Njun 10 - NTETO INJEGA CIA MURUNGU KIRI ANTU BONTHE

Njuno cia Solomoni

¹ Iji nî njuno cia Solomoni. Mûtaana ûmûûme nî atûmaga îthe agwîrua, îndî mûtaana ûmûriitu nî atûmaga ng'ina agîa na kwithikîîra.

² Ûtonga bûcwûi na njîra inthûûku bûtîgunaga, îndî waagîru bwonokagia muntû kuuma gîkuûne.

³ MWATHANI atîrekaga antû babaagîru baaga biakûrîa, îndî nî agiragia mairîrîîria ja antû babaaî joojûra.

⁴ Mûthao atûmaga ûkîa bûmwîjîîra, îndî muntû ûrîa ûritaga ngûgî na wîru nîwe ûtongaga.

⁵ Muntû ûrîa ûkethaga îgiita rîa maketha nî ûmûûme, îndî muntû ûrîa ûmamaga îgiita rîa maketha no nthoni aireetagîîra.

⁶ Muntû ûrîa mwagîru oonaga itharimo, îndî muntû ûrîa mûûî aragia nteto cia kûrwîthania.

⁷ Antû babaagîru baririkanagwa na kûgwîrua, îndî barîa baaî booragîria buru.

⁸ Muntû ûmûûme nî aigagua mataaro, îndî ûrîa waragia na waa ka athiraga.

⁹ Muntû ûmwega atûûraga kiindajî, îndî muntû wa mîîtîre îmîthûûku atîciithanagia.

¹⁰ Muntû ûrîa ûregaga kuuga ûûma nî thîîna areetaga, îndî ûrîa ûkaananagia oomîîrîtie areetaga thîîrî.

¹¹ Nteto cia muntû ûmwega nî kîthima kîa mwoyo îndî nteto cia muntû ûmûûî ciumaga ndwaa.

¹² Ûthû bûûkaûkagia mateta, îndî wendo bûkunîkagîra maatia jonthe.

¹³ Kanyua ka muntû ûmûûme kaaragia nteto irî na kîrîra, îndî muntû ûmûritu no gûkanûkua na mpûûrwa eendaga.

¹⁴ Muntû ûmûûme akiraga aijî, îndî kîaa kîarangagia mantû jagakîreetera thîîna.

¹⁵ Itonga bikaragua nî ûtonga bwaabio, nkîa nacio ikathirua nî ûkîa bwaacio.

¹⁶ Mûcaara jwa antû barîa baagîru nî mwoyo najo mathithio ja antû babathûûku jareetaga ûthûûku.

¹⁷ Muntû ûrîa wigagua ûrîa agûtaarwa arî njîreene ya mwoyo, îndî ûrîa ûtîendaga gûkaanua ûntû no kûûra aûraga.

¹⁸ Muntû ûrîa withanagia rûmena nî mûrongo, na ûrîa ûthûkagia riîtwa rîa ûngî nî kîaa.

¹⁹ Kwaria mono kwoomba gûtûma muntû akeeyia; ûrîa mûûme nî ûrîa ûthimagîra rwaria rwaawe.

²⁰ Nteto cia muntû ûmwagîru ikari ta fetha îrîa nthongi, îndî mathûgaanio ja muntû ûmûûî nî ja ûtheri.

²¹ Nteto cia muntû ûmwagîru igunaga antû babaingî, îndî biaa bikujaga nî kwaga ûûme.

²² Kîtharimo kîa MWATHANI nî kîretagîra muntû ûtonga, ngûgî cia mînoga gûtîkîo ciongagîîra.

²³ Kîaa gîkîthithia ûthûûku kîonaga ta matinda, îndî muntû ûmûûme agwîragîrua kûthithia mantû jarî kîrîra.

²⁴ Kîrîa muntû ûmûûî akîrîte, nîkîo kîongwa kîmwîjagîîra, îndî kîrîa muntû ûmwagîru airîragîria, nîkîo aeejagwa.

²⁵ Kîbubani kiurutanaga, gîgakamata barîa baaî, îndî antû barîa baagîru batîenyeenyeka noo rî.

²⁶ Kîthao kîthîînagia ûrîa ûgîtûmaga ngûgî ta ûrîa nchechû ciîkagîra maîgo nyangiri, kana ta ûrîa toogi yakanagia meetho.

²⁷ Gûkîra MWATHANI nî kwongagîîra ûtûûro, îndî ûtûûro bwa barîa baaî nî bûbûkuî.

²⁸ Wîrîgîîro bwa barîa baagîru nî kûgwîrua, îndî barîa baaî batî wîrîgîîro.

²⁹ MWATHANI nîwe kîmatûkîro kîa barîa baagîru; MWATHANI nî athiragia barîa baaî.

³⁰ Antû barîa baagîru batîenyeenyua arîa barî, îndî barîa bathûûku batîona gîkaro nthîgûrûûne.

³¹ Nteto cia muntû ûmwagîru irî ûritani, îndî muntû ûrîa waragia nteto cia ûrongo akaathirua.

³² Antû babaagîru nî baijî nteto irîa ibuîrîte kwarua, îndî antû babaaî baaragia nteto inthûûku.