Njun 2 - NTETO INJEGA CIA MURUNGU KIRI ANTU BONTHE

Maciara ja ûûme

¹ Mwana waakwa, ûkëeja kûgwata nteto ciaakwa, na ûkäririkana jarîa nkwathaga,

² ûkëeja gûkiinda gûtû ûkäigua mantû ja ûûme; na ûkëenda kûgîa ûmenyo;

³ îî, ûkëeja kûrîra ûgîcwaga kîrîra na ûgäkaya ûkîenda ûmenyo;

⁴ Ûkëeja gûcwaa ûûme ta ûrîa ûcwaga fetha, kana ûrîa ûcwaga gîntû kîa goro kîrî withoone,

⁵ rîu nîrîo ûkaamenya gîtûmi gîa gûkîra MWATHANI, na ûgîe kîrîra kîa Mûrungu.

⁶ Nîkwîthîrwa MWATHANI nîwe weejanaga ûûme, kîrîra na ûmenyo biumaga kîrî we.

⁷ MWATHANI eekaga ûûme bwa mma nîkenda aithûragîra barîa baagîru, nîwe rong'o ya barîa barî mîîtîre îmîega.

⁸ Nî arûngamagîîra ûûma, na akamenyeera barîa baamwîtîkîtie.

⁹ Ûkäthithia ûu nîrîo ûmenya mantû jarîa maagîru ja ûûma na ja îota na ûkamenya kinya mîîtîre îmîega.

¹⁰ Tontû ûkaagîa ûûme, na ûmenyo bûrîa ûrî nabu bûtûmage ûgwîrua.

¹¹ Mathûgaanio jameega jagaagûtongagîîria na ûmenyo bûkûmenyagîîre.

¹² Ûûme bûgakwathûranaga na ûthûûku na kuuma kîrî barîa barî ndwaria inthûûku,

¹³ barîa batîganaga na mîtîre îmîagîru, bakathithagia mantû ja muundu.

¹⁴ Bau nîbo bagwîragîrua kûthithia ûthûûku, na bagakenera ngûgî imbîî cia ûmaramari;

¹⁵ Bau nî antû barîa bathingataga njîra inkomboku, na batîûmba gwîtîkua.

¹⁶ Ûûme bûgakwonokia kuuma kîrî mûka mûthûngîîri, bûgûtuunyûkie kuuma kîrî mûka mûmaramari, ûrîa ûgeragia gûkuucîîria muntû na nteto irî mûrîo;

¹⁷ ûrîa ûtiganagîîria mûkûrû waawe ûrîa wamûgûrîre arî ûmwîthî, na akoorîrua nî mîciîtio îrîa aaciîtîrie mbere ya Mûrungu waawe.

¹⁸ Nîkwîthîrwa gûtonya nyomba yaawe nî ûmwe na gûtonya gîkuûne, nabo barîa bamûthingataga beetaga gwa akuû.

¹⁹ Gûtî muntû wîtaga kwa mûka ta ûu, acoka kûmenya njîra ya mwoyo kaîrî.

²⁰ Tontû bûû, gwe thingataga mîîtîre ya antû barîa beega, na wîtage na njîra irîa ciagîrîte.

²¹ Tontû barîa baagîru nîbo bagaatûûra nthîgûrûûne, na barîa beega batîkorouma ku.

²² Îndî antû babathûûku bakeengwa buru baume nthîgûrûûne na ndemi ithaamue ku buru.