Hosea 1 - NTETO INJEGA CIA MURUNGU KIRI ANTU BONTHE

Gwîtwa kwa Hosea

¹ Iji nîcio nteto irîa MWATHANI eerîre Hosea mûtaana wa Beeri, o rîrîa mûnene o ûmwe ûmwe wa anene baba aathanaga Juda: Uzia na Jothamu na Ahazi na Hezekia. Îgiita rîu Jeroboamu, mûtaana wa Jehoashi, nîwe waarî mûnene wa Israeli.

Mwekûrû na aana ba Hosea

² Rîrîa MWATHANI aarîîrie Israeli agîtumagîra Hosea, nî aamwîrîre atîrî, “Îta ûgûre mûka mûmaraya na ûgîe twaana twa ûmaraya nawe. Ûu nou antû ba nthîgûrû îîjî batiganîte na MWATHANI na bakathaathayia mîrungu îngî.”

³ Rîu Hosea areeta aragûra Gomeri, mwarî wa Dibilaimu. Gomeri aragîa îu, aramûciarîra kaîjî.

⁴ MWATHANI areera Hosea, “Kae riîtwa ûgeete Jezereeli, nîûntû nî kagiita gagakai gatîgeere nkanûkia mûnene wa Israeli wa mûciî jwa Jehu, nîûntû Jehu nî ooragîîre antû mono au gwîtagwa Jezereeli. Nkathiria waathani bwa mûciî jwaawe ndeene ya Israeli.

⁵ Ntukû îîu nkaathirîria mbûûtû cia Israeli kîguuruune kîa Jezereeli.”

⁶ Gomeri aragîa îu kaîrî, araciara kaarî. MWATHANI areera Hosea, “Kae riîtwa ûgeete ‘Kathûre’ nîûntû ntigîîrua antû ba Israeli kîaao kaîrî kana mbarekera.

⁷ Îndî nkoonia antû ba Juda wendo bwaakwa, naani ni MWATHANI Mûrungu waao nkaboonokia. Ntîboonokia na ûta kana rûchiû kana na ndwaa kana mbarathi kana eetithia ba mbarathi.”

⁸ Rîrîa Gomeri aatigîre gwonkia Loruhama, aragîa îu araciara kaîjî kangî.

⁹ MWATHANI areera Hosea, “Kae riîtwa ûgeete ‘Tî antû baakwa’ nîûntû antû ba Israeli tî baakwa kaîrî, naani ntî Mûrungu waao.”

Gûcokanîîrua kwa antû ba Israeli

¹⁰ Amwe na ûu, antû ba Israeli bakaa babaingî o ta mûthanga jwa îria, jûrîa jûtîûmba gûtarîka kana kûthimwa. Antû barîa bareetagwa Bûtî-Antû-Baakwa, îgiita nî rîîjîte rîrîa bageetwa Aana ba Mûrungu ûrîa ûtwîîre mwoyo.

¹¹ Antû ba Juda na ba Israeli bakagwatanîra kaîrî baithuurîre mûnene ûmwe, baume nthîgûrû cionthe irîa baathamîrîtue, tontû ntukû ya Jezereeli îkeethîrwa îrî ntukû înene.