Luuka 1 - UTESITAMENTI UMPYA

¹ Ndivwene vagetsitse vongosu ukutupangila mwa kalata tsoni inongwa umwu tsakongine itsivonike ukwipela mwavwe umu,

² tsitsu vatulekye avakivaga va limeńu avalongwe ukutsivona namiho ga vene vwu tsitengula.

³ Pwu nuńe ndisimanzitse tsoni, ndihumile natsu pavutengulilo. Pwu nditye ndikukuvigilaga nuve vi Tyopile vi ntwa jilweli, nditye tsikonganaga vuvule mundagilo,

⁴ ulwakuva ndita nuve ugamańe vunnonu amameńu ugwu upulike ukuta vwu gali jilweli.

⁵ Mańa upwu UHeloti avetsage nkuludeva nkilunga kya va-Juta pwu alekwo ujyunge unteketsi uva lukindi lwa vańa-Abija pambombo, ilitavwa lya mwene ale vi Sakalija. Undala va mwene ale vi mwana va Aloni pakivumbuko, ilitavwa lya mwene ale vi Elisabeti.

⁶ Vale vagolosu vwu vavili kwa Nguluve vakakonga namundagilo tsa nkuludeva nambugolosu uvwu asimilitse jujwa, nalikava ilinge ilya kuvatsova itsinge.

⁷ Mańa navale numwana ulwakuva Elisabeti ale ngumba. Napavugogolo vasike vwu vavili.

⁸ Ulunge vwu ali pakumbombela itsa vuteketsi Unguluve pamatsuva ga lukindi lwa mwene,

⁹ nduvwu lwale lwiho lwa vateketsi ulwa kutuṅilitsa, pwu akingila nkutuṅilitsa nńumba imbalatse jya nkuludeva.

¹⁰ Mańa avene avanu ikipuga kyoni vakava munkwisaja panzi pakavalilo ka kutuṅilitsa.

¹¹ Pwu akambonekela unsuṅwa va nkuludeva, akavona imile kukitekelelo kya kutuṅilitsa kukivoko ikyandyo.

¹² Pwu akakeńemuka sitso USakalija vwu ambwene, lukambona nuludwado.

¹³ Umwene unsuṅwa akata: Uladwadaga vi Sakalija, mańa Unguluve apulike tsitsu vwadovaga. Elisabeti undala vako alakuholela unswambo. Ilitavwa vi vwitse umpetsage ilya Johani.

¹⁴ Alakupelelaga nukuhekela nukukela sitso. Navange vongosu valahekela vwu aholilwe.

¹⁵ Mańa alava mbaha kumiho kunkuludeva, amasilu nisinge syoni isikungatsa umunu angave ańwe syu nalańwe isinge umwene. Umwene aladiga UMepo umbalatse mwitumbu mwa vańina.

¹⁶ Alavakilivulaga kwa Nguluve kuntwa va vene va vongosu avanu mbańa-Isilaeli umu.

¹⁷ Umwene alagendelaga namumepo jya Elija namumaka ga mwene vwu alongwe mbulongolo mwa Jujwa. Inumbula tsa vadadajavo alatsikilivulaga kuvana va vene, avikwila navene alavakilivulaga visagilage itsa vugolosu, nunkuludeva alangahilaga avanu avanogilwe ukumwupilila.

¹⁸ Pwu USakalija akambutsa unsuṅwa akata: Tsu nditsimańage ndeti tsitsitsi? Mańa ndili ngogolo, namwene undala vango asike pavugogolo.

¹⁹ Pwu akamwanda unsuṅwa akata: Uńe ndi Gabilyeli, ndi ndimile sikutsoni kumiho kwa Nguluve. Lino ndisuṅilwe kwave kukutsova nuve kukukuvula inongwa innonu tsitsitsi.

²⁰ Lola vwiva mye vuvule lino, nulamańe nukutsova ukutsisika kulitsuva lilyo tsilavonekelaga tsitsitsi ulwakuva ubelile amameńu gango ugwu ndikuvulile, ugwu galitsa jilweli palitsuva lya gene.

²¹ Avene avanu vakampulikila USakalija. Vakadega vwu asuvalye nńumba imbalatse.

²² Umwene vwu ihuma pwu vakavona nalumańili ukutsova navanu ilimeńu ilinge. Pwu vakammańila baho avene ukuta aluvwene uluvoneko lumbonekye nńumba imbalatse. Umwene akavavinga ki kivoko, akava kinunu vuvule.

