2 Timoti 3 - UTESITAMENTI UMPYA

¹ Tsu utsimańile tsitsitsi ukuta mmatsuva ga kunepo pwu gilitsa imyaka imitalamu.

² Mańa pwu valavapwo avanu avikigana vene navaganandalama navikiginya vene navańalwiginyo navadukamadusi navikuvila avahotsi va vene nuvwu navisana navatsilavuvalatse

³ navatsilavumańani navatsilakutetelanila navihendama nuvwu navikijumilitsa uvunogwe navatalamu nuvwu navatsiganili innonu

⁴ navavulili navatsilakwiliṅanya vunnonu nuvwu ulwiginyo luvapelye ukubosola navalutilye ukuvugana uvunogwe vavuvikile mbulongolo nakwa Nguluve.

⁵ Avene mumbele viva nda vikundwada Unguluve, mańa upwu uludwado ulwita muvombe isinge mwitumbu mbene, pwu vibela. Vwu uvatumbage ava.

⁶ Vajyavo avikijingihitsa lwu luhala nńumba tsa vanu, pwu vavateke avadala avilundikye uvutulanongwa uvwongosu uvukuvagendetsa uvunogwe vwongosu.

⁷ Avene kwu vimańisivwa sikutsoni inongwa, mańa navisika lusiku pakuvumańa uvwajilweli.

⁸ Nduvwu nava-Janesi nu-Jambulesi valwitsaga nu-Mose vwu vagahile ava, navene vilwa nuvwajilweli.

⁹ Navalavale mańa voni avanu valavavona pavuvalasu uvutsimu nduvwu vwavonike nuvwa valya.

¹⁰ Uve uṅongile nulwa kutsova inongwa nulwa kugendela ulugendo nulwa kwiliṅanihitsa ṅani nulwidiko nukutsilakuvipa ṅaniṅani nulugano nukusihaluvipo nukuswimwa nukukuvilwa nulwu ndikakuvilwa mu-Antyokija namu-Ikoni namu-Lisitila.

¹¹ Uvumańile vwoni uvuswimo uvwu ndatwikilwe. Mańa vwoni amokile unkuludeva.

¹² Mańa voni avita tuve mwa Kilisiti Jesu twi vadwada-Unguluve vwu viswimwagwa.

¹³ Mańa avanu avavivi navateki vwu vikwongeletsa ukuvejanga vitetsaga nukuvalusa avange nukulusivwa.

¹⁴ Mańa uve ulinde mu itsu umańisivwe namu itsu utsivwene, mańa uvamańile avakumańise.

¹⁵ Vwimańile nuve ukuta uhumile mbudebe ukuvamańa avakalata avavalatse avalumańile ukukupa uluhala ululotsa kuvupoki ungave umwidike UKilisiti Jesu.

¹⁶ Mańa voni avakalata uvwu apulye UMepo va Nguluve valumańile ukukutanga pakutsitsova inongwa napakutsilema imbivi napakungolosa umunu napakumbunga uluhala lwa vugolosu.

¹⁷ Umunu va Nguluve pwu ukuta ave nduti uvunnonu, ave nsavulwa tsoni imbombo innonu.