Luuka 13 - UTESITAMENTI UMPYA

¹ Mmatsuva aga pwuvale avange baha vwu vakambula itsa va mu-Galilai, uvwu UPilate aguhanzitse unkisa gwa vene ninekelo jya vene ijyu vitekelaga.

² Pwu UJesu akavanda akata: Uńe pange mukuvasagila ava mu-Galilai ava mwita pange vavalutile voni ava mu-Galilai avajyavo uvutulanongwa ulwakuva vabudilwe vuvule-vule.

³ Une ndibela ndita: Bako. Lweli uńe ngave namukilivuka pwu nuńe ndaswa vuvule-vule ńivoni.

⁴ Avakitsigo nannana uvwu iliboma lya mu-Siloha livagwilage uvwu livabudage uńe pange mwita vwu valutilye ukutula inongwa kuvoni avajyavo avatsengile mu-Jelusalemu.

⁵ Une ndibela ndita: Bako. Lweli uńe ngave namukilivuka pwu nuńe ndaswa vuvule-vule ńivoni.

⁶ Pwu akavavula ikihwanihitso akata: Ujyunge umunu ale nunkuju gwa mwene, ugwu avyalile mungunda gwa mwene gwa masilu. Pwu akata ndilole vwu guhupile iseke, pwu akavona naguhupili itsinge.

⁷ Pwu akatsova nundoleli va ngunda gwa masilu akata: Lola lino nditsile sikutsoni imyaka gidatu ndita ndilole vwu guhupile iseke unkuju ugu, mańa sikutsoni ndivona bako naguhupili itsinge. Lino ugudumulage. Guvejanga kiki ungunda?

⁸ Pwu umwene akanda akata: Nkuludeva uguleke umwaka ugu gwene, ndigujavilage tango ndivoleletse nindakambe,

⁹ pwu pange guhupaga iseke. Mańa pwu ungave uvwene guṅatile lweli, pwu vwitse ugudumulage lweli.

¹⁰ Pwu ulunge vwu ikuvavula inongwa nńumba ijyinge jya kwisajilamwo pasabati,

¹¹ pwu akava mumwa undala, uvi imepo imbivi jimpelye uvutamu ulwakuva jamwuvatye imyaka kitsigo nannana. Umwene adudumbalye nukududumbala untsilakugoloka lusiku.

¹² Umwene UJesu vwu ambwene, pwu akamwilanga akata: Vi ndala ndikuvopwe uvutamu vwako uvu.

¹³ Akambika namavoko. Pwu undala akagoloka ṅani ṅani. Pwu akanginya Unguluve.

¹⁴ Umwene undolelańumba jya kwisajilamwo gukavipa vwu avwene UJesu ikumponya pasabati undala. Pwu akavavula avanu akata: Amatsuva ga mbombo gali ntanato, pwu mwitse ngave mulonda ukuponetsivwa, mańa pasabati pwu nditsaga.

¹⁵ Umwene unkuludeva akamwanda akata: Ńi vanwasi uńe ńivoni nda namukutsivopola isenga tsińo namagodovwe gińo nsititsi pasabati, namwibiha natso kumagasi?

¹⁶ Mańa umwene umwana va Abulahamu uju, uvi USetano ankungile imyaka kitsigo nannana, vi ndeti ntetsage nanogili ukumbopola ululegehe ulu palitsuva lya sabati?

¹⁷ Vwu atsovile tsitsitsi pwu tsikavavona isoni voni avabadeṅine nave. Avene avanu ikipuga kyoni vwu vakahekela vwu vatsivwene tsoni imbaha itsu apelaga.

¹⁸ Pwu umwene akavutsa akata: Uludeva lwa Nguluve tutetsage luli ndikiki? Tukivone ndaku ikihwanihitso kya kuhwanihitsa?

¹⁹ Tutetsage luli ndakaseke ka nkisina ukwu umunu akatola akalaha mungunda gwa mwene umwu avyalile imibiki, pwu kakamela gukipela mbiki umbaha, nasyene isidege sya kukyańa sikahona uvuswa mmapagika ga gwene.

²⁰ Akavuja akata: Uludeva lwa Nguluve luli ndikiki?

²¹ Tutetsage luli ndunsabe ugwu akatola undala akahanza nuvuhevete isidili sidatu, pwu vukalula vwoni vuvule.

²² Pwu umwene akapolanika uvutsenge vwoni nuvuvaha nuvudebe akalotsa mu-Jelusalemu, akavavula inongwa avanu vwu igenda.

²³ Pwu ujyunge umunu akambutsa akata: Nkuludeva humbe vadebe avipokivwa? Umwene akavavula akata:

²⁴ Mwijumilitsage pakwingila pandyango unsińe, Mańa ndikuvavula ndita: Vongosu avalalemwa vwu vijumilitse vatye twingilage.

²⁵ Angave umweneńumba asisimwike pakudinda pandyango ngave mwimile panzi mukoṅona kulwitsi mwita: Nkuludeva ungatudindulila kundyango, pwu umwene alanda alata: Nandivamańili ukwu muhumile.

²⁶ Pwu ndatengula pakuta: Nupwu twalitsaga twivoni nuve isinu, nupwu twańwetsaga twivoni nuve isya kuńwa, pwu nda nutuvweni? Nupwu vwatuvulaga inongwa nduvanza mwavwe, pwu nda nutuvweni?

²⁷ Pwu umwene alata: Ndikuvavula ndita nandivamańili ukwu muhumile, muhumage pane apa ńivoni ńi muvomba imbivi sikutsoni.

²⁸ Pwu jilava ingolo jyene, lulava nulugadutso lwa mino lwene vwu muvwene avene va-Abulahamu nu-Isikaka nu-Jakobu navańamalago voni vali ndudeva lwa Nguluve vwu uńe mutagilwe panzi.

²⁹ Valahumaga napavuhumo ilitsuva nakuvusemo nakukasikasini nakusini ukutsitama pakulya isinu ndudeva lwa Nguluve.

³⁰ Lola pwuvale navamumbele avalava valongotsi, pwuvale navalongotsi avalava vamumbele.

³¹ Pwu ilitsuva ili pwu vakatsikumbula avange avapalisai vakata: Kimbilaga ubihage kuvunge mańa UHeloti ita akubude.

³² Pwu umwene akata: Mbihage nkaguvule ugunu ugu nkatetsage: Atye lola nukuhumya imepo imbivi nukuponya avatamu ndimalisa ilelo iji nakilavo, pavusiku vwu ndisike vuvule pakupela.

³³ Mańa ilelo iji nakilavo napavusiku pwu upita ndigendage inzila jyango. Mańa naviswila avańamalago pavunge, vuvule mu-Jelusalemu mwu viswila.

³⁴ Vi Jelusalemu, vi Jelusalemu vi vukuvabuda avańamalago, vi vukuvatova namaganga avasuṅilwe kwave, napongosu lino upwu nditye ndivalundamanye avańa vako nduvwu inemba jilundamanya ivana mmapapatilo ga jyene, mańa uńe mukabela.

³⁵ Lola ińumba jińo mulekwagwa vuvule. Lweli ndikuvavula ndita: Nandambone lusiku ndatsisika lulwa ndatsovelaga ndatetsaga: Mwalimi vi vukwitsila mwitavwa lya nkuludeva,–pwu lweli.