2 Timoti 1 - UTESITAMENTI UMPYA

¹ Nene Pauli ndili mwapositili va Kilisiti Jesu ndi ańingitse Unguluve upwu anogilwe jujwa ukuta ndisimilitsage uvwumi uvuli mwa Kilisiti Jesu.

² Ndikukuvigila vi Timoti vi mwana vango vi ngane. Ndikukupembetsa ndita: Unguluve udadaje nu-Kilisiti Jesu unkuludeva vitu vi akusajage nuluhungu nikisa nulunotsehetso.

³ Ndisana kwa Nguluve uvi nditengwe mbatengutsi vango sikutsoni ndikumbombela ndi va ńivonelo imbalatse. Umelye ukusana uve sikutsoni upwu ndikukukumbuhitsa vwu ndikisaja napamuńi napakilo.

⁴ Pwu ndisukwa sitso kwave upwu ndikumbuhitsa ulwihotsi lwako. Ndita pwu ndili lwidiga uluhekelo uńe tungave twaganilaga.

⁵ Mańa ndivwene isinge siṅumbuhitse ulwidiko lwako ulwu uli nalwo ulutsilavulyasinu nuvunge ulwatengwe lwatsengile uvutsenge namwapapajo mwa Loi na mwavańoko Inike lwatsengile uvutsenge mwave.

⁶ Lwu ulwu nditye ndikukumbuhitse usukulage kivikage ikikungilwa kya Nguluve ikyu vwupilye upwu ndikuvike amavoko.

⁷ Mańa UMepo uvi atupye Unguluve vi niva valudwado. Bako va maka, va lugano, va lwijumilitso umwene.

⁸ Pwu ulavetsaga nisoni ukuntsova unkuludeva vitu, nakwane ndi nkunge va mwene ulavetsaga nisoni. Bako tukuvilwagwe twivoni nuńe panongwa tsa livangili, ugelage upwu akupye amaka Unguluve.

⁹ Uvi atupokile atwilangile nulwilango uluvalatse ulwu naluli lwa kutuhomba imbombo itsinge itsu twavombile. Bako ulwu akongaga mwu itsu isagye ṅani jujwa nduhungu lwa mwene ulwu atupelye ṅani mwa Kilisiti Jesu vwu kikanale ikilunga.

¹⁰ Nditsova ulwu lino pwu luvonekye luninye numpoki vitu UKilisiti Jesu, uvi ajatsitse uvuswe, avuvikile pavuvalasu nuvwumi uvutsilakuvola upwu lipulikike ilivangili.

¹¹ Nditsova ilyu nune amelye nuvugegandomo nuvwapositili nukamańisa-avapanzi.

¹² Tsu itsi ndikuvilwa lino kwu nandiva nisoni, mańa ndimmańile uvi ndimwidike ukuta vi nongi. Ndikummuvila ukuta akanu kango ukwu ndipevilwe mmavoko alakuvatila alasika nako palitsuva lilya.

¹³ Kwu kavye kanu ka kulolelamwo uve amameńu amumi ugwu upulike kwane vwu uli ndwidiko nandugano lwa kuva mwa Kilisiti Jesu.

¹⁴ Nakanu akannonu sitso ukwu ndikupelye mmavoko kwu ukuvatililage mmaka ga Mepo, uvi atsengile uvutsenge mwavwe ngati.

¹⁵ Uvamańile voni ava mu-Asija vatumbile uńe, avali nava-Pigeli nu-Helemogeni.

¹⁶ Unkuludeva ansaje nikisa kya mwene Onesipoli navana va mwene voni, mańa angatalwise kavili-kavili munumbula jyango, nagwene unńololo gwango nali nisoni.

¹⁷ Bako vwu asike mu-Loma pwu nahavili andondile ambwene.

¹⁸ Unkuludeva ansaje ukuta akivone ikisa kya nkuludeva palitsuva lilya. Itsene imbombo itsu avombile mu-Epesi tsu ulutile uve ukutsimańa tsoni.