Galati 5 - UTESITAMENTI UMPYA

¹ Upwu atuvopolaga UKilisiti pwu atuvopolaga ukuta tuvetsage vavopolwa. Mwitotekage ndavujaga ndikungaga ikivegalilo kya vugulano.

² Lola une Pauli ndikuvavula ndita: Ngave mukegetwa pwu UKilisiti nikuvavumbulila kinu.

³ Uńe voni avikegetwa voni ndivuja ndikuvavula ndisimilitsa sitso ndita: Pwu humbe upita vatsimale tsoni isimilitso ukutsikonga.

⁴ Vwu pwu mwihumitse vuvule pa-Kilisiti pwu uvugolosu mwita tsikutupetsaga isimilitso. Vwu muhumile nduhungu umwu mwale.

⁵ Mańa ikututanga jyu Mepo upwu tukutsipulikila itsu tuhuvila, nditsova itsa kutsovwa uvugolosu uvuhuma ndwidiko.

⁶ Mańa ungave uli mwa Kilisiti pwu ukukegetwa nakukukupa kinu, nakwene ukutsilakukegetwa nakukukupa kinu. Bako lwu lwidiko lwene uluvomba imbombo tsa lugano lwu lweli.

⁷ Ukuńila mungelanilo kwu nkańila vunnonu. Veni avakilivwe atye mutsilage itsa jilweli?

⁸ Ulusongo uluvasongile lwu naluhumili kumwene uvi avilangile.

⁹ Ugwene unsabe upwu gungave ndebe vuvule gulutsa uvugale vwoni.

¹⁰ Uńe ndivamańye munkuludeva ukuta nandisagile itsinge. Bako ndivamańile ukuta mukisagila itsu ndikisagila nune. Umwene uvi ikuvatsagiliṅanya uńe vi kalambonaga aka kumbunga nupwu angave ali vi nongi untunga.

¹¹ Nuńe ńi vajitu apene upwu ndingave ndili nalino ndisimilitsa ukukegetwa ndita mukegetwagwe, pwu nda vaswimage avikunswima? Bako pwu ndili ikidamiṅanye kisilile ukuva kya kuvambutsa.

¹² Vangisulila ṅani avikuvahambulanya uńe.

¹³ Mańa ńi vajitu upwu mwilangilwe pwu mwilangilwe ukuta mbetsage vavopolwa. Mbandikage uvuvopolwa vwińo vulipelaga ukuva lulalo lwa kugendapwo ummana gwińo gwa mbivi. Lu lugano lwu luvasuṅage ukuta mbombelanile umwumbelye.

¹⁴ Mańa isimilitso tsoni umwutsivelye tsisilye nkameńu kapamato kene akita: Unganage unnino nduvwu vwiganile vimwene.

¹⁵ Ngave mutye nukulumana mutye nukulyana pwu mbandikage ndamalanaga.

¹⁶ Tsu ndikuvavula ndita: Ngendelage mwa Mepo pwu nandavombe itsu, vukuvasuṅa uvunogwe vwa mmana gwa mbivi.

¹⁷ Mańa ummana gwa mbivi nu-Mepo silekine ukunogwa. Nagwene ummana gwa mbivi gunogwa isya gwene, namwene UMepo inogwa isya mwene. Syu sihomine syu sivili vuvule-vule. Upita ndavombaga itsu munogwa ukuvomba.

¹⁸ Lola angave ipelile ukuva va kuvalongolela mbulongolo ju Mepo vwu nandi mmalunde musimilitso.

¹⁹ Mańa tsu tsili mbuvalasu imbombo tsa mmana gwa mbivi. Tsitye nitsa vuligu nitsa vulami nitsa vupumu uvuligu,

²⁰ nitsa kwipelela amanguluve agange nitsa vuhavi nitsa ngoso nitsa kulwa nu nnino nitsa ngila nitsa kuvinivwa nitsa kuhambuṅana nitsa kulekana nitsa kugilimbuka mumpelela nitsa kugigidana nitsa kubudana,

²¹ nitsa kwinegelela nitsa kusyota nitsinge itsili nda tsitsitsi. Tsu ndivavulye ṅani ndivuja ndikuvavulila ṅani ndita: Avivomba itsi vwu navalingile lusiku pavuhale vwa ludeva lwa Nguluve.

²² Mańa itsene iseke tsa Mepo tsu itsi: Tsitye nitsa lugano nitsa lusano nitsa lunotsehetso nitsa kuta “lya image” sikutsoni nitsa vutemesu nitsa vunnonu nitsa lwidiko nitsa vuhugu nitsa kwijumilitsa.

²³ Avene avali vuvule-vule vwu isimilitso natsihomana navo.

²⁴ Avene va ju Kilisiti vwu vagutovelye pakidamiṅanye ummana gwa vene gwa mbivi, vagutovelye luninye nuvunogwe nisya kunogwa.

²⁵ Vungave uvwumi vwitu tulila mwa Mepo pwu nakwene ukugenda kwitu upita tugendelage mwa Mepo.

²⁶ Upita tulipelaga ukuva vakunogwalwimiko ululi ludindule vuvule ulupela ningoso nukugigidana.