²³ Pwu akavona gasilile amatsuva ga mbombo tsa mwene pwu akavuja kuvutsenge vwa mwene.

²⁴ Pwu vwu agonile pwu Elisabeti undala va mwene akava ńimali, akuva imyetsi gihano akata:

²⁵ Vwu agahile vuvule-vule unkuludeva palitsuva lya kundolela vwu amokile ukuhovelivwa kuvanu.

²⁶ Vwu gilutile imyetsi gihano mumwetsi gwa ntanato, pwu Unguluve akansuṅa unsuṅwa UGabilyeli nkilunga kya mu-Galilai mbutsenge umwu vita mu-Nasaleti ilitavwa.

²⁷ Akansuṅa kuminza ujyunge uvi andavye ungosi uvi ale vi Josepu ilitavwa umwana va Ndaviti pakivumbuko. Umwene uminza ilitavwa lya mwene ale vi Malija.

²⁸ Pwu unsuṅwa akingila umwu alemwo akata: Ndikukupembetsa vi ukavile uluhungu, unkuludeva ali nuve.

²⁹ Umwene vwu ambwene pwu ilimeńu lilili likampelela ukuginzamuka, akisagila akata: Lwu lupembetso luki lululu?

³⁰ Umwene unsuṅwa akambula akata: Uladwadaga vi Malija, mańa uluvwene uluhungu kwa Nguluve.

³¹ Lola ulava ńimali, ulahola umwana undume, vi ulampetsaga ilitavwa ili Jesu.

³² Vi alava mbaha, alatsovwa ukuva vi mwana va ju Nduti. Nakyene nikińalwangula kya vutwa kya dadaje nditsova ikya Ndaviti alampa Unguluve untwa.

³³ Alava nkuludeva va pakivumbuko kya Jakobu sikutsoni. Nuludeva lwa mwene nalulasile lusiku.

³⁴ Pwu UMalija akambutsa unsuṅwa akata: Tsu tsivetsage ndeti tsitsitsi vwu nandili nungosi ujyunge lusiku?

³⁵ Umwene unsuṅwa akanda akata: UMepo umbalatse alakwitsila namaka ga ju Nduti galakuswika. Pwu numbalatse uvi ulamola alatsovwa ukuva vi mwana va Nguluve.

³⁶ Lola nu-Elisabeti unnino namwene ṅimali numwana undume mbugogolo lino. Ugwene ugu gwu mwetsi gwa mwene gwa ntanato vwu ńimali, uvi vikuntsova uvugumba.

³⁷ Mańa nasikuli isinge isikundema Unguluve.

³⁸ Pwu UMalija akata: Lola ndili munu va nkuludeva, asipelage kwane isyu utsovile. Pwu unsuṅwa akavuka.

³⁹ Pwu UMalija akasisimuka ukubiha vwu nagonili sitso, akabiha nsidugala ṅani-ṅani, akatsisika mbutsenge uvunge vwa nkilunga kya va-Juta.

⁴⁰ Akatsikwingila nńumba jya Sakalija akampembetsa Elisabeti.

⁴¹ Avwene lino Elisabeti vwu ipulika ulupembetso lwa Malija, pwu akavona umwana ikina mwitumbu mmwene. Pwu Elisabeti akadiga UMepo umbalatse,

⁴² akilanga akata: Usajilwe uve uvalutile voni avadala avanino. Nsajivwa namwene numwana uvi uli nave mwitumbu mwave.

⁴³ Ndili nakiki uńe, ndi uvańina va nkuludeva vango ate itsage kwane?

⁴⁴ Lola upwu ndipulike ilimeńu lyako lya kumembetsa mumbulukutu tsango pwu ndivwene umwana mwitumbu mwane ikina.

⁴⁵ Va ndugataluko uvi idike vuvule ukuta tsitsage tsitsu ambulile unkuludeva.

⁴⁶ Pwu UMalija akata: Umwuja gwango gukumwimika unkuludeva,

⁴⁷ nuntima gwango guhekela kwa Nguluve vango,

⁴⁸ mańa andolile uvudebe ndi munu va mwene. Lola vitengulaga lino, vikunzovaga ulugataluko isivumbuko syoni sya vanu,

⁴⁹ mańa uńamaka amelye isivaha, nilitavwa lya mwene livalatse.

