2 Timoti 2 - UTESITAMENTI UMPYA

¹ Uve vi mwana vango dulukaga nduhungu ululi mwa Kilisiti Jesu.

² Tsoni itsu upulike kwane vwu vipulika avange avongosu tsu uvapetsage avanu avahuvili avalumańile ukuvamańisa avange.

³ Nuve uńupile uvukuvilwa, uvoneke ukuva vi ńaligoha lya Kilisiti Jesu.

⁴ Nujyunge uńaligoha nikigatatsa utunongwa twa kukavila isinu upwu ita ndive nnonu kundongotsi va ligoha.

⁵ Uvi ilwa ndugelanilo nikava uludiṅulilo angave alekile ukukonga musimilitso tsa lugelanilo upwu ilwa.

⁶ Mańa undimi uvi ilima ungunda vi upita alongole jujwa ukulya iseke tsa ngunda.

⁷ Vika vunnonu itsu ndikukuvula, unkuludeva ikukupa uluhala ulwa kutsivona tsoni.

⁸ Unkumbuhitse sikutsoni UJesu Kilisiti uvi atsukile mbaswe uva mumbeju jya Ndaviti, nduvwu likuntsova ilivangili ilyu ndisimilitsa.

⁹ Ilimelye ukukuvilwa, lisike nuńe namundegehe itsu ndikungilwe ukuta ndili mpelambivi. Itsene inongwa tsa Nguluve tsu natsikungilwi.

¹⁰ Pwu ndisiha uluvipo upwu ndikuvisagila uvwu avahalile Unguluve, upwu ndita navene vasikage kuvupoki uvwu atupokile UKilisiti Jesu nakuvuvaha uvutsilakusila lusiku.

¹¹ Lyu lya kulihuvilila ilimeńu ilita: Tungave tuswila luninye nave, pwu tuvela kuvwumi luninye nave.

¹² Tungave nuvwe twisiha uluvipo pwu nuvwe tukwipelela ukuva vakuludeva luninye nave. Tungave tukundegukila pwu alatulegukila nuvwe.

¹³ Apene nupwu tungave tutaga uluhuvilo, pwu iva muvili sikutsoni umwene. Ulwakuva umwene nalumańili ukwileja.

¹⁴ Tsu uvakumbuhitsage tsitsitsi usimilitsage sitso kumiho kwa Nguluve uvavule valakaniṅanaga ulukani, ulwu nalukuvavumbulila kinu, ulukuvavejanga avipulihitsa.

¹⁵ Ugimbage ukuta Unguluve akuvone ukuva va kwitoteka, akuvone ukuva vi mbombi vi ntsilakuva nisoni pambombo tsako, akuvone nukugolosa pakugavanya ilimeńu lya jilweli avanu.

¹⁶ Vwilekelwagwe imwato tsa vutsimu itsili tsa vuvule. Mańa avatsiganile vwu vikwongeletsa pakungilimbuka Unguluve.

¹⁷ Ilimeńu lya vene lihamba ukuta kilaho kya kitego, nduvwu vale va-Himenaji nu-Pileti.

¹⁸ Avajagile panongwa tsa jilweli vita ukutsuka kwu tutsukile, pwu vikulujatsa ulwidiko lwa vange.

¹⁹ Ulwene ulwalo lwa Nguluve uludulusu lwu lwimile nalujuganika luli nikimańilo ikita: Unkuludeva avamańile ava mwene, nikita: Voni avikulitambula ilitavwa lya nkuludeva vadandamale kumbivi.

²⁰ Nńumba imbaha mwu nasilimwo syene isihava sya sahabu nisya pesa. Bako mwusili nisya sibiki nisya lumundya. Isinge sili sya mbombo innonu, isinge sya mbombo imbivi.

²¹ Uvi ivalitse ntunu utwu ndatsovaga vi ikipela ukuva kihava kya kwimikivwa, ikipela ukuva kihava ikivalatse ikyu ivombela umwenenakyo, ikinogye pambombo tsoni innonu.

²² Uvukimbilage uvunogwe vwa mbudebe, ugimbage nuvugolosu nulwidiko nulugano nulunotsehetso, mwu uhange navo voni avikisaja kunkuludeva ninumbula imbalatse.

²³ Vwikwege kuṅani tsoni tsa vutsimu itsa mbudebe, utsimańage ukuta tsihola li ligoha.

²⁴ Mańa unkivaga va nkuludeva upita alalwitsaga. Bako upita ave ndekedeke kuvanu voni, upita alumańage ukumaṅisa inongwa nukusiha uluvipo mumbivi tsoni itsu vikumpelela avanu.

²⁵ Avikwila upita avavunge uluhala undekedeke, mańa ńage pange Unguluve avape ulukilivuko vavumańe uvwajilweli.

²⁶ Pwu valeke ukugala uvugimbi vwa mendami, vapone nkipindo kya mwene ikyu avibite, pwu vavombe itsu anogilwe Unguluve.