Ezek 1 - NTETO INJEGA CIA MURUNGU KIRI ANTU BONTHE

Kîoneki kîegiî gîtî kîa ûnene kîa Mûrungu

¹ Kûrî ntukû ya ithaano ya mweri jwa îna mwakeene jwa mîrongo îthatû kuuma antû ba Israeli bagwikua kîthamîrioone, ûûni Ezekieli nî ndaarî rûteere rwa mûuro jwa Kebari, ndî amwe na atae bangî. Narîo îgûrû nî rîarugûrîrwe ndîroonua kîoneki kîegiî Mûrungu.

² Ntukû îîu ya ithaano ya mweri jûu, nîrîo mûnene Jehoiakini aathirîrie mîaka îtaano arî kîthamîrioone.

³ MWATHANI nî aambarîîrie ûûni mûthînjîri-Mûrungu Ezekieli mûtaana wa Buzi ndî nthîgûrûûne ya Babiloni rûteere rwa mûuro jwa Kebari. Ndî antû au nî ndoojûrîîrwe nî înya kuuma kîrî MWATHANI.

⁴ Naani nî ndaaciûkîrie meetho ndîroona ngai înene îîjîte kuuma bwa ûrîo. Naru rweni nî rwenagia mono kuuma îtuune rîrînene. Narîo îgûrû nî rîojûri weerû kunthe. Arîa rweni rwenagia kweenaenagia ta îturutia.

⁵ Ngaiine îîu nene nî ndoonere biûmbe bina birî mwoyo biang'uaneene na muntû.

⁶ Îndî o kîûmbe kîaarî na moothiû jana na mathagu jana.

⁷ Magûrû ja biûmbe biu jaarûngi ceeni na jaarî na nchaaû ta cia njaû. Nacio nchaaû iu cienagia ta îturutia rîthambîîtue.

⁸ Kinya këethîra o kîûmbe nî kîaarî na moothiû jana na mathagu jana, o kîûmbe nî kîeethagîrwa kîrî na njara ikari ta cia muntû o rungu rwa îthagu.

⁹ O kîûmbe kîrî mwoyo nî gîatambûrûkîîtie mathagu jaîrî. Najo jakaringithia mîthia ya mathagu ja biûmbe bingî birî mwoyo. Biûmbe biu birî mwoyo bieetaga birî amwe bitîkûgarûka. O kîûmbe kîu kîrî mwoyo gîtagarûkaga.

¹⁰ O kîûmbe kîrî mwoyo nî kîaarî na moothiû jana: ûthiû ta bwa muntû rûteere rwa mbere na ûthiû ta bwa ngatûnyi rûteere rwa ûrîo na ûthiû ta bwa ndeegwa rûteere rwa ûmotho na ûthiû bûkari ta bwa ndiiû rûteere rwa nyuma.

¹¹ Ûu nîu moothiû ja biûmbe biu jaakari. O kîûmbe kîu kîrî mwoyo nî gîatambûrûkîîtie mathagu jaîrî jakaringithia mathagu ja biûmbe bingî, najo mathagu jangî jaîrî gîgaikunîka najo mwîrî.

¹² O kîûmbe kîrî mwoyo nî gîeetaga na mbere gîtîkûgarûka o kûrîa roho aathuuraga. Biûmbe biu birî mwoyo bionthe bieetaga o rûteere rûrîa bikwenda bitîgûtinda kûgarûka.

¹³ Biûmbe biu birî mwoyo bionekaga bikari ta makara jagwakana. Naju mwanki nî jwaumaga kîrî kîûmbe kîrîa kîrî mwoyo kîmwe jûgeeta kîrî kîngî. Naju jwathaaraga jûkîenagia ta rweni.

¹⁴ Nabio biûmbe biu birî mwoyo nî bieetaga na bigacoka na mpwîî ta rweni.

