Mathayo 20 - NTETO INJEGA CIA MURUNGU KIRI ANTU BONTHE

Ngerekano ya ariti ngûgî muundeene

¹ “Ûnene bwa îgûrû bwoomba kûng'uananua na muntû ûrîa waarî na muunda jwa mîzabibû. Muntû ûu nî arookere rûûkîrî kainda gûcwaa antû ba kûrita ngûgî muundeene jwaawe.

² Akûboona ararîîkania nabo atî akabarîaa îrîi rîrîa muntû arîagwa aritîte ngûgî ntukû yonthe, na arabaikia muundeene jwaawe jwa mîzabibû.

³ Araumagara thaa ithatû cia rûûkîrî, na aroona bangî barî thokoone, batî na ngûgî.

⁴ Nawe arabeera, ‘Kinya buî îteeni bûkarîte ngûgî muundeene jwaakwa, naani nkabûrîaa kîrîa bwagîri kûrîwa!’

⁵ Bau bareeta muundeene. Mwene muunda araumagara kaîrî thaa thîta na thaa kenda na arathithia o ûu kaîrî.

⁶ Ningî thaa kûmi na îmwe cia ûgoro ciakinya, araumagara kaîrî na areethîra antû bangî thokoone batî na ngûgî ya kûrita. Rîu arabooria, ‘Nîmbi îtûmîte bûkara aja mûthenya jûnthe bûtîkûrita ngûgî?’

⁷ Baramûcokeria, ‘Tontû gûtî muntû ûratwaa ngûgî.’ Nawe arabeera, ‘Kinya buî îteeni bûkarîte ngûgî muundeene jwaakwa jwa mîzabibû.’

⁸ “Riûa rîkûthûa, mwene muunda areeta mûrûngamîîri wa muunda na aramwîra atîrî, ‘Îta ariti ngûgî na ûbarîee mbeecha cia ngûgî îrîa barîtîte. Ambîrîria kûrîaa barîa beejîre barî ba mûthia, na ûthirie na barîa beejîre ngûgîîne rûûkîrî.’

⁹ Rîu barîa baerwe ngûgî thaa kûmi na îmwe bareeta na o muntû ararîwa îrîi rîa ntukû yonthe.

¹⁰ Barîa baaeei ngûgî rûûkîrî, baathûgaanagia bakongeererwa mbeecha, îndî kinya bo barîîrwe o muntû îrîi rîa ntukû yonthe.

¹¹ Bakûjûkia mbeecha ciaao, nî bambîîrîrie kûnûng'unîra mwene muunda bakiugaga,

¹² ‘Antû baba baerwe ngûgî barî ba mûthia baritîre ngûgî îthaa rîmwe rîonka. Nîkî watûrîaa tûng'aneenie nabo, na tuî tûtindîte kûrita ngûgî înjûmû ntukû yonthe tûkîîthagua nî riûa?’

¹³ Rîu mwene muunda aracokeria ûmwe waao ûjû: ‘Mûcoore, ntîkwaîtie kinya aniini! Tûtîkûrîîkanîtie naagwe ngakûrîaa îrîi rîa ntukû yonthe?

¹⁴ Jûkia mbeecha ciaaku, ûciîtîre. Nî ni mpendere kûnenkera muntû ûûjû ûritîre ngûgî arî wa mûthia mbeecha ing'aneene na ciaaku.

¹⁵ Anga ntî na mma ya gûtumîra mbeecha ciaakwa ûrîa nkwenda? Kana ka ûkwigua rûriitho nîûntû ntî ngoga?’”

¹⁶ Jesû arathiria akiugaga, “Ûu nîu barîa barî ba mûthia bakaa ba mbere, na ba mbere, bae ba mûthia.”

Jesû kwaria kaîrî mantû jegiî gûkûa kwaawe

¹⁷ Rîrîa Jesû eetîte Jerusalemu, nî aireberie aritwa baawe barîa îkûmi na baîrî na arabeera,

¹⁸ “Thikîîreeni! Twîtîte Jerusalemu, na kûu Mûtaana wa Muntû agakunyanîrwa kîrî athînjîri-Mûrungu barîa anene na kîrî aritani ba Waatho. Nabo bakagiita îgamba atî ooragwe.

¹⁹ Bakamûnenkanîra kîrî antû barîa batî Ayahudi nîkenda bamûcikûûra na bamûûra ibooko na bamwamba. Ntukû ya ithatû yakinya akariûkua.”

Îromba rîa ng'ina wa Jakubu na Johana

²⁰ Rîu mwekûrû wa Zebedii areetania na ataana baawe kîrî Jesû na araturia maru mbere yaawe na aramûromba amwîtîkîîrie ûntû bûrîa akamûromba.

²¹ Jesû aramûûria, “Nî ûntû bûrîkû ûkwenda?” Mwekûrû aramûcokeria, “Îtîkîîria ataana baba baakwa bobaîrî bakare ûmwe rûteere rwaaku rwa ûrîo, na ûngî rûteere rwaaku rwa ûmotho Ûneneene bwaaku.”

²² Jesû areera mwekûrû ûu, “Buî bûtîkûmenya kîrîa bûkûromba. Bûkoomba kûûmîîria mîthangîko îrîa nkoona?” Nabo baramûcokeria, “Tûkomîîria.”

²³ Jesû arabeera, “Bwoomba kûûmîîria mîthangîko îrîa nkoona, îndî tî ngûgî yaakwa kûbugaîra itî rûteere rwaakwa rwa ûrîo kana rwa ûmotho. Barîa bakaewa itî biu nî barîa bathûûranîrîrwe bio nî Baaba.”

²⁴ Rîrîa aritwa bau bangî îkûmi baigîrue ûntû bûu nî baathûûrîre mono nî ataana bau bobaîrî.

²⁵ Tontû bûû, Jesû arabeeta bonthe amwe na arabeera, “Nî bûkûmenya atî athani ba mîgongo îrîa îtî ya Ayahudi bathaga antû baao na inya, na bakabainyîîria mono.

²⁶ Îndî buî bûtîbuîrîte kûthithagia ûu. Muntû wonthe ûrîa ûkwenda kwaa mûnene wa bangî kîrî buî, no mwanka atumîkîre bangî.

²⁷ Ningî ûrîa ûkwenda kwaa mûtongeeria weenu nî ae nkombo yeenu.

²⁸ Nîkwîthîrwa Mûtaana wa Muntû aateejîre gûtumîkîrwa, îndî eejîre nîkenda atumîkîra antû, na aeejana ûtûûro bwaawe bwonokia antû babaingî.”

Jesû kworia atumuumu baîrî

²⁹ Rîrîa Jesû na aritwa baawe baumagarîte Jeriko, nî baathingatîtwe nî antû babaingî.

³⁰ Rîu atumuumu baîrî barîa baakari nthî rûteere rwa njîra nî baigîrue atî Jesû nî akûrûkîrîîte au baarî. Tontû bûû barakaya bakiugaga, “Itû Mûtaana wa Daudi, twigîrue kîaao!”

³¹ Antû bau barageria kûbakiria, îndî bo bareeta na mbere bakiugaga, “Itû Mûtaana wa Daudi, twigîîrue kîaao!”

³² Jesû ararûngama, arabeeta na arabooria, “Nîatîa bûkwenda mbûthithîria?”

³³ Baramûcokeria, “Mwathani, tûma twambîrîrie kwona.”

³⁴ Jesû arabaigîîrua kîaao na araringithia meetho jaao, na o au barambîrîria kwona na baramûthingata.