Galati 2 - UTESITAMENTI UMPYA

¹ Ulwambele vwu ndigonile imyaka kitsigo nagini pakyańa pwu ndikavuja ndikatoga ukubiha mu-Jelusalemu. Tukatoga twivoni nu-Balinaba. Namwene nu-Titi ndikava nave.

² Ukumbula ukuta bihaga kwu lwambulile lu luvoneko. Pwu ndikatsikuvaliṅanya ilivangili ilyu ndisimilitsa mbapanzi. Avene avitsovwa uvuvaha vwu ndikavalinanya vwu twijekye navo ulwakuva ndikata vwu vamańage ndingave pange ndigimba pavuvule, ndingave pange ndagimbile pavuvule katale.

³ Bako ndikatsivona naju Titi, uvi ndale nave un-Giliki, ndikatsivona navikumwumilitsa ukuta akegetwagwe.

⁴ Avene avatupelelaga tsitsitsi vwu vakilisiti va vunwasi avingye mumpelela. Vwu vakagwengwela pakwingila ukutandila uvuvopolwa uvwu tuvopwike mwa Kilisiti Jesu ukuta vatulesage.

⁵ Vwu tukabela nukuvidika napadebe ulwakuta pange tulevage kuvene, ulwakuva tukata uvwajilweli vwa livangili vuvetsage vwińo sikutsoni.

⁶ Avene avitsovwa ukuva vavaha vwu navańongelitsi itsinge itsa kwumilitsa. Uvwene uvuvaha vwa vene uvwu vale navwo katale ukuta vwale vutunga vutunga vwu untima nagulikwo uńe. Mańa Unguluve nikuvahalila mbunnonu kumiho avanu.

⁷ Bako avene vakambona une ukuta imbombo itsa kuvavula ilivangili avatsilakukegetwa tsango nduvwu natsene itsa kuvavula avakegetwa tsa Petele.

⁸ Ulwakuva umwene uvi ampetsaga amaka ga vwapositili vwa mba-Juta UPetele vi amye nuńe amaka gaga ga vwapositili vwa mbapanzi

⁹ Vwu vavwene uluhungu ulwu amye umwene pwu voni nu-Jakobu nu-Kepa nu-Johani, avapulikike ukuva syu sikotsi, pwu tukibatana navo ikivoko ikyandyo kya vumańani nuńe nu-Balinaba tukidiṅana ilyakuta uvwe tuvetsaga mumbapanzi avene mumbakegetwa.

¹⁰ Tsitsa kuvakumbuhitsa avagatsu uvwe tsu tukalagana tsene. Itsene tsu ndigimbaga sikutsoni ukuvomba.

¹¹ Umwene UKepa vwu itsile mu-Antyokija umwu twale pwu tukalolana nave mmiho ndikamiga ulwakuva ndivwene pwutsile inongwa umwene.

¹² Ulwakuva vwu vakanale ukutsisika avanine ukwu twale avahumaga kwa Jakobu pwu isinu akalya navapanzi. Lola vwu vavonike avene pwu akikwega akabela ukuhanga navo ulwakuva avadwadile ava mbukegetwa.

¹³ Pwu navange avahumambu-Juta voni vakanwaṅila luninye nave. Pwu vakamwambutsa namwene nu-Balinaba nuvunwasi vwa vene.

¹⁴ Uńe vwu ndivavwene navagolwisi panzila ingolosu jya nongwa tsa jilweli tsa livangili pwu ndikatsova nave UKepa vwu vipulika voni ndikata: Ungave uve vi uli n-Juta pakivumbuko ungave vukonga lu lwa vapanzi ungave ululekile ulwa va-Juta, pwu vukuvumilitsa kiki avapanzi vwita mukonge ulwa va-Juta?

¹⁵ Mańa uvwe tuli va-Juta pakivumbuko natuli vatulanongwa avahuma-mbapanzi.

¹⁶ Mańa tulumańile jilweli ukuta uvugolosu nujyunge umunu nitsovelamwo mumbombo tsa mwene itsu avombile itsa kukonga musimilitso. Ndita tulumańile ukuta voni vitsovwa vwene vwu vwa palwidiko lwa kumwidikila UKilisiti Jesu. Pwu nuvwe tumwidike UKilisiti Jesu tukata pwu nuvwe tutsovwagwa uvugolosu uvuhuma-ndwidiko lwa kumwidikila UKilisiti, kwu bako uvuhuma-mumbombo tsa musimilitso. Mańa imbombo tsa musimilitso natsikunkavila ujyunge umunu uvugolosu.

¹⁷ Apene tungave uvwe twi tulonda ukutsovelwa mwa Kilisiti uvugolosu, vangave vivona tuli vatulanongwa nuvwe, vwu pwu humbe UKilisiti nda ipelile ukuva va kuvuvujilo uvutulanongwa namwene? Kwu bako.

¹⁸ Mańa ndingave itsu ndamamwe ndivuja nditsenga pwu ndidikye baho ukuta ndajagile.

¹⁹ Mańa uńe isimilitso tsimelile ukuva nswe vuvule kusimilitso ulwakuva tsatetsaga ndipelage ukuva mwumi mwa Nguluve. Nditovelilwe luninye nu-Kilisiti pakidamiṅanye.

²⁰ Pwu kwu kuva ndilekile ukuva vi uńe ndili mwumi lino. Bako mwumi ju Kilisiti mwitumbu mwane. Mańa ulwu ndili mwumi ummana gwa pasi ugu lino lwu ndili mwumi lu lwidiko lwa kumwidikila unswambe va Nguluve uvi atye nukungana atye nukunswila une.

²¹ Pwu nandikulutaga uluhugu lwa Nguluve Mańa vungave uvugolosu vuhuma musimilitso pwu UKilisiti aswe pavuvule.