2 Timoti 4 - UTESITAMENTI UMPYA

¹ Ndisimilitsa sitso pakukuvulila kumiho kwa Nguluve nakwa Kilisiti Jesu uvi alavahiga navumi navaswe ndita: Mańa upwu alavoneka nupwu alipela ukuva nkuludeva umwene,

² tsovaga ilimeńu, imaga nalyo sikutsoni nupwu pangave paliṅanike nupwu pangave napaliṅaniki, uvaleme uvavunge uvahusanye. Pakuvahusanya pwu uhanzanyage nukutedesa nukuvavula inongwa tsoni.

³ Mańa gukwitsa umwaka pwu ulumańiso lwa nongwa ińumi pwu valata lukanale, lwu bako uvwe, pwu valakonga mbunogwe vwa vene pakwilondela ikipuga kya vamańisi vwu vavwene muńegela mumbulukutu tsa vene.

⁴ Imbulukutu tsa vene valatsivusa kunongwa tsa jilweli vatsilotse kututsago.

⁵ Uve itsinge tsilakugatatsaga. Kwu bako ukuvudwada uvukuvilwa. Vombaga imbombo tsa ntsova-ilivangili. Malisa itsa vuteketsi vwako.

⁶ Mańa une ndiva pakududwa lino ukuta nekelo. Ilitsuva lya kulutila une lisike.

⁷ Ndilwe iligoha ilinnonu. Ndimalile ukuńila ndugelanilo. Ndilubadime ulwidiko.

⁸ Pwu lino ambikye uludiṅulilo lwa pavugolosu ulwu alama unkuludeva palitsuva lilya uvi ihigila mbugolosu. Nalame une ndimwene, bako alavapa voni avakuganile ukuvoneka kwa mwene ukwu alavonekaga.

⁹ Ulahavaga, vwitsage kwane kunu ṅani-ṅani.

¹⁰ Mańa nu-Ndema andekile ulwakuva akiganile ikilunga iki, alutile mu-Tesaloniki. UKilesensi abye mu-Galatija, UTiti abye mu-Ndalimatija.

¹¹ Asigye ju Luka mwene pane apa. Untole nu-Malika vwu vukwitsa vwitsage nave. Mańa ikunanga sitso pambombo tsane.

¹² UTikika ndinsuṅile mu-Epesi.

¹³ Ikilundwa kyango ikyu ndakilekile mu-Tiloja pa-Kalipu ugege vwu vukwitsa navakalata. Igyene imipupa gyu ndilonda sitso.

¹⁴ Alekandeli umponzi vi amelye imbivi ńongosu. Alambujitsa unkuludeva alavika baho pambombo tsa mwene.

¹⁵ Vi uvandikage nuve, mańa atsisulile sitso inongwa tsitu.

¹⁶ Ululongotsi ulwu ndihigilage inongwa tsango, pwu akaleka ukuvakwo nujyunge, vandekile voni. Unguluve alavatsigilaga.

¹⁷ Mańa unkuludeva akava nune akandulusa upwu akata ndimalihitsage ukulitsova ilivangili ukuta voni avapanzi vapulikage, pwu ndikapona mundomo muńalupala.

¹⁸ Nukumoka alamoka unkuludeva kumbivi tsoni itsu vikumelela, alańingitsa ndudeva lwa mwene kukyańa. Vi ndikumpa uvuvaha nakuvutsilakusila lusiku.

¹⁹ Umpembehetsage nu-Pilisika nu-Akwila nińumba jyoni jya Onesipoli.

²⁰ Elasiti avujile mu-Kolinti. UTilopimu vi ndandekile atamilwe mu-Mileti.

²¹ Ugendelelage vwitsage vwu gakanale amapepo. Vikukupembetsa nu-Ibuli nu-Pudensi nu-Kilautija nava-kilisiti avajitu voni.

²² Unkuludeva avetsage numwuja gwako. Uluhungu luvetsage nuve!