Luuka 11 - UTESITAMENTI UMPYA

¹ Ulunge umwene akisaja apange, lino vwu amalile pwu ujyunge unkongi va mwene akatsova nave akata: Nkuludeva nuvwe utumańisage ukwisaja nduvwu UJohani avamańisaga ukwisaja avakongi va mwene.

² Umwene akavavula akata: Ngave mukisaja pwu ntetsage: Dada, ilitavwa lyako livalatsivwe, uludeva lwako lwitsage,

³ utupetsage isinu situ sya ilelo iji,

⁴ utusyikilage inongwa tsitu, mańa nuvwe tukuvasyikila voni avali ninongwa kwavwe, ulatuvikaga ndugelo.

⁵ Pwu UJesu akata: Veni mwańe avetsage nunine abihage kumwene pakilo pagati atetsage: Vi njango unanilage isivanda sidatu,

⁶ lola ujyunge unjango uva munzila itsile ali pane, lola uńe sijagile isya kunsugila.

⁷ Umwene uva nńumba ande atetsage: Vi njango ulangatatsaga nuve mańa kundyango ndidindile kakatale, nuńe navana vango twivoni tugonelye. Pwu ndivuje ndisisimuke ndikupe?

⁸ Ukwa ndivavule uńe: Nupwu angave nisisimuka pakumpa ulwakuva nine, napene isisimukilaga ulwakuva amwumilitse vuvule, ikumpa isyu ilonda.

⁹ Tsu nuńe ndikuvavula ndita: Ndovage pwu ndapevwa, ndondage pwu ndasivona, nkoṅonage palwitsi pwu ndadindulilwa.

¹⁰ Mańa voni avidova vwu vikwupililaga, voni avilonda vwu vikusivonaga, voni avikoṅona kulwitsi vwu vidindulilwa.

¹¹ Mwańe umwu mbelye veni umunu umolamwana uvi ikumpa iliganga umwana va mwene vwu umwene adovile ikivanda? Uvi ikumpa ińandalwe vwu umwene adovile isomba?

¹² Uvi ikumpa akapilili vwu adovile ilikaṅa?

¹³ Apene lola ngave uńe, ńi ndi vavivi vuvule, ngave avańa vińo mukuvapa isya kuvapa isinnonu, pwu udadajińo uva kukyańa aleke ukuvapa UMepo umbalatse avidova kumwene?

¹⁴ Ulunge UJesu akajihumya imepo imbivi ijale kinunu. Lino vwu jihumile imepo imbivi pwu akatsova umunu. Pwu vakadega avanu ikipuga kyoni.

¹⁵ Mańa avange vakata: Imepo imbivi ikutsihumihitsa mwa Belisibuli umamaje va mepo imbivi.

¹⁶ Avange vakata tungele, pwu vakadova ikipelwa kya kukyańa kumwene.

¹⁷ Umwene vwu atsivwene itsu vikisagila mwitumbu, pwu akavavula akata: Kyoni ikilunga kingave kihambuṅine kikyo kyene, pwu kiseneluka vuvule, pwu tsoni ińumba tsigwilanila.

¹⁸ Napene angave USetano ikilivulinye mwene pwu uludeva lwa mwene luvetsage kwo ndeti? Ulwakuva mwita imepo imbivi ndikutsihumihitsa mwa Belisibuli.

¹⁹ Apene ndingave imepo imbivi ndikutsihumihitsa mwa Belisibuli, pwu avańa vińo vikutsihumihitsa mwani? Tsu valavahigaga avańa vińo.

²⁰ Ndingave uńe ndikutsikumihitsa nulukonze lwa Nguluve, pwu humbe uludeva lwa Nguluve luvitsye.

²¹ Uńangusu angave igelike ingoha tsa mwene, angave ilolela ińumba jya mwene, pwu syoni sya mwene siva sinnonu vuvule.

²² Lola angasike uvi andutile ukulwa ipoka amagoha ga mwene ugwu iginihitsige, igoma syoni igavanya.

²³ Uvi natwiva twivoni nuńe, vi tuli ngosyo, uvi nikunanga ukulundamanya, vi ivejanga.

²⁴ Lingave ilipepo ilivivi lihumile mmunu pwu litsungutila mwoni-mwoni, lilonda apakugataluka, livona napivoneka pwu lita ndivujage kuńumba jyango ukwu ndahumile.

²⁵ Vwu litsile pwu livona vakunile vanotsitse.

²⁶ Pwu libiha ukutola iginge iminine lekelakupamato igilutile uvuvivi nakulyene. Vwu gingye giva mumwa, pwu umunu ulwambele ahambuke sitso alute nakululongotsi.

²⁷ Vwu itsova tsitsitsi pwu vakavona undala ujyunge uvi ale nkipuga mumwa ikola ilimeńu ilivaha ita: Gwa ndugataluko namumapa umwu vwavetsaga uve, ga ndugataluko namavele ugwu vwonaga.

²⁸ Umwene akata: Ena va ndugataluko avita nukupulika nukulikonga ilimeńu lya Nguluve.

²⁹ Avwene vikunkulugila avanu pwu akata: Avanu va lino ava uvuvivi vuki! Lino vidova ikidego. Lweli navikukivonaga ikinge ikidego. Ki kidego kilya kyavetsaga nu-Jona, kyu vikukivonaga kyene.

³⁰ Mańa nduvwu UJona kyale kidego kuvanu va mu-Ninive, vwu alagahwagwa vuvule-vule Uńamunu, kilavetsaga kidego kuvanu va lino ava.

