Njun 18 - NTETO INJEGA CIA MURUNGU KIRI ANTU BONTHE

¹ Muntû ûrîa ûciathûranaga na bangî nî bwaawe akî eethagîrwa agiicwagîra, na nî areganaga na mataaro jonthe.

² Kîaa gîtîûragia kûmenya mantû, ta gûcionania ûrîa kiijî mantû.

³ Ûthûûku bwîjanagia na rûmena, narîo îgi rîreetaga nthao.

⁴ Nteto cia muntû no cieejane kîrîra gîkiingî ta rûûjî rwa îria ciomba gûtûûra itherûkaga ta kîthima kîa rûûjî

⁵ Tî bwega kwendeera muntû ûmûûî, kana kûrega kûthithîria muntû ûmwagîru ûrîa kwagîrîte.

⁶ Nteto cia kîaa cieejaga mateta, gîkaireetera mpûûrwa na kanyua gaakîo.

⁷ Kîaa gîciînjagîra îrinya na mûromo jwaakîo, gîkarîîwa nî nteto irîa kîarîtie kîongwa.

⁸ Nguutû irî mûrîo mono, itonyaga muntû ndeene buru.

⁹ Muntû ûrîa mûthao ngûgîîne no ûmwe na muntû mwînyangia.

¹⁰ MWATHANI nî mûnaara jûmûriku, nî kîrî we barîa baagîru bamatûkaga bakauma ûgwatiine.

¹¹ Itonga bithûgaanagia atî ûtonga bwaabio no bûbirigîîrie ûgwatiine, ta ûrîa nthingo cia ntûûra ithithagia.

¹² Muntû mwinyiiyia nîwe ûeejagwa gîtîîo, îndî muntû mwikumia no kûthira athiraga.

¹³ Muntû ûrîa ûcokagia kîûria atîambîte kwigua ûrîa akûûrua, acokagîrwa nî nthao na akoonania waa bwaawe.

¹⁴ Inya ya nkoro nî îtûmaga muntû akoomîrîîria mbajua, îndî muntû agakua nkoro atîgunîka.

¹⁵ Muntû ûmûciûku nî acwaga kûmenya mantû, na nî athikagîîra ûritani.

¹⁶ Kweejana kîewa nî kûrugûragîra muntû njîra, na gûgatûma akinya kîrî anene.

¹⁷ Ûgambi bwa mwaria wa mbere bwigiigagua bûrî bwa mma buru, mwanka rîrîa muntû ûngî akaambîrîria kûmûûria biûria.

¹⁸ Nkarari gatîgatîîne ga antû baîrî ithiragua na kûringa kuura.

¹⁹ Ûgäteethia mûtaana wa nyakwe agîaga inya ta rûthingo rwa ntûûra, Îndî ûkëeja gûteta nawe, nî ûmwe na kûmwingîra oome.

²⁰ Muntû nî arîîjagîra kanyua kaawe, akarîîra nteto irîa aaragia.

²¹ Rûûme rûrî inya; rwoomba gûkûreeteera gîkuû, kana gûtûma ûtûûra mwoyo. Nabo barîa barûmenyagîîra nî boonaga ûumithio bwaaru.

²² Muntû ûrîa wonaga mûka wa kûgûra, eethagîrwa oonete gîntû gîkîega; na nî MWATHANI withagîrwa amûtharimîte.

²³ Nkia yaragia îgîcierencanagîîra, îndî gîtonga kîaragia na ûng'entu.

²⁴ Kûrî muntû ûcieethagia mûcoore wa ûngî na atî mûcoore, îndî kûrî mûcoore ûkûrûkîte mûtaana wa ng'ina wa muntû.