1 Timoti 6 - UTESITAMENTI UMPYA

¹ Voni avagulano avakungilwe vwu upita vavamańage avenenavo ukuta vanogye ukuvimika. Nilitavwa lya Nguluve ninongwa itsu tukuvamańisa pwu ukuta tsilahovelwagwa.

² Vangave avenenavo vakilisiti pwu upita valavagililaga valatetsaga mańa tuli vanamunu. Bako vwu upita valutililage pakuvavombela sitso, vatetsage ulwakuva vakilisiti navene ulwakuva tuvaganile. Mańa navene vigimba tsinnonu itsu vikuvavombela. Tsu uvamańisage tsitsitsi tsu uvalagilage sitso.

³ Uvi itsova itsinge inongwa, uvi nikutsigwila ninongwa ińumi tsa nkuludeva vitu UJesu Kilisiti tsitsitsi itsikutuvula ukundwada Unguluve,

⁴ vwu nulwiginyo lumpelye ukubosola vwu natsimańili itsinge. Bako vwu atamilwe ukunogwa itsa lukani nitsa ligoha lya mameńu itsipela nukuvinika nukulwa nukudukana amadusi nukwibatana imbivi munumbula

⁵ nukunogwa sikutsoni avanu avavejangikye ṅani uluhala, avadumukilwe uvwajilweli, avita mumbukavilo ikyuma ulwa kundwada Unguluve.

⁶ Ukuva vukavilo kwu mumbukavilo ulwa kundwada Unguluve kungave kuhangile nulwijumilitso vi munu.

⁷ Ulwakuva twale vuvule upwu twingilaga nkilunga umu, pwu lili pavuvalasu ilyakuta nukuhuma nkilunga umwu nakwene tulahumaga vuvule.

⁸ Mańa tungave tuli nasyo isya kulya tuli nagyo igya kuswala, pwu tuliṅanage nasyo.

⁹ Avita tukave vwu vumosu vwu vikitaga nandugelo namuhululila nambunogwe vwu vwongosu uvutsimu uvukumbejanga umunu, uvwu avanu vukuvatwivilitsa nanduvejangiko nankujatsivwa.

¹⁰ Ulwakuva ukuganandalama gwu ndela gwa mbivi tsoni, avange uvwu kwavadindye vajagile inzila jya lwidiko, vipelye vene tsimbavo ńongosu.

¹¹ Mańa uve vi munu va Nguluve utsikimbilage tsoni tsitsitsi. Vwijumilitsage nuvugolosu nukundwada Unguluve nulwidiko nulugano nukusihaluvipo nuvudekedeke.

¹² Nilaga pangelańilo innonu jya lwidiko, uvuńage uvwumi vwa sikutsoni uvwu vwilangilwe, vwidikye nulwidikilo ulunnonu vwu vipulika avongosu avapulikaga.

¹³ Ndikukulagilila kumiho kwa Nguluve uvi syoni ikusipa uvwumi nakwa Kilisiti Jesu uvi idikilaga ulwidikilo ulunnonu kwa Ponte Pilate.

¹⁴ Ndikukulagilila ndita: Sikutsoni ululagilo ulwundikulagye ulwuvatilage, lulakavaga nakatilisa akange, lulavetsaga nakange aka kulutsovamwo itsinge, ukasike nalwo pakuvonekela kwa nkuludeva vitu UJesu Kilisiti.

¹⁵ Nditsova ukwu alavonya vwu gwitsile umwaka gwa mwene jujwa vi vandugataluko, vi Mwenemaka mwene, vi nkuludeva va vakuludeva voni, vi ntwa va vatwa voni.

¹⁶ Uvi uvutsilakuswa vwa mwene jujwa mwene, uvi atsengile ndumuli ulutsilakuhegelelamwo umunu, uvi nujyunge umunu nambweni lusiku, uvi nukulumana ukumbona nujyunge nalumańili. Vi upita tundwadage tumpetsage amaka amatsilakusila lusiku. Ameni.

¹⁷ Avakavile isyuma pakyańa apa vwu uvalagilage valipetsaga uvuvaha, nukuhuvila valahuvililaga nkyuma kya vene ikyu umunu nakivweni umwu kivelye. Bako uvavule vahuvililage mwa Nguluve uvi alikwo, uvi syoni isyu ikutupa sisyongosu, syu ikutupa sya kulya.

¹⁸ Uvavule vavombage tsinnonu, ena vave valweli imbombo innonu, vave vapi, valilanile navange.

¹⁹ Vilundamanihitsage ikyuma ikikipela ukuva lwalo ulunnonu lwa kwimapwo lungave lusiku, navene ukuta vitse vavuńagage uvwumi uvwu vwumi jilweli.

²⁰ Vi Timoti ukalole vunnonu akanu ukwu upevilwe mmavoko, utsitumbage nimwato tsa vutsimu itsili tsa vuvule, utsitumbage niṅani itsilotsine vuvule, itsa vumańi uvwu vita vumańi vwu navuli vumańi vwene.

²¹ Mańa avange vwu vita tuvuvwene pwu vajagile ndwidiko. Uluhungu luvetsage nuve.