Njun 6 - NTETO INJEGA CIA MURUNGU KIRI ANTU BONTHE

Mantû jangî jarîa jakanîtue

¹ Mwana waakwa ûkéeja gwîtîkîîria kûrûngamîîra îraandû rîa muntû ûngî, ûgéetîkîîria kûrûngamîîra îraandû rîaitha,

² ûkáitheeka na wîrane bwaaku, ûkáirigicania na nteto irîa warîîtie gwengwa.

³ Nandî mûtaana waakwa ûbuîrîte gwîtanga ûkeereenca mûtûûri waaku winyiîtie nîkenda ûcionokia kuuma kîrî we.

⁴ Ûkánogoka, kana weteera wawua nî toro;

⁵ îndî cionokie ta ûrîa nthia îcionokagia kuuma kîrî mûthoogi, kana ta ûrîa nyoni îcionokagia kuuma kîrî mûgwatia wa nyoni.

⁶ Gwe kîthao, iritane na mûthoa; tega ûrîa jûritaga ngûgî, ûgîe ûûme.

⁷ Jûritaga ngûgî jûtî na mûtongeeria, kana mûrûngamîîri, kana mûnene.

⁸ Îndî ju nî jûûthûranagia irio biaaju îgiita rîa thaano, jûgeeka bia kûng'ana îgiita rîa maketha.

⁹ Gwe mûthao, ûkaamama mwanka rî? Ûgookîîra uuma toroone rî?

¹⁰ Mûthao ariuga atîrî, “Ka-ndiikiinde aniini mamamame, ka nditaambûrûkie aniini nogoke?”

¹¹ Ûrîthîîna ta mbereera, ûrîe ûkîa ta muntû withûkîri nî atuunyani.

¹² Muntû wa ûtheri na muntû ngîti, atarataraga akîaragia ûrongo.

¹³ Akuunagîra meetho, na agakweneria na njara, agakiinyakinya nthî agîkwoneeria nîkenda wîtîkia.

¹⁴ Tontû we nî muntû wa nkoro îmbîî, akaraga akîbangaga mantû jamathûûku; athûgaanagia ûrîa akaarwîthania antû îgiita rîonthe.

¹⁵ Tontû bûû, akeejîîrwa nî mûtino ntûti, oonje ûrîa atîûmba kwona mûtheega.

¹⁶ Kûrî mantû jatantatû jarîa MWATHANI athwîre, kana mûgwanja jarîa atîendaga kwigua.

¹⁷ Najo nî rwikumio, na kwaria ûrongo; na kûûraga muntû ûtî na maatia;

¹⁸ na muntû ûrîa ûthûgaanagia mantû jamathûûku akî; na muntû ûrîa ûrî mpwîî cia kûthithia ûthûûku

¹⁹ na muntû ûrîa ûritaga ûkûûjî bwa ûrongo, na muntû ûrîa ûrwîthanagia antû bangî.

Gûkaanua ûthûngîîri

²⁰ Mwana waakwa, thithagia ûrîa abaagu akwîraga, na ûkaarega waatho bwa nyakwe.

²¹ Gwataga mantû jau bwega ûjarikagie na ûjeekage nkoroone rîonthe.

²² Jagaagûtongagîîria ûrî rûgendoone, na jakwejage kîrîra mûthenya, na jagûkaragie ûtukû ûmami.

²³ Nîkwîthîrwa Waatho nîbu taawa, na ûritani nîbu weerû, kûbwathîkîra nîbu bûreetaga ûtûûro bûbwega.

²⁴ Nîbu bûgaakwathûranaga na amaramari bûgûteethagie kuuma kîrî aka baitha, barîa barî nteto inthongi.

²⁵ Ûkábairîrîîria nîûntû bwa ûthongi bwaao, na bakwenaeneria na meetho ûkábathingata.

²⁶ Mûmaraya no ang'anîrwe nî îrîi rîa irio akî, îndî mûthûngîîri atîng'anagîrwa atîkûthirîrîîtie into biaaku bionthe.

²⁷ Muntû oomba gûkamata mwanki na nguû na nguû îîu îtîye?

²⁸ Kana rî, muntû oomba gwîtîîra makareene ja mwanki, na atîye makinya jaawe?

²⁹ Ûu nîu muntû ûrîa ûthûngagîîra na mûka waitha akaraga. Gûtî muntû waathengeera mûka waitha ûtîkanûkua.

³⁰ Mwamba wa biakûrîa bia kîu kîaawe akî atîthûûragwa nî antû.

³¹ Îndî akëeja kûgwatwa, no mwanka abirîee mainda mûgwanja, kinya këethîra nî kwendia into bia nyomba yaawe bionthe, akeendia.

³² Mûthûngîîri atî ûûme. Rîrîa athûngagîîra nîka aithiragia wengwa.

³³ We atengûragwa na ageekîrwa ngûma nî antû, narîo îgi rîaawe rîtîthiraga.

³⁴ Mûrûme wa mûka ta ûu, agwatagwa nî mûthûûro nîûntû bwa ûrîa eendeete mûka waawe nawe akairîîria atî na kîaao.

³⁵ Gûtî îrîi eendekia rîa kûthiria mantû jau na kinya akaewa mbi mûthûûro jwaawe jûtîthira.