Galati 6 - UTESITAMENTI UMPYA

¹ Ńi vajitu napene jingave ijyinge inongwa jimwambulinye ujyunge unjińo pwu uńe ńi vańa-Mepo muntange mungolose ńi vahugu. Nuve vwilolage tsilakwambutsaga.

² Mwupiṅanage isya kugega sińo pwu mwiva vakongasimilitso tsa Kilisiti vuvule-vule.

³ Ulwakuva angave ujyunge umunu ikisagila mwene ita une ndimwene vwu umwene linu vuvule vwu itekile mwene.

⁴ Mańa imbombo tsitso vi munu tsu utsilolage utsimańage sitso pwu ulava natso itsa kwiginya mwave, pwu nandigelage nujyunge.

⁵ Mańa twivoni tulapimba isya kugega situ ujyunge isya mwene ujyunge isya mwene.

⁶ Uvi imańisivwa ilimeńu vi upita agavane nave uvi ikummańisa isinnonu isya mwene isyu ali nasyo.

⁷ Mbandikage ndajagaga: Unguluve nihovelwa! Mańa isyu vwilaha vi munu syu ulabena sisyo.

⁸ Mańa uvi ilahila mummana gwa mwene ugwa pasi vi alabena lu luvejangiko mummana gwa mwene ugwa pasi mumwa, mańa uvi ilahila mwa Mepo vi alabena uvwumi vwa sikutsoni mwa Mepo mumwa.

⁹ Mańa aka kuvomba innonu kwu tulagatalaga, mańa tungave natujyeta pwu tulabena uvubene pamwaka gwamwene.

¹⁰ Mańa lino pwu pale apakuvombela innonu pwu tuvavombelage innonu voni avanu. Avene lweli uvwu tuli lwidiko lupamato lwene navo vwu tulutililage pakuvombela innonu.

¹¹ Mudegage uvutale utuvige utwu ndivavigye nikivoko kyango iki.

¹² Voni avanogilwe ukuvoneka uvunnonu ummana mumbele vuvule vwu vikuvumilitsa ukukegetwa vita upita mukegetwagwe ulwakuva vidwada ukuta ikidamiṅanye kya Kilisiti pange kivapelelage ukuswimwa.

¹³ Ndatetsaga pange avene avakegetwa ava vikutsikonga jilweli isimilitso. Bako vilonda ukuta nkegetwagwe uńe ulwakuva vita twiginyage itsa mumana gwińo avene.

¹⁴ Une nasikuli isinge isya kwiginyamwo. Bako ndikiginya ki kidamiṅanye kya Jesu Kilisiti unkuludeva vitu kyene, uvi nikilunga uńe kiswilye mumwene jujwa, uvi nuńe ikilunga ndikiswilye pakidamiṅanye mumwene jujwa.

¹⁵ Mańa ungave uli mwa Kilisiti vi munu pwu nukukegetwa nakali kanu kene, pwu nakwene ukutsilakukegetwa nakali kanu kene nakene. Bako kwu kuvuja ukupelwa kwene kwu kanu kako lweli.

¹⁶ Voni avigolohetsa ulugendo lwa vene nkigolohetso iki vwu vikava ulunotsehetso nilikungwava. Vivetsaga vi Isilaeli va Nguluve.

¹⁷ Pwu nujyunge alavujaga pakungatatsa. Mańa ndivigilwe isimańilo sya Jesu mummana mwane umu.

¹⁸ Uluhungu lwa nkuludeva vitu UJesu Kilisiti lwu luvetsage numwuja gwińo ńi vajitu. Ameni.