¹⁵ Naani ntegeete biûmbe biu birî mwoyo o ûu nî ndoonere magûrû jana jakarî ta magûrû ja baisikiri jakinyîte nthîgûrû, o kûgûrû kûrî rûteere rwa kîûmbe kîu kîrî mwoyo.

¹⁶ Magûrû jau jaakari ta ja baisikiri jeenaenagia ta maiga ja goro, na jaakari o ûmwe. Najo jaathithîtue kûgûrû kûrî ndeene ya kûngî.

¹⁷ Najo jatua gwîta jeetaga o rûteere rûrîa jageeta jatîkûgarûka.

¹⁸ Nacio nteere cia magûrû jau jo jana nî ciojûri meetho kûthiûrûkîra.

¹⁹ Rîrîa biûmbe biu birî mwoyo bieetaga, nî bieetanagia na magûrû jau jaakari ta ja baisikiri jarî rûteere rwaabio. Biokîîra biitîtie bwa îgûrû magûrû jau jagookanîîria nabio.

²⁰ Roho wa biûmbe biu birî mwoyo nî aarî magûrûûne jau. Tontû bûû, magûrû jau jeetaga o kûrîa roho wa biûmbe biu birî mwoyo aathuuraga.

²¹ Rîrîa biûmbe biu birî mwoyo bietaga, kinya jo nî jeetaga. Biarûngama kinya jo nî jaarûngamaga; na biabuurûka kuuma nthîgûrû; kinya jo nî jaabuurûkaga, nîkwîthîrwa roho wa biûmbe biu birî mwoyo nî aarî magûrûûne jau.

²² Îgûrû rîa mîtwe ya biûmbe biu birî mwoyo, nî kwaarî na gîntû gîakûmari gîtegeete bwa nthî nusu kîthiûrûrî, nakîo kîenagia ta nkamia na nî gîekanagîra ûguaa.

²³ Biûmbe biu birî mwoyo nî biaarûngami rungu rwa gîntû kîu gîakûmari gîtegeete bwa nthî nusu kîthiûrûrî. O kîûmbe gîtambûrûkîtie mathagu jaîrî jeerekerete kîûmbe kîrîa kîrî akuî nakîo, na gîgaikunîka na mathagu jangî jaîrî.

²⁴ Rîrîa biîtîte nî ndaaigagua mathagu jaabio jakîringana jakagamba ta rûûjî rûrûnene, kana ta ngorogoro kuuma kîrî Mweneinya kana mûrurumo jwa njûûrî înene. Nabio biarûngama nî biakûûnjaga mathagu.

²⁵ Ningî biarûngama bikûnjîte mathagu, nî kweethagîrwa kûrî na gîntû gîakûmari gîtegeete bwa nthî nusu kîthiûrûûri îgûrû rîa mîtwe ya bio, na kajû gakaaria kuuma îgûrû rîa gîntû kîu gîakûmari.

²⁶ Îgûrû rîa gîntû kîu gîakûmari nî kwaarî na gîntû gîakari ta gîtî kîa ûnene kîthithîtue na maiga ja goro ja rangi ya wiirû bwa îgûrû. Gîntû gîakari ta muntû nî gîaakarîrîte gîtî kîu kîa ûnene.

²⁷ Kuuma arîa gwakari ta kauna kaawe gwitia nî kwaarî na gîntû gîakari ta îturutia rîkwenaenia, na ta mwanki jûmûthiûrûkîrîte. Ningî kuuma au gwakari ta kauna kaawe kwînama, nî kwaarî na gîntû gîakari ta mwanki gîkûthaara kîmûthiûrûkîrîte.

²⁸ Weerû bûu bwakari ta mûkûngambura rîrîa gûkwenda kuura. Ûu nîu ndoonere mwago jwa MWATHANI jûkari, na ndîraaturia maru na ndereenamîîria ndîratirithia ûthiû nthî na ndîraigua kajû ka muntû gakîaria.