³¹ Unkuludeva undala ulya uvi ahumile kukilunga kya kusini vi alasisimukilaga lunine navanu va lino ava palitsuva lya kuhigila inongwa alatsovaga uvuvivi, mańa umwene ahumile ukwu kisilye ikilunga ukupulika uluhala lwa Selomoni. Ukwa pwale baha umbaha nakwa Selomoni.

³² Avanu va mu-Ninive valasisimukaga lunine navanu va lino ava palitsuva lya kuhigila inongwa valavatsovaga uvuvivi, mańa avene vakilivwike upwu UJona avavulage inongwa. Ukwa pwale baha umbaha nakwa Jona.

³³ Nijyene ińale angave umunu akotsitse pwu nisiha kuvutitu, nigubikila nikiswiswi. Bako ivika pakyańa pakibatilo, voni avikwingila nńumba ukuta vajivone ukumulika.

³⁴ Ińale jya mumana gwako lyu liho lyako. Upwu lingave iliho lyako livalatse vuvule, pwu nagwene ummana gwako mbalatse vuvule. Lola upwu lingave iliho lyako livivi, pwu nagwene ummana gwako gwiva ṅisi vuvule.

³⁵ Uvandikage lino ulumuli ulwu uli nalwo ukuta lulipelaga ukuva ṅisi vuvule.

³⁶ Upwu gungave ummana gwako gwoni gumulika, nagwiva ninguto ijyinge jya ṅisi, pwu ugwene gwoni lwiva lumuli lwene, nduvwu jingave nijyene ińale jikukumulika nukulengalenga kwa jyene.

³⁷ Lino vwu ahumile pakutsova tsitsitsi pwu ujyunge umpalisai akamwilanga akata: Tuvuke tukalavukage twivoni pane palya. Pwu umwene akingila nńumba jya mwene akatama.

³⁸ Umwene umpalisai vwu ambwene pwu akadega ulwakuva avwene nipuguha tango amavoko vwu ali pakulya.

³⁹ Pwu unkuludeva akambula akata: Lola uńe ńi vapalisai ukuhusuga kwu muhusuga nisińwelo sińo nindelema tsińo kunzi, mańa mwitumbu mwane kyu kipokano kyene, vwu vuvivi vwene vudigile vuvule mumwa.

⁴⁰ Ńi vapelwa uńe, umpeli uvi apelile kunzi nda napelili namwene namungati?

⁴¹ Isyu singave sili mungati syu humbe mbapetsage avanu sive sya vupevwa, pwu syoni siva sivalatse uńe.

⁴² Muli viki ńi vapalisai ńi napambilipili napambwiga napaseke tsoni vuvule pwu mutola isya pandevulo, mańa itsene nitsa kugolosa ukuhiga inongwa nitsa kungana Unguluve tsu mulutiṅanya vuvule. Mańa ngave mwatetsaga itsinge itsi tsu tutsivombage natsene inine tsilya tsu tulatsilekaga pwu humbe!

⁴³ Muli viki ńi vapalisai ńi nńumba tsińo tsa kwisajila mwu mwita tutame pakitamilo kya vuvaha, nanduvanza munogilwe ukuta avanu vavapembetsage.

⁴⁴ Muli viki ńi muli nduvuguli uvwu navuvoneka ukuva vwu vuguli vwene, uvwu avanu vikada vuvule pakyańa kitakwivona ukuta vikada pavuguli.

⁴⁵ Pwu akamwanda ujyunge umańandagilo akata: Vi mańisi, amameńu aga gwu ga kutuduka nuvwe uve.

⁴⁶ Umwene akata: Muli viki nuńe ńi vamańandagilo ńi mukuvatwika imitsigo imideńavanu avanu, uńe ukugyabasa kwu namukugyabasa nulukonze lupamato lwene.

⁴⁷ Muli viki ńi mutsengelela uvuguli vwa vańamalago. Nda navali vadadajińo avavabudile?

⁴⁸ Kwu kuva mutye nukwipala pavuvalasu itsu vavombile avadadajińo muvujile mutye nukutsidikila uńe. Mańa avene vavabudile, uńe mukuvatsengelela uvuguli vwa vene.

⁴⁹ Pwu lutsovye ṅani uluhala lwa Nguluve lukata: Ndikuvasunilaga avapositili. Avange valavabuda, avange valavaswima.

⁵⁰ Unkisa gwa vańamalago voni pwu ukuta nditse ndivatsigilage avanu va lino ava, gwoni vuvule ugududike ukuhuma upwu kyapelilwe ikilunga,

⁵¹ ukuhuma pankisa gwa Heveli ukutsisika kunkisa gwa Sakalija kunu, uvi aswilaga pagati napagati nikitekelelo kya kutekelapwo nińumba imbalatse. Ena jilweli ndikuvavula ndita: Valatsigilivwagwa avanu va lino ava.

⁵² Muli viki ńi vamańandagilo uńe, ńi mupatye ikidindililo kya kudindulila kuvumańatsoni. Mutye nuńe namukwingila, pwu mutye navene avita twingilage muvabetsitse vuvule.

⁵³ Avwene UJesu vwu itsova tsitsitsi pwu gukavipa sitso mwitumbu avamańakalata navapalisai vakambutsa ńongosu vuvule.

⁵⁴ Vakantegela vakata: Tutsivone itsinge itsu itsova mundomo itsa kunswika inongwa.