⁵⁰ Nakyene ikisa kya mwene pwukili nakusivumbuko sya sivumbuko mmbene avikundwada.

⁵¹ Ikivoko kya mwene kipelile isya maka. Avańalwiginyo palwisagilo lwa munumbula tsa vene avahasitse.

⁵² Avańamaka avisitse pasińalwangula sya vene sya vutwa. Avimike va vadebe.

⁵³ Avańanzala avasugye imote. Avamosu navapili kinu.

⁵⁴ Ikuntanga Isilaeli umwana va mwene, mańa ita ndikumbuhitsage ikisa,

⁵⁵ nduvwu atsovile navo avadada nu-Abulahamu nikivumbuko kya mwene sikutsoni.

⁵⁶ Umwene UMalija akagona imyetsi gidatu pa Elisabeti, pwu akakilivuka ukubiha kuvutsenge vwa mwene.

⁵⁷ Pwu Elisabeti ilitsuva lya mwene lya kumola umwana likitsa, Pwu akamola umwana undume.

⁵⁸ Pwu navabadiṅani va mwene navanine vakapulika ukuta unkuludeva andilye ikisa ki kyongosu, pwu vakatsihekela nave.

⁵⁹ Mańa vwu agonile amatsuva nnana, pwu vakatsikegeta umwana. Vakampa ilitavwa lya dadaje ili Sakalija.

⁶⁰ Umwene uvańina akabela akata: Bako, mumpetsage ili Johani.

⁶¹ Avene vakata: Mańa nakuli ujyunge mbajińo uvalitavwa ili.

⁶² Vakatinila udadaje vakata: Humbe ikutuvulaga jujwa ilyu anogilwe ukumpa umwana.

⁶³ Umwene akadova akaganga ka kuvigilapwo. Pwu akaviga akata: Vi Johani ilitavwa lya mwene. Pwu voni vakadega.

⁶⁴ Pwu nundomo gwa mwene gukadinduka ṅani-ṅani, Nululimi lwa mwene lukavopoka, akanginya Unguluve.

⁶⁵ Pwu uludwado lukavavona voni avabadiṅine nave ukutsenga. Inongwa itsi tsikapulikika mwoni nsidugala mwa Juta.

⁶⁶ Voni avapulikaga tsitsitsi vakatsivika munumbula vakata: Ndalipelaga ukuvanki umwana uju? Ulwakuva vavwene ukuva nakyo ikivoko kya Nguluve.

⁶⁷ Pwu USakalija udadaje akadiga UMepo umbalatse akalaga akata:

⁶⁸ Munginyage untwa Unguluve va Isilaeli, mańa avalolile avanu va mwene avapelye ukuvangwa.

⁶⁹ Atwimikye ulusuga ulwa kutupoka nńumba jya Ndaviti jya munu va mwene.

⁷⁰ Ulwu atsovyenani mundomo mbańamalago avalongotsi,

⁷¹ ulwa kutupoka kuvatavangwa vitu nakukivoko kya vene avatusulile voni.

⁷² Mańa umwene akata: Ndivalilile ikisa avadadajitu, akata ndikumbuhitsage ulwidiṅano ulwu vakidinana navene uluvalatse.

⁷³ Mańa akata ndikumbuhitsage ulujigo ulwu anjigye Abulahamu udadajitu twivoni,

⁷⁴ ulwu akata valapokwa kumavoko ga vatavangwa va vene uvwe, pwu vambombele uńe avatsilaludwado,

⁷⁵ avavalatse avagolosu vuvule kumiho kwane sikutsoni gyoni imyaka igya kuvakwo kuvwumi uvwe.

⁷⁶ Nuve vi mwana ulatsovwa ukuva vi namalago va ju Nduti ulwakuva ulanotsa inzila jya mwene.

⁷⁷ Avanu va mwene ulavapa uluhala ukuta vimańe ukuta vuvavangile uvusyikilo vwa nongwa tsa vene,

⁷⁸ ulwakuva kimbwene ikisa mwitumbu Unguluve vitu pwu itsile Umuma-kukyańa,

⁷⁹ uvakuvasosomokela avamuṅisi navambuswe uvakutugolohetsa panzila jya lunotsehetso amalunde gitu.

⁸⁰ Umwene umwana akakula akaduluka numwuja gwa ngati. Akava ndukungu sikutsoni ukutsisika upwu ivonesage kwa Isilaeli kunu.