Njun 21 - NTETO INJEGA CIA MURUNGU KIRI ANTU BONTHE

¹ O ta ûrîa MWATHANI atongagîîria rûûjî ûrîa akwenda, noou atongagîîria mathûgaanio ja mûnene ûrîa akwenda.

² Muntû oonaga mîîtîre yaawe yonthe nî îmîega, îndî MWATHANI nîwe ûmenyaga bûrîa bûrî nkoroone.

³ Kûthithia mantû ja ûûma na ja waagîru nîbio MWATHANI eendeete nkûrûki ya kûritîrwa kîgongwana.

⁴ Rwikumio na gûciîkîîra nîbio bitongagîîria barîa baaî, na bûu nî meeyia.

⁵ Antû barîa babangaga mantû jaao nî boonaga ûtonga bûbwingî; îndî barîa baritaga ngûgî ciaao na mpwîî-mpwîî, batûûraga thîîneene.

⁶ Ûtonga buumanîtie na kwaria ûrongo bûthiraga ta îme riûene, ningî nî mûtego jwa gîkuû.

⁷ Antû babaaî bakoondoragua nî ûthûuku bwaao, nîûntû nî baregeete kûthithia mantû ja îota.

⁸ Mîîtîre ya barîa barî maatia nî îmîkîîgamu, îndî mîîtîre ya barîa atheru nî îmîrûûngamu.

⁹ Nî kaaba kûraara rûgitoone rwa nyomba antû a kûraara nyomba îmwe na mûka wa mateta.

¹⁰ Muntû ûmûûî airîragîria mantû jamathûûku akî, na gûtî muntû aigagîîrua kîaao.

¹¹ Îkanûkia rîa muntû wa tengûri nî rîritanaga barîa batîûmîi; kûritana muntû ûmûûme nî kûmwonagîîra ûûme.

¹² Mûrungu, we Ûrîa Mwagîru, nî oonaga mantû jonthe jarîa jathithagua mîciî ya barîa baaî, na no kûbathiria abathiragia.

¹³ Muntû ûrîa ûregaga kwigua nkîa rîrîa îkûmûkaîra, kinya we atiigîîgua rîrîa agaakaya arî na thîîna.

¹⁴ Kîewa kîeejani na witho nî kîthiragia mûthûûro; marûrû jamanene nî jabooragîrua na kîewa.

¹⁵ Barîa baagîru ka bagwîragua boona ûûma bûkîthithua, îndî barîa baaî ka baigagua bûbûî.

¹⁶ Muntû ûrîa ûtigaga kûthithia mantû jarî kîrîîkî, acionaga gwa akuû.

¹⁷ Muntû ûrîa wînganaga na mîago ya nthî aejaga nkîa; ûrîa wendeete ndibei na irio bia goro atîkorotonga.

¹⁸ Antû barîa baaî nîbo bakanûkagua antû a barîa baagîru; barîa ndemi nîbo bakanûkagua antû a barîa aathîki.

¹⁹ Nî kaaba gûtûûra rwanda wenka, antû a gûtûûrania na mûka mûteti ûtîng'anagîrwa.

²⁰ Muntû ûmûûme atîagaga ûtonga nja yaawe, îndî kîaa kînyangagia biaakio.

²¹ Muntû ûrîa ûcwaga mantû ja îota na wiganagîîrua kîaao nî oonaga ûtûûro bûbwega na akagîa îgweta.

²² Mûtongeeria ûûmûûme oomba kwithûkîra ntûûra îrî na inya mono na agakoboranga biitiiro bibiriku birîa antû beerîgîîrîte bikaaboonokia.

²³ Muntû ûrîa ûmenyagîîra mantû jarîa aaragia atîtonyaga thîînene.

²⁴ Muntû mwikumia na wa tengûri eetagwa “Ntûrîka,” athithagia mantû na ûgîti na rwikumio.

²⁵ Mûthao ooragagwa nî kwirirîria nîûntû atîendaga kûringithia ngûgî na njara ciaawe.

²⁶ Atindaga airirîrîtie into biaitha, Îndî muntû ûmwagîru aeejanaga na magi.

²⁷ MWATHANI atîendaga kwona kîgongwana kîa muntû ûmûûî ningî rîrîa kîgongwana ta kîu kîriti na yerekeeria rîrîthûûku, agakîthûûra nkûrûki.

²⁸ Nteto cia muntû wa ûrongo gaciûragîria, îndî nteto cia muntû wa mma nîcio itûûraga kûririkanwa.

²⁹ Muntû ûmûûî atîendaga kûmenywa ûrîa akari, îndî muntû ûmwagîru atîkîraga mantû jaawe jamenyeka.

³⁰ Muntû atîûmbana na ûûme bwaawe kana kîrîra kîaawe kana nkuagaya ciaawe MWATHANI atîkwenda.

³¹ Muntû oomba kûthuranîra mbarathi ageeta ndweene, îndî MWATHANI nîwe weejanaga ûûmbani.