Galati 4 - UTESITAMENTI UMPYA

¹ Une ndita uva pavuhale vwu ndebe tango pwu najujwa nungulano valiṅanile vwu vavili navalekeṅini napadebe napene upwu vi mwenenasyo syoni isyuma umwene.

² Bako namwene tango iva mmalunde nambasugili nambaloleli ukutsisika pamwaka ugwu asimilihitse ṅani udadaje.

³ Nuvwe vwu twagahile: Upwu twale vadebe pwu twalevile kundebe tsa kilunga iki.

⁴ Lola umwaka vwu gwitsile pwu Unguluve akansuṅa unswambe uvi aholilwe kundala uvi alevaga kusimilitso.

⁵ Voni avale mmalunde musimilitso pwu ukuta avavangage, nuvwe pwu ukuta tuvuvone uvwana.

⁶ Lino upwu ndi vana pwu Unguluve avasuṅye UMepo va nswambe munumbula tsińo, vi ikuta ita: Aba, kwu kuta dada.

⁷ Pwu uvugulwa vusilile lino vi munu. Bako uli mwana. Apene ungave uli mwana vwu pwu vwipelile ukuva va kwingila pavuhale vwa Nguluve vwu ikukwingitsa Unguluve.

⁸ Napene upwu namummańili Unguluve pwu nkagavombela amanguluve ugwu nagali kinu, manguluve gene.

⁹ Lino upwu mummańile Unguluve, upwu avamańile uńe Unguluve nditetsage, pwu nda mbuje nkilivuke kundebe tsilya indeke imbivi tsilya? Tsu nda mbuje ntsivombele?

¹⁰ Muhalile mutye namatsuva mutye nimyetsi iginge mutye namavalatse ga mmwaka mutye nimyaka imivaha.

¹¹ Ndidwada imbombo itsu ndigimbile pańye ndita pange ndigatitse pavuvule.

¹² Nditekelesa kwańe ńi vajitu ndita mwipelage ukuva ndune nduvwu nuńe ndipelile ukuva nduńe. Mańa namungalagadiki itsinge uńe.

¹³ Ndumańile nuńe ukuta ululongotsi lulya ndivavulage ilivangili pwu vwumilitse vwu vudekedeke vwa mmana.

¹⁴ Ndumańile nalwene ulwambutso ulwu gwavambutsaga uńe ummana gwango. Mańa nkaleka ukungilila nukumbehela namati uńe. Bako nkanupilila ukuta ndili nsuṅwa va Nguluve, ukuta ndili Kilisiti Jesu.

¹⁵ Lwale lwu lugataluko luki ulwu mwale vandugataluko palya! Mańa ndilumańile: Singave syidikaga pwu ndili musulile amiho gińo ndili mumye une.

¹⁶ Pwu nda ndipelile ukuva ntavangwa vińo lino ulwakuva ndivavulile itsa jilweli?

¹⁷ Vigimba uvugane kwańe avene mańa navigimba vunnonu. Bako vilonda ukuvavinga ukuta ngimbage uvugane kuvene.

¹⁸ Ukwene ukugimba uvugane kwu kunnonu sikutsoni ngave mugimba uvugane kumunu munongwa innonu, ngave namugimba pene upwu ndilikwo kwańe kukwa.

¹⁹ Ńi vana vango ndivujile ndikuvahola sikutsoni nuluvavo nditsisika upwu UKilisiti avumbwike mwańe.

²⁰ Ndingave ndavetsaga pane baho lino! Pwu ndili ilimeńu lyango likwanduka vuvule mańa ndijegime une.

²¹ Mumbule ńi mwita tuvetsaga mmalunde musimilitso uvwe. Nda isimilitso nampuliki itsitsova?

²² Mańa livigilwe mumwa ilita: Abulahamu ale navaswambe vavili. Ujyunge ale va mmasiga ujyunge ale va mundavitsi.

²³ Lola uva va mmasiga vi aholilwe lulwa mummana vuvule. Umwene uva mundavitsi vi aholilwe lulwa lwidiṅano.

²⁴ Tsu ndihwanihitsa vuvule. Mańa vwu vatesitamenti vwu vavili ava. Ujyunge uva pakidugala Sinai, vi ihola va vagulano vene. Vi ju Hagali.

²⁵ Lola UHagali kyu kidugala Sinai mu-Alabija. Kililukinde lupamato lwene nu-Jelulsalemu va lino. Mańa namwene ipelile ukuva ngulano luninye navana va mwene.

²⁶ Mańa umwene UJelusalemu uva kukyańa vi ju ndavitsi, vi jyuva twivoni umwene.

²⁷ Mańa livigilwe ilita: Hekelaga vi ngumba vi navwihola, kelaga ululutile vi navwihola nuluvavo, mańa vongosu avańa va minza, vavalutile ava uvi ategwe kungosi.

²⁸ Uńe ńi vajitu mukongile lulwa Isikaka, ndi vana va lwidiṅano.

²⁹ Mańa itsa lino tsili nditsa katale. Mańa nalino uvi aholilwe kumana vuvule ikunswima uvi aholilwe kwa Mepo.

³⁰ Kalata ikutuvula kiki? Ita: Unswime uva mmasiga nunswambe vamwene, mańa uva mmasiga navikwingilanila pavuhale.

³¹ Pwu ńi vajitu uvwe natuli vana va mmasiga. Bako tuli vana va mundavitsi.