Galati 3 - UTESITAMENTI UMPYA

¹ Ńi va-Galati ńi vatsilaluhala uńe veni uvi avahavye? Mańa kwu kuva twavavigye ikihwani kya Jesu Kilisiti ukuta mumbone namiho gińo untovelelwa pakidamiṅanye vuvule.

² Tsu ndita ndipulikage kwańe tsene tsitsitsi: upwu mwamwupililaga UMepo umbalatse pwu nda humile mumbombo itsu mwavombaga mu similitso, pange nda humile mu itsu mwapulikaga itsa lwidiko?

³ Vwu nda mugahile uvutsilaluhala? Itsu ntengwe mwa Mepo tswu lino pange nda mumalisa ukuta tsa mmana?

⁴ Tsoni itsavitsilaga tsu pange nda tsavitsye pavuvule? Upwu tsingave tsavitsilaga pavuvule.

⁵ Umwene uvi ikuvapa nu-Mepo, uvi ipela nisipelwa sya maka mwane umwu umwene upwu ipela pwu nda sihuma mumbombo itsu mbombile itsa kukonga musimilitso? Pange nda sihuma mu itsu mupulika itsa lwidiko?

⁶ Tsili nditsa Abulahamu. Umwene akidika kwa Nguluve pwu umwene Unguluve akata: Kwu kuva vwu vugolosu ulwidiko lwa mwene.

⁷ Lola avene avidike vwu vana va Abulahamu.

⁸ Ulwakuva kalata ammańye ṅani Unguluve ukuta avapanzi ikuvatsova uvugolosu vangave vidike, pwu akambulila ṅani katale inongwa innonu tsitsitsi akata: syoni isivumbuko sya vapanzi silasajilwagwa mwave.

⁹ Pwu voni avidike vwu valatsovelwa luninye nu-Abulahamu umwidiki.

¹⁰ Mańa voni avimile mumbombo tsa musimilitso vwu va ndukoto. Mańa livigilwe ilita: Vakotolilwe voni uvwu naviva mu tsoni itsivigilwe mwa kalata va similitso uvwu navikutsikonga.

¹¹ Itsene tsu tsili pavuvalasu itsu ndita kwa Nguluve nujyunge umunu nitsovwa uvugolosu uvi ikonga vuvule musimilitso. Mańa umwene ita: Uvi vungave uvugolosu vwa mwene vuhumile ndwidiko vi iva kuvwumi.

¹² Itsene isimilitso natsyitotiki ndwidiko. Bako itsene tsita: Uvi ikutsikonga vi tsikumpa uvwumi.

¹³ Umwene Ukilisiti atuvangile kulukoto lwa similitso upwu ipelaga ukuva lukoto lwa kutupoka uvwe. Mańa livigilwe ilita: Voni avitumbila pakibiki vwu vakotolivwa.

¹⁴ Tsu avombaga ukuta ulusajo lwa Abulahamu luvitsilage navene navapanzi mwa Kilisiti Jesu, nuńye ukuta UMepo uvi atye ikwitsa nuvwe ukuta tuntolelage lu lwidiko.

¹⁵ Ńi vajitu lino nditsovela umwu vitsovela avanu. Ndita UTesitamenti va mumu, umwu ilagilila itsa kulagila, vangave vamwidikye ava kumwidikila pwu ujyunge nikwongeletsa akange.

¹⁶ Itsene ińidiṅano tsu Unguluve vidiṅine nave nu-Abulahamu nimbeju jamwene. Mańa upwu itsova umwene pwu nita: Mumbeju ńongosu. Bako itsova lupamato lwene ita: Ndubeju lwako, ikuntsova ju Kilisiti.

¹⁷ Une ndita: Isimilitso itsikongile pambele imyaka vamia vani nimilevulo gidatu pakyańa (430), tsu natsikunjatsa. UTesitamenti uvi ikuntsova UKilisiti uvi Unguluve amwidikye katale natsikilivula ulwidiṅano,

¹⁸ Mańa tsingave tsatwingitsaga isimilitso pavuhale pwu ndili ulwidiṅano nalukutwingitsa. Umwene Unguluve ankungye vuvule Abulahamu uvuhale, ankungye mundwidiṅano.

¹⁹ Itsene isimilitso tsukiki? Tsu tsipyanye pakyańa ulwakuva imeno pwutsile. Tsale tsa kuvapwo vwu lukanale ulubeju ulwenelwidiṅano. Itsene isimilitso tsu vimike avasuṅwa va Nguluve, vimike ki kivoko kya ndamuli.

²⁰ Umwene undamuli niva va mpamato mwene. Mańa umwene Unguluve vi ali mpamato mwene.

²¹ Ndeti, isimilitso nda tsikutsikilivula pange ińidiṅano tsa Nguluve? Kwu bako! Mańa tsingave tsavetsaga itsinge isimilitso itsipele uvwumi, pwu ndili uvugolosu vwihuma lweli musimilitso.

²² Mańa umwene kalata syoni asidindye mumbutulanongwa, isya lwidiṅano pwu ukuta sihumage mundwidiko lwa kumwidikila UJesu Kilisiti, sitsage kuvoni avikumwidika.

²³ Ulwene ulwidiko vwu tango lukanale ukwitsa pwu twadindililwe musimilitso itsatulesitse, tukalolelwa tukatsisika upwu luvonekage ulwidiko ulwambele.

²⁴ Pwu isimilitso tsipelile ukuva mbungavana tsa kutuvungila kwa Kilisiti, twivoni uvugolosu uvwu tutsovwa ukuta vwu vuhumage ndwidiko.

²⁵ Lino upwu lwitsile ulwidiko pwu tuhumile mmalunde mumbuvungavana.

²⁶ Ulwakuva ńivoni ulwidiko ulwu mumwidikye UKilisiti Jesu luvapelile ukuva vana va Nguluve.

²⁷ Mańa ńivoni ńi mwotsivwe mwa Kilisiti ńivoni munswalile UKilisiti.

²⁸ Nakuli apa nujyunge nun-Juta nun-Giliki, nakuli nujyunge ungulano nuvi avopwike, nakuli nujyunge nungosi nundala. Mańa ńivoni umwumbelye mwipelile ukuva mpamato mwene mwa Kilisiti Jesu.

²⁹ Apene ngave ndi va Kilisiti pwu ndi mbeju jya Abulahamu, ndi vakwingilapwo pavuhale nduvwu lyatsovilwe.