Galati 1 - UTESITAMENTI UMPYA

¹ Nene Pauli ndili mwapositili, ndi nukuńilanga navańilangili avanu, ndi nukuńingitsa navanińgitsi avanu, ndi ańingitse ju Jesu Kilisiti naju Nguluve udadaje uvi antsusaga mbaswe umwene.

² Ndikuvapembetsa ńi va mmipelela gya mu-Galatija. Navakilisiti voni uvwu ndili navo apa vwu vikuvapembetsa.

³ Uluhungu luve nuńe nulunotsehetso ulwihuma kwa Nguluve udadaje nakwa Jesu Kilisiti untwa vitu,

⁴ uvi ihilikaga upwu atuswilaga pavutulanongwa vwitu ukuta atupoke atuhumye mmwaka gwa lino umbivi ugu nduvwu anogelilwe ṅani Unguluve udadajitu twivoni,

⁵ uvi upita tumpetsage uvuvaha sikutsoni. Ameni.

⁶ Ndidega vuvule upwu ndivwene vwu ngahile vuvule-vule namuhavili ukundeka uvi avilangye nduhungu lwa Kilisiti ndotsitse mwivangili ilinge.

⁷ Mańa ndatetsaga linge jilweli. Bako pene upwu pwuvale avange avita tuvatsagiliṅanye uńe, avita tulikilivule ilivangili lya Kilisiti.

⁸ Bako nupwu twavetsaga uvwe tungave twatetsaga tulileke ilivangili ilyu tuvavulile, tungave twatetsaga tuvavule ilinge, pwu ndili tuli va kukotolivwa kukujatsivwa. Nupwu angave avetsaga unsuṅwa va kukyańa angave atetsaga ndilutage ilivangili ilyu tuvavulile uvwe angave atetsaga ndivavule ilinge pwu namwene avetsaga va kukotolivwa kukujatsivwa.

⁹ Nduvwu nditsovile lino lyu ndivuja ndita angave ujyunge atetsaga ndilute ilivangili ilyu mwupilye ndivavule ilinge vi va kukotolivwa kukujatsivwa.

¹⁰ Nda ndita ndikavage lino uvugane kuvanu, nda ndita ndikavage kwa Nguluve–ndeti? Nda ndita ndivakelage avanu pange? Mańa ndingave ndatetsaga ndivakelage avanu tango lino, pwu ndili nandiva nkivaga va Kilisiti.

¹¹ Mańa ndikuvavula ńi vajitu ndita: Ilivangili ilyu ndisimilitsa sikutsoni ndatetsaga pange agwe umunu.

¹² Nuńe ukuma kwu ndatetsaga amye pange umunu, nukumańisa kwu namańis nujyunge umunu. Bako ambonehitse jyu Jesu Kilisiti.

¹³ Mańa nuńe mpulike ndita umwu ndale vwu ndili n-Juta vuvule ukuta ndili nongi une. Ulwu ndikalutilila pakuguswima umpelela gwa Nguluve ndikaguvejanga.

¹⁴ Ndikongeletsa sitso pakwipela ukuva n-Juta vuvule ndikavaluta navajyango vongosu nkivumbuko kitu uvwu twaliṅine nuńe ukukula. Ndikalutilila pakutsivipila indagilo itsu vatulagye avatengutsi vitu, ndikalutilila pakutsimika itsene.

¹⁵ Mańa Unguluve ańalye ṅani vwu tango ndili mwitumbu mwa jyuva. Akańilanga nduhungu lwa mwene,

¹⁶ vwu anogilwe mwene ukumbonya nuńe mwitumbu mwane unswambe ukuta nditsisimilitsage inongwa tsa mwene innonu mbapanzi. Pwu ndikaleka ukumbutsa nujyunge umunu uva mmana nunkisa.

¹⁷ Namu-Jelusalemu mwu ndikaleka ukubiha nkuvalola avalongwe mbulongolo mwane mbwapositili. Bako nandahave ukubiha mu-Alabija. Pwu ndikatsivuja ndikabiha mu-Ndamasika.

¹⁸ Ulwambele vwu ndigonile imyaka gidatu pwu ndikabiha mu-Jelusalemu ndikata ndikammańe UPetele. Ndikagona nave ijuma ivili.

¹⁹ Avange avapositili umwu vavelye ndikaleka ukwaganila nave ujyunge mmiho. Mwene jyu Jakobu ulukololwe va ntwa vi ndikaganila nave mmiho.

²⁰ Itsene itsu ndikuvavigila, mańa nupwu Unguluve ikundola nanditsova itsa vunwasi.

²¹ Ulwambele pwu ndikabiha nsilunga sya mu-Silija nikya mu-Kilikija.

²² Avene ava mmipelela gya vakilisiti gya mu-Jutai vwu navamańili mmiho une.

²³ Kwu kupulika kwene kwu vapulike ukuta uvi atuswimaga katale vi lino ikutsisimilitsa inongwa innonu tsa lwidiko ulwu avejangaga katale.

²⁴ Pwu vakanginya Unguluve panongwa tsango.