1 Timoti 2 - UTESITAMENTI UMPYA

¹ Ndikuvahusanya ndita tsu tsive mbulongolo kutsoni itsa kuvisajila avanu voni. Nditsova nińisajo tsa kutekelesa nińisajo vuvule nińisajo tsa kuvimila avange nińisajo tsa kusanila,

² itsa kuvisajila navakuludeva navene avali mbuvaha voni, pwu ukuta pakyańa apa tugone uvwumi vwa ndugataluko vwa kununala vuvule twi vadwada-Unguluve, twi tundekye jujwa tsoni.

³ Ulwakuva tsu nnonu tsitsitsi kumiho kwa Nguluve kumpoki vitu, tsu atsinogilwe umwene

⁴ uvi anogilwe avanu voni ukuta vapokwagwe vasike pakuvumańa uvwajilweli.

⁵ Mańa Unguluve ali mpamato mwene. Numwima-pagati-napagati kwa Nguluve nakuvanu ali mpamato mwene, nditsova vi munu UKilisiti Jesu.

⁶ Vi ihilike mwene ipelile ukuva ka kuvavangila voni. Tsu tsale tsa kusimilitsivwa pamwaka gwa mwene.

⁷ Tsu itsi ndimikivwe ukuta ndive va kutsisimilitsa ndive mwapositili. Nditsova jilweli nandinwaṅa. Ndimikivwe ukuta ndive mańisi va vapanzi va kuvamańisa nulwidiko nuvwajilweli.

⁸ Ndinogilwe ukuta uvutsenge vwoni visaje avagosi, vatotse amavoko amavalatse, avatsilaluvipo ulunge, avatsilakwinana.

⁹ Avadala ndinogilwe ukuta vaswale imisabwa iminoge, vavoneke ukuva nisoni nuvuswihu. Valinotsaga ummana nindiṅulilo iṅunge nutunu twa sahabu nińambo nutwańingilitsa utwa ntengo gwa patale.

¹⁰ Bako upita vinotsehetsage tsimbombo innonu nduvwu vanogye avadala avita tukundwada Unguluve.

¹¹ Ukumańa inongwa undala kwu upita alumańage myemye, ijisage ulwijiso lwoni.

¹² Undala ndidindile ndita alatsovaga inongwa. Nakwene ukwipela ukuva ntwa umwene kungosi ndidindile. Bako ndita ave mye vuvule.

¹³ Ulwakuva alongwe ju Adamu ukupelivwa, Eva vi akongile mumbele.

¹⁴ Nukusongivwa nasongilwi ju Adamu; bako asongilwe ju ndala, pwu akavejanga.

¹⁵ Ukupokivwa undala pwu ipokivwa vwu ihola avańa, vangave viva mundwidiko namundugano nambuvalatse uvuhangile nuvuswihu.