelesa.

²⁹ Umwene akamwanda udadaje akata: Lola imyaka gyoni ndikuvombye imbombo tsako, natsene indagilo tsako nandivejangili lusiku, lola uve numili lusiku akapene akadebe akakukinila navajango.

³⁰ Lola upwu itsile unswambo uju, uvi ikyuma kyako alye mbuligu, pwu uve umbudye iṅambako.

³¹ Umwene udadaje akamwanda akata: Vi nswambango uve, syoni nisyu ndilinasyo une syako uve vuvule.

³² Lola kunogye vuvule ukuta tuvetsage nuvukino ukuta tuhekelage, mańa ununavo uju aswe, line avujile atsukile, ajagile, lino lola pwu avonike jilweli.