1 Timoti 4 - UTESITAMENTI UMPYA

¹ UMepo ikutuvula ita: Mmyaka gya kunepo pwu avange valaluleka ulwidiko, valapulihitsa kumepo itsikuvajatsa avanu nakunongwa itsilavamańisa imepo imbivi,

² itsigendile mbulyasinu vwa vitsova itsa vunwasi uvwu tsivańańile ikimańilo kya tsene muńivonelo tsa vene.

³ Avene ukutegula avadala vidinda. Isinge isinu vita nsileke isyu Unguluve apelile ukuta valitsage avidike avavumańile uvwajilweli.

⁴ Mańa syoni isipelwa sya Nguluve sinnonu, Nasili mwiko isinge ungave vuhanzanya nulusano upwu vukwupilila.

⁵ Ulwakuva nilimeńu lya Nguluve nulwisajo syu sikusisaja.

⁶ Ungave tsu vukuvasimilitsa tsitsitsi avakilisiti avajitu vwu uli mbombi uli nnonu va Jesu Kilisiti, vwu likukutsitse nilimeńu lya lwidiko nilya lumańiso ulunnonu ulwu ulukongile sikutsoni jilweli.

⁷ Ututsago utudindule twa vadala avagogolo twu ubelage ukupulika. Vwitsoveletsage nitsa kundwada Unguluve.

⁸ Mańa ukwitsoveletsa gwu mańa kwu kukukuvumbulila sidebe vuvule. Mańa ukundwada Unguluve kwu kukukuvumbulila sisyongosu, mańa kuli nulwidiṅano lwa vwumi nuvwa lino nuvukwitsa.

⁹ Ilimeńu ili lihuvili linogye nukulyupilila.

¹⁰ Mańa tsu tsitsitsi itsu tukutsivombela, itsu nukudukwa tudukwa ulwakuva tumuvye Unguluve umwumi umpoki va vanu voni, uvi alutilye ukuva mpoki va vidike.

¹¹ Tsu uvalagilage, tsu uvamańisage tsitsitsi.

¹² Nujyunge alakugililaga uvudebe. Bako vwipelage ukuva va kulolelamwo avidike namameńu nulugendo nulugano nulwidiko nuvuvalatse.

¹³ Vwijumilitsage navo pakalata nukuvahusanya nukuvamańisa, ukasike navo upwu ndikwitsila.

¹⁴ Ikikungilwa kya Mepo ikyu uli nakyo ulajejepatsaga. Nditsova ikyu gakupye amalago agahangine nukuvikivwa amavoko uve upwu vakuvikile avavaha mmpelela.

¹⁵ Tsu ugimbage tsitsitsi, voni ukuta vakuvone vukwongeletsa vunnonu ukukula.

¹⁶ Vwilolage vunnonu vimwene, ulolage natsene ninongwa itsu vukuvavula mwu uvetsage mumwa. Mańa ungave ugahile vuvule-vule pwu vwipokile nuve, vwu uvapokile navene avikukupulika.