1 Timoti 3 - UTESITAMENTI UMPYA

¹ Ilimeńu ili lyu lya jilweli ilita: Uvi anogilwe ukuva ndoleli mumpelela vi anogilwe imbombo innonu.

² Undolelampelela vi upita avetsage mbalatse itsa kumwibatilapwo. Upita avetsage ngosi va ndala mpamato mwene. Upita alagalaga. Upita ijumilitsage twoni. Upita avetsage mbuswihu. Upita avupililage avahenza. Upita alumańage ukutsova inongwa.

³ Upita alavetsaga nganavugimbi. Upita alalondaga pakulwa. Bako upita atemekage anotsage alavetsaga nganandalama.

⁴ Upita alumańage vunnonu ukuva ntwa nńumba jya mwene, avańa va mwene avalese, ahanze nuvudwadwa vwa kuva ndwadwa umwene.

⁵ Mańa uvi vandemile ava nńumba jya mwene ukuva ntwa va vene, vi ate agugahe ndeti umpelela gwa Nguluve?

⁶ Upita alavetsaga mwingilalino mbukilisiti. Mańa pwu umwu avone ulwiginyo lukumbona, pwu avone amambulinye umendami ikuntsova imbivi.

⁷ Umwene upita vantsovage tsinnonu navapanzi. Mańa umwu avone tsimambulinye induko tsa kunduka, umwu avone ijibite nkipindo ikyu antegile umendami.

⁸ Navandyakoni vuvule-vule, navene upita vave vadwadwa, upita valavetsaga va ndimi isanike, Upita valavetsaga vankidili. Upita ikyuma valakavaga umwu mwuli mwiko.

⁹ Upita itsa kuvutitu itsa lwidiko vavike muńivonelo itsu vivwene uvuvalasu.

¹⁰ Navene upita tango mbagelage, pwu vingilage mbundyakoni ngave mbwene vavalatse itsa kuvahiga.

¹¹ Navene avadala avandyakoni vuvule-vule upita vave vadwadwa, valahehaga valagalaga, vave vahuvili ntunu twoni.

¹² Avandyakoni upita vave nundala mpamato mwene. Upita vave vatwa nakuvana va vene nanńumba tsa vene.

¹³ Mańa avivomba vunnonu imbombo tsa vene tsa vundyakoni vwu vikikavila pavwimo pavunnonu, nukutsova kwu vikutsitsova itsa lwidiko lwa kumwidikila UKilisiti Jesu.

¹⁴ Nupwu ndikukuvigila tsitsitsi pwu ndihuvila ukuta pange pasigye padebe ukwitsa kwave kukwa.

¹⁵ Mańa ungave uvwene ndisuvye, pwu tsikukuvulaga ulugendo lwa kugendela nńumba jya Nguluve tsitsitsi ukuta upita utetsage utetsage. Upwu ndita nńumba pwu nditsova umpelela gwa Nguluve uvi alikwo, ugwipelile ukuva kikotsi nukuva lwegamo lwa kuvwegamitsa uvwajilweli.

¹⁶ Itsene itsa kuvutitu tsa vudwada-Unguluve tsu ujyunge nibela. Bako voni vatsivwene uvuvaha: Unguluve avonike mumana gwa vanu, avonekye mwa Mepo uvugolosu, vambwene avasuṅwa, apulikike mbapanzi, vamwidike ava nkilunga, atotsivwe mbuvaha uvudwadwa.