Njun 13 - NTETO INJEGA CIA MURUNGU KIRI ANTU BONTHE

¹ Mwana ûmûûme nî aigagua mataaro ja îthe, îndî ûrîa ndemi atiigagua ûrîa akwîrwa.

² Muntû ûrîa waaragia bwega nî arîîjagîra kanyua kaawe, îndî ûrîa waragia ûrongo nî ndwaa acwaga.

³ Muntû ûrîa ûmenyagîîra nteto irîa akwaria nî oonokagia mwoyo jwaawe, îndî ûrîa ûtherûkaga nteto ka aireetagîîra thîîna.

⁴ Mûthao kinya akairîrîîria gîntû atîkîona, îndî muntû wa wîru nî oonaga kîrîa airîragîîria.

⁵ Muntû ûmwega nî athwîre ûrongo, îndî muntû ûmûûî athithagia mantû ja îgi ja kûmwîkîrithia nthao.

⁶ Waagîru nî bûkaragia muntû ûrî mîîtîre îmîega, îndî muntû ûmûûî, athiragua nî meeyia.

⁷ Kûrî antû beendaga gûcionania atî bo nî itonga, o rîrîa gûtî gîntû barî; bangî nabo bagacionania atî bo nî nkîa, o rîrîa barî itonga bibinene.

⁸ Mathîîna jamwe jeejagîîra itonga nîûntû bwa ûtonga bwaao, jatîkinyagîra nkîa.

⁹ Muntû ûmwagîru nî taawa îrî na maguta, îndî muntû ûmûûî nî taawa îtî na maguta.

¹⁰ Kûûmia kîongo kûreetaga nkarari; muntû ûmûûme ka athikagîîra ûrîa akwîrwa.

¹¹ Ûtonga bwa mpwîî bûtîthithinîri bûthiraga na mpwîî, îndî ûtonga bûcûûi mpaara mpaara nî bûthegeaga bûkoongeereka.

¹² Muntû anogaga rîrîa mantû jarîa eerîgîîrîte jatîroojûra, îndî wîrîgîîro bwaawe bwoojûra nî anogokaga.

¹³ Muntû ûrîa ûregaga ûritani ka aireetagîîra thîîna, îndî muntû ûrîa ûthingataga ûritani nî oonaga îtuui.

¹⁴ Mooritani ja muntû ûmûûme nî kîthima kîa mwoyo, najo nî jatûmaga muntû eebera mîtego ya gîkuû.

¹⁵ Ûmenyo nî bûtûmaga muntû akagwatîrwa nthoni, îndî mîîtîre ya antû batîgwîtîkua îbareetagîîra thîîna.

¹⁶ Muntû ûrî kîrîîkî athithagia mantû jonthe na ûûme, îndî kîaa gakîanîkaga waa bwaakîo.

¹⁷ Mûtûmwa ûmûûî atonyagia antû thîîneene, îndî mûtûmwa ûmwega nî atûmaga mantû jakaabua.

¹⁸ Mûregi kwathwa eejagîîrwa nî ûkîa na nthao, îndî ûrîa ûkaanagua ûntû akaigua arî îgweta.

¹⁹ Muntû nî agwîragua bûrîa akwenda bwoojûra, îndî biaa nî bithwîre gûtigana na ûthûûku.

²⁰ Mwîtania na antû baboome nî oomîaga, îndî ûrîa ûriûnganagia na biaa ka athîînaga.

²¹ Eeyia batîathûkanaga na mathîîna, îndî îtuui rîa barîa baagîru nî ûthinyaarî.

²² Kiigai kîa muntû ûmwagîru gîtiumaga njareene cia nchiarwa ciaawe, îndî ûtonga bwa muntû mwîyia bûcokaga njareene cia barîa baagîru.

²³ Miuunda ya nkîa yomba kuuma irio bibingî, îndî igatunywa bionthe na njîra ya waayia.

²⁴ Muntû ûrîa ûtîkanûkagia mwana waawe ka atîmwendeete, îndî muntû ûrîa weendeete mwana waawe, nî amûkanûkagia.

²⁵ Muntû ûmwagîru nî onaga biakûrîa bia kûng'ana, îndî muntû ûmûûî atîng'anagia biakûrîa.