Mathayo 8 - NTETO INJEGA CIA MURUNGU KIRI ANTU BONTHE

Jesû kworia muntû waarî na mûtigiri

¹ Rîrîa Jesû eenamîre kuuma kîrîmeene, antû babaingî nî baamûthingatîre.

² Rîu muntû waarî na mûtigiri areeta kîrî we na araturia maru arauga, “Itû Mwathani ûkëethîrwa weenda, nthiria mûtigiri!”

³ Jesû aratambûrûkia njara yaawe na aramûringithia akiugaga, “Îî nî nkwenda jûthira! Thera.” O rîo muntû ûu aroora mûtigiri jwaawe.

⁴ Rîu Jesû aramwîra, “Ûkéera muntû kinya ûrîkû, îndî îta ûgacionanie kîrî mûthînjîri-Mûrungu na ûrite kîgongwana kîrîa Musa aathanîre kîritagwe, nîkenda kîaa ûkûûjî kîrî antû bonthe atî ûkworua.”

Jesû kworia nthûûmba ya mûtongeeria wa asikarî ba Roma

⁵ Rîrîa Jesû aatonyere Kaperinaumu, mûtongeeria ûmwe wa asikarî ba Roma nî eetîre kîrî we na aramwerenca akiugaga,

⁶ “Mwathani, nthûûmba yaakwa nî îmami nja yaakwa nîûntû bwa kwonja na nî îkûthangîka mono.”

⁷ Jesû aramwîra, “Nkeeja kûmworia.”

⁸ Îndî mûtongeeria ûu aramwîra atîrî, “Itû Mwathani, ni ntîagîrîte gûkûgwata ûgeni gwaakwa. Uuga akî abue, na nthûûmba yaakwa îkabua.

⁹ Nî kwînthîrwa kinya ni ndî na waatho bwa gûtongeeria asikarî barîa barî waathoone bwaakwa. Nî mbîraga ûmwe, ‘Îta!’ nawe ageeta na nkeera ûngî, ‘Njû!’ nawe akeeja. Ningî nkeera nkombo yaakwa, ‘Thithia ûjû!’ nayo îkathithia u.”

¹⁰ Rîrîa Jesû aigîrue ûu ararigara mono na areera antû barîa baamûthingatîte atî, “Nî nkûbwîra na mma atî, nthîgûrûûne ya Israeli ntoona muntû kinya ûmwe ûrî na wîtîkio ta bûbû.

¹¹ Ndîbwîra antû babaingî bakauma bwa gaiti na bangî baume bwa rûgûrû, nabo bagakara amwe na Abrahamu na Isaaka na Jakubu kîathoone kûu ûneneene bwa îgûrû.

¹² Îndî barîa babuîrîte kwîthîrwa barî antû ba ûnene bûu bakagerwa oome muunduune, kûrîa bakarîraga na kûrîa maîgo bakiigagua ûrûrû bûbwingî.”

¹³ Rîu Jesû areera mûtongeeria ûu atîrî, “Aana, na o ûu wîtîkîtie bûgakarîka.” Ningî îgiita o rîu rîongwa nthûûmba yaawe îroora.

Jesû kworia antû babaingî mîrimo

¹⁴ Jesû aratonya nyomba ya Peterû na areethîra ng'ina wa mwekûrû wa Peterû amami gîtandeene arî na mwanki.

¹⁵ Rîu Jesû araringithia njara ya mwekûrû ûu, na mwanki jûrathira. Nawe arookîîra na aramûmathîra.

¹⁶ Ûgoro bwa ntukû îîu, antû baramwikîria antû babaingî barîa baarî na roho inthûûku. Nawe aracigondokera irauma kîrî bo. Ningî arooria antû bonthe barîa baajîtue.

¹⁷ Aathithîrie ûu nîkenda akoojûria jarîa kîroria Isaya aarîtie akiugaga, “We nî ajûkîrie woonje bweetû, na arakamata mîrimo yeetû.”

Antû barîa babuîri kwîthîrwa barî athingati ba mma ba Jesû

¹⁸ Rîrîa Jesû oonere antû babaingî bamûthiûrûkîrîte, nî eerîre aritwa baawe baune rwongo rûrîa rûngî rwa îria.

¹⁹ Mwandîki ûmwe wa Waatho areeta kîrî we aramwîra atîrî, “Mûritani, ni ngakûthingataga o kunthe kûrîa ûgeeta.”

²⁰ Jesû aramûcokeria, “Mbîrwa irî na marinya, na nyoni irî na itara, îndî Mûtaana wa Muntû atî na antû a kûnogoka.”

²¹ Ûmwe wa aritwa baawe aramwîra atîrî, “Mwathani, mbîtîkîîria mbîte nkathike baaba rîu ncoke nkûthingate.”

²² Îndî Jesû aramwîra, “Nthingata; tigana na akuû bathike akuû baao bongwa.”

Jesû kwîra ruuo rûtige kuurutana

²³ Rîrîa Jesû aitîrie gîtarûûne, na aritwa baawe kinya bo nî baitîrie ku.

²⁴ Atîrî, ruuo rûrûnene rûraurutana îrieene, mwanka mîgombe îreenda kûthika gîtarû. Îndî îgiiteene rîu Jesû nî amami.

²⁵ Aritwa bareeta kîrî we baramûûkia bakiûgaga, “Itû Mwathani, twonokie, tûrî akuî gûkua!”

²⁶ Rîu Jesû arookîîra na arabeera, “Îbuî antû barî na wîtîkio bûbûkai; nîmbi bûgûkîra?” Rîu aragondokera ruuo na îria, nabio biraborera kûragîa na ûkiri.

²⁷ Antû bararigara bakîûragia, “Ka ûjû arî muntû wa mûthemba jûrîkû? Kinya ruuo na îria nî bikûmwathîkîra!”

Jesû kworia antû baîrî barîa baarî na roho inthûûku

²⁸ Rîrîa Jesû aakinyîre nthîgûrû ya Gadara, îrîa yaarî rwongo rûrîa rûngî rwa îria, nî aatirimanîre na antû baîrî baarî na roho inthûûku baumîte gûntû kûrîa antû baathikagwa. Gûtî muntû ûrîngîûmîîria gûkûrûkîra njîreene îîu nîûntû bwa ûrîa antû bau baang'eenti.

²⁹ Antû bau baraambîrîria kûringa gîtuma bakiugaga, “Nîatîa ûkwenda naatuî, gwe Mûtaana wa Mûrungu? Ka weeja gûtûthangîkia îgiita rîtîrakinya?”

³⁰ Akuî na antû au nî kwaarî na ngûrwe inyingî ikîrîjaga.

³¹ Rîu roho iu nthûûku ireerenca Jesû ikiugaga, “Këethîra ûgatwînga, twîtîkîîrie tûtonye ndeene ya ngûrwe irîa.”

³² Jesû areera roho iu atîrî, “Îteeni.” Rîu roho iu nthûûku irauma kîrî antû bau, na iratonya ndeene ya ngûrwe. Ngûrwe iu cionthe ireenamîra rwareene rûrûnene, na îragwa îrieene na irathirîra ku.

³³ Arîîthi baacio baramatûka mwanka ntûûreene, na bareera antû ûrîa gwakarîkîre. Ningî barauga ûrîa gwakarîkîre kîrî antû barîa baarî na roho inthûûku.

³⁴ Tontû bûû, antû bonthe ba ntûûra îîu bareeta kûthagaana Jesû. Rîrîa baamwonere nî baamwerencere aume nthîgûrû yaao.