Luuka 14 - UTESITAMENTI UMPYA

¹ Palitsuva ilinge pasabati pwu UJesu akatsilya isinu nńumba jya mbaha mbapalisai. Avene vakantegelesa.

² Pwu akavona umunu uńa vutamu vwa matwitwi, vambikile pavuvalasu vita alole.

³ Pwu UJesu akavavutsa avamańandagilo nava palisai akata: Ndeti ńi vajyango, nda kunnonu ukumponya umunu pasabati?

⁴ Avene vakava mye vuvule. Pwu umwene akamwibata akamponya, akata bihaga lino.

⁵ Pwu akatsova navene akata: Uńe umwumbelye ino angave ujyunge iligodovwe lya mwene pange nisenga jya mwene, ino jingave jigye mwiguli lya magasi, nda ileka ukuhumya ṅani-ṅani palitsuva lya sabati?

⁶ Pwu tsikajaga avene itsa kumwanda patsitsitsi.

⁷ Akavona avanu avilangilwe kwilya isinu vikihalila ukutama apimikivwe pwu akavavula ikihwanihitso akata:

⁸ Angave umunu akwilangile atye vwitse kwilya isya pavutegulane, kwu bako ukutsitama apimikivwe, pange vwivona ilangilwe nujyunge umbaha nakwave,

⁹ lola pwu uvone itsova kwave uvi avilangile ńi vavili, uvone ita: Umbukile unnino uju, lweli pwu uvone untwe gwidiga uve vwu vukwima ukubiha kukisikasika.

¹⁰ Bako angave umunu akwilangile atye vwitsage tukalitsage twivoni isinu, pwu utengule ukutama kukisikasika, uvi akwilangile pwu ukuta itse atsove jujwa vwu itsile ate: Vi njyango toga utame apimikivwe palya. Pwu voni uvwu utamile navo pakulya valata: Vi vi mbaha uve.

¹¹ Mańa uvi ikijimika mwene, vi alisivwa, uvi ikijisa mwene, vi alimikwa.

¹² Namwene uvi amwilangile kwilya isinu akambula akata: Ungave uvatelekye avanu pange sya kulya pavusiku pange sya kulya pakimihe, pwu ulavilangaga avanino navalukololwako, navene uvwu mumańine, navamosu uvwu ubadiṅine navo pakutsenga. Lola pange uvone navene vikukutelekela isinu vikukwilanga, pwu vave nda vakuhombile pasinu syako.

¹³ Bako ungave utelike isya kulya, pwu uvilange avagatsu navańavulema navidońoloka ukugenda navabosu.

¹⁴ Pwu ulava va ndugataluko jilweli. Mańa avene navalinasyo isinge isya kukuvutsihitsa lola isya kuvutsa syu ulasivona vwu vitsuka avagolosu.

¹⁵ Vwu apulike tsitsitsi ujyunge uvi atamile nave pakulya pwu akata: Ena vi va ndugataluko uvi alalya isinu ndudeva lwa Nguluve.

¹⁶ Umwene UJesu akambula akata: Ujyunge umunu atelike isinu sya kwigoneka sisyongosu, pwu akavilanga vavongosu avanu.

¹⁷ Pwu pakavalilo ka kulila akansuṅa unkivaga va mwene akata: Ubihage ukavavule avilangwa ukatetsage: Mwitsage lino mańa isinu sipye.

¹⁸ Pwu voni vakatengula ukubela. Undongotsi akata: Lola ndigulile ungunda, kwu kuva ndili nuvusumbe vwa kulola. Bako ndume ukambelele.

¹⁹ Ujyunge unine akata: Lola ndigulile iṅambako ihano, ndibiha kukutsigela, Bako ndume ukambelele,

²⁰ Ujyunge unine akata: Lola ndihumile pakutola undala lino, pwu nandikwitsi.

²¹ Vwu itsile ukwu ale unkivaga uju, pwu akambula tsitsitsi unkuludeva va mwene. Pwu gukavipa sitso umwenevutsenge, akambula unkivaga va mwene akata: Ubihage ṅani-ṅani namakasi namunzila mmalekano ukavalundamanye umu voni navagatsu navańavulema navaboswe navidońoloka ukugenda.

²² Pwu unkivaga akata: Nkuludeva ndivombile itsu ulagilage, musigye nńumba.

²³ Pwu unkuludeva akambula unkivaga va mwene akata: Bihaga gendaga mwoni namunzila namumbigo ukavumilitsage vuvule vitsage umu, vadige nńumba jyango umu.

²⁴ Lola ndikuvavula ndita: Avanu valya avilangwa nalasimańe ujyunge mundomo isinu syango isya kwigoneka.

²⁵ Lino vakagendanya nave avanu ikipuga kikyongosu, pwu umwene akavakilivukila akavavula akata:

²⁶ Angave umunu ikwitsa kwane untsilakunsula udadaje nuvańina navana navamamaje navahatsave, untsilakuvusula nuvwumi vwa mwene, vi niva nkongi vango.

²⁷ Namwene uvi nikitwika ikidamiṅanye kya mwene nikuṅonga, vi niva nkongi vango.

²⁸ Mańa uńe umwumbelye angave ujyunge ita nditsenge iliboma lya mapamba, pwu itengula ukutama pakuvala isya kutsengela tango, ita ndilole tango vwu ndili nasyo isya kutsengela isya kumalihitsa ndita?

²⁹ Mańa alumańile umwene ukuta voni avikundola vwu itsenga, valamovela vangave vavwene kundemile ukumalisa ińumba vwu avikile lu lwalo lwene,

³⁰ vitetsaga: Umunu uju atengwe ukutsenga iliboma, mańa likandema ukumalisa.

³¹ Vuvule-vule namwene unkuludeva ndita uvi abye kwilwa iligoha nunkuludeva ujyunge. Ndita namwene itengula ukutama pakwisagila tango ita: Avango vali vaelipu kitsigo vuvule (10000), uvwu ulya agegile iligoha vali vaelipu imilevulo givili (20000), nda pwu ndimikane nave lino?

³² Angave ivwene ita bako lindemile iligoha ili, pwu isuṅa avańakusuṅa vwu tango ali kuvutale unine ita nkambutse isya kumańanila nkatetsage: Syu siliku?

³³ Vuvulevule ńivoni umwu mbelye. Uvi nikusileka syoni isyuma sya mwene vuvule, vi niva nkongi vango.

³⁴ Umwińo gwu nnonu vuvule. Apene upwu gungave umwińo guvejangike, pwu upita sivetsagepwo isya kuvela nnonu.

³⁵ Gutye namungunda nagunogili ukuta vatagage, gutye napene napandakambe nagunogili. Bako vitaga vuvule. Uvi imbulukutu tsa kupulihitsa ali natso, vi apulinitsage.