1 Timoti 5 - UTESITAMENTI UMPYA

¹ Uvi mbaha kwave imyaka vi ulantanilaga. Bako umusanyage ukuta dadajo. Avadebe kwave uvahusanyage ukuta vanunavo.

² Avadala avavaha kwave imyaka vwu uvahusanyage ukuta vavańoko. Avadebe kwave uvahusanyage ukuta vahatsavo, uvahusanyage vi mbalatse vuvule.

³ Avadala avaswile uvadwadage. Nditsova avaswile jilweli.

⁴ Angave ujyunge undala unswile ali navana pange ali navitsukulu pwu upita vatengulage ukumańila pavanine avene ava ukuvomba itsa kundwada Unguluve, vavapetsage isya kuvavujitsa avahotsi va vene. Mańa tsu nnonu kumiho kwa Nguluve.

⁵ Undala uvi nswile jilweli, uvi asigye mwene vi ihuvila kwa Nguluve, vi nilindila sikutsoni ita nukutekelesa nukwisaja napamuńi napakilo.

⁶ Mańa uvi isyota syoni isinnonu vi aswilye ṅani nupwu ali kuvwumi.

⁷ Tsu uvavungage tsitsitsi navene ukuta vipelage ukuva vavalatse itsa kuvatsova.

⁸ Mańa uvi nikuvalondela isinu avanine, angave nikuvalondela avańa va mwene pwu alegwike ulwidiko, vwu alutile uvuvivi untsilakwidika.

⁹ Apene upwu ngave mutye tuvige ilitavwa lya mwene ujyunge undala unswile, pwu ndamwibataga uvi akanale ukusika pamyaka imilevulo ntanato. Pwu mumwibate uvi ategwe kungosi mpamato mwene,

¹⁰ uvi voni avanu vikuntsova imbombo innonu, uvi avakutsitse avańa, uvi avupilye avahenza, uvi avavalatse avahutswige mmalunde, uvi avatangile avali mbukuvilwa, uvi akongile tsoni imbombo innonu.

¹¹ Avadala avaswile avadebe vwu ubelage, mańa avene upwu vinogwa itsinge itsihomine nu-Kilisiti, pwu vilonda avagosi.

¹² Pwu kwu kwitolela vikitolela ukuhigwa ilyakuta vatagile itsu valongwe ukwidikila.

¹³ Nukutsovela vitsovelela baho nukutsungutila nńumba tsoni avatsilakuvomba! imbombo itsinge, viva volo, vipwata imwato. Vipinganitsa mmbombo tsa vange, nukutsova vitsova itsu natsinogili.

¹⁴ Uńe avadebe ava ndinogilwe vategulwagwe kuvagosi, vaholage avana, vagahe ińumba tsa vene, ulwakuva ndita valampetsaga napange pavukado uvi ali vutavangwa nuvwe, uvi ita ndivahovele.

¹⁵ Mańa pwuvale avatulekile vankongile USetano.

¹⁶ Angave ujyunge unkilisiti angave ngosi angave ndala, angave ali navadala avaswile avanine vi upita avasugilage isinu valagugatatsaga umpelela. Mańa ndita ugwene umpelela gwu guvasugilage avadala avaswile va jilweli.

¹⁷ Avavaha vińo avikugugaha vunnonu umpelela vwu upita vanogye ukuta ndutilile sitso pakuvadwada. Ndikuvatsova avigimba ninongwa nukusimilitsa nukumańisa.

¹⁸ Mańa Unguluve ita: Iṅambako ijikuvata ingano kwu bako ukujikunga kundomo. Ita ulunge: Umbombi anogye paluhombo lwa mwene.

¹⁹ Inongwa itsu vikumiga ujyunge umbaha jyu vwupililage pene upwu vangave vali vavili vangave vali vadatu avatsivwene.

²⁰ Avatulile inongwa uvalemage pakipuga avange pwu ukuta vadwade.

²¹ Tsu ndikukusimilitsa kumiho kwa Nguluve nakwa Kilisiti Jesu nakuvasuṅwa avahalilwe va Nguluve ndita tsitsitsi tsu uve natso vi ntsilakutsidumulila ṅani mwave inongwa vwu nupuliki vunnonu vi ntsilakuhigila mbugane.

²² Nujyunge ulangupaga pakumbika amavoko, uve mbalatse inongwa tsa vange. Uve mbalatse sikutsoni itsako.

²³ Uleke ukuńwa amagasi vuvule, uńwetsage utusilu ulwakuva ilitumbu lyako naliva linnonu, ulwakuva nuvutamu uli ntamu kavili-kavili.

²⁴ Avange avanu inongwa tsa vene itsu vitula tsivonekela ṅani, tsivalongolye mbulongolo ukubiha kuvuhigilo, avange vwu tsivakongile mumbele itsa vene.

²⁵ Vwu tsigahile natsene imbombo innonu, natsene tsili pavuvalasu, natsene itsili ponu natsene natsitwivilila sikutsoni.