Danieli 9 - NTETO INJEGA CIA MURUNGU KIRI ANTU BONTHE

Danieli kûrombera antû baao

¹ Dario ûrîa Mûmede, mûtaana wa Aritashashita nî aathanaga ûnene bwa Babiloni.

² Mwakeene jwa mbere jwa waathani bwaawe, ûûni Danieli nî ndaathomere maukuune mîaka îrîa MWATHANI augîîte na njîra ya kîroria Jeremia îkaathira rîu Jerusalemu îthirue buru. Mîaka îîu yaarî mîrongo mûgwanja.

³ Naani ndîraromba MWATHANI Mûrungu nkîmwerencaga, na kûmûkaîra, na ndîraciata biakûrîa, na ndîreekîra ithango, na ndîraigerera mûju.

⁴ Ndîraromba MWATHANI Mûrungu waakwa, nkiumbûraga meeyia ja antû, ndîrauga atîrî, “Gwe MWATHANI Mûrungu mwene inya, Gwe wîkaga kîrîkanîro na ûkenda na wendo bûrîa bûtîthiraga, antû barîa baakwendeete na bamenyagîîra maathana jaaku.”

⁵ Tuî nî twîîtie, twathithia jarîa jatîagîrîte, na jamathûûku, na twagîa îrema, twautatîra maathana jaaku na mawaatho.

⁶ Tuî tûtîthikagîîra nthûûmba ciaaku iroria, barîa baaragîria anene, na atongeeria na biûjûjû bieetû, na antû bonthe ba nthîgûrû riîtweene rîaaku.

⁷ Gwe MWATHANI ûthithagia mantû jarîa jaagîrîte. Îndî tuî ga twireteereete nthao ta ûrîa tûkari naarua. Ningî nou antû ba Juda, na atûûri ba Jerusalemu, na Aisraeli bonthe, barîa barî akuî na barîa barî kûraaja nthîgûrûûne îrîa waabeengîrîîrie, bakari, nîûntû bwa ûthûûku bûrîa bakûthithîrîtie.

⁸ Tuî MWATHANI amwe na anene beetû, na atongeeria beetû, na biûjûjû bieetû, tûrî na nthao nîûntû bwa ûrîa tûkwîîrîtie.

⁹ MWATHANI Mûrungu weetû nî wa kîaao, na nî wa ûrekanîri; kinya këethîra tuî nî tûmûremeete.

¹⁰ Tuî tûtîathîkîrîte kajû ka MWATHANI Mûrungu weetû, tûthingata Waatho bûrîa twanenkeerwe nî nthûûmba ciaawe iroria.

¹¹ Antû ba Israeli bonthe nî baunîte Waatho bwaaku bagarûka batiga kwathîkîra kajû gaaku. Nakîo kîrumi na mîciîtio birîa biaandîki Waathoone bwa Musa nthûûmba ya Mûrungu nî bitûîjîîrîte nîûntû nî tûîîtie kîrî gwe.

¹² Mûrungu gwe nî ûûjûrîtie mantû jarîa waugîre ûgaatûthithîria amwe na anene beetû, waatûreetera mîthangîko îmînene. Nîkwîthîrwa nthîgûrûûne kunthe gûtî gûntû kûngî kwathithîrua ûrîa Jerusalemu îthithîrîtue.

¹³ O ta ûrîa kwaandîki Waathoone bwa Musa, ûthûûku bûbû bunthe bûtwîjîîrîte, îndî amwe na ûu tûtîcwîte wega bwa MWATHANI Mûrungu weetû na njîra ya gûtigana na meeyia jeetû na kûthingata ûûma.

¹⁴ Tontû bûû, ûtûreteereete ûthûûku bûrîa ûtwîre ûtûthuranîrîte, nîûntû gwe MWATHANI Mûrungu weetû ûrî ûmwagîru mantûûne jonthe jarîa ûthithagia, naatuî tûtîathîkîrîte kajû gaaku.

¹⁵ “Nandî rî, MWATHANI Mûrungu weetû, gwe waaritîre antû baaku nthîgûrûûne ya Misri na inya înene, watûma riîtwa rîaaku rîagîa îgweta ta ûrîa rîkari kinya naarua tûrî. Tuî nî tûîîtie na mathithio jeetû nî jamaaî.

¹⁶ Itû MWATHANI nîûntû gwe ûthithagia mantû jamaagîru, tiga kûng'eenta na kûthûûra nîûntû bwa ntûûra ya Jerusalemu, tayo kîrîma gîaaku gîkîtheru. Nîkwîthîrwa Jerusalemu na antû baaku batuîkîte gîntû gîa kûmeneerua nî barîa bonthe batûthiûrûkîrîte nîûntû bwa meeyia jeetû na ja biûjûjû bieetû.

¹⁷ Tontû bûû, itû Mûrungu weetû igua maromba ja nthûûmba yaaku jarîa îgûkûromba. Itû MWATHANI nîûntû bwaaku wengwa tûma kîûrû gîaaku kîrîa kîthûûkangîtue gîaakwe kaîrî.

¹⁸ Itû Mûrungu kiinda gûtû wigue, na ûtege woone mîthangîko yeetû, na ntûûra îrîa îgwetanagîrua na riîtwa rîaaku. Tuî tûtîkûromba nîûntû ka tûrî babaagîru mono, îndî nîûntû gwe ûrî kîaao gîkiingî.

¹⁹ Itû MWATHANI twigue! Itû igua maromba jeetû ûtûrekere. Itû MWATHANI ûkathaa ûtîrathithia ûntû nîûntû bwa riîtwa rîaaku, gwe MWATHANI Mûrungu waakwa. Nîkwîthîrwa ntûûra îîjî yaaku na antû baaku nî bagwetanagîrua na riîtwa rîaaku.”

Gabrieli kwîrana ûrîa ûroria bûu bûkuuga

²⁰ Naani nkîrombaga, na kuumbûra meeyia jaakwa na ja antû beetû ba Israeli o ûu, na nkîrombaga MWATHANI Mûrungu waakwa nîûntû bwa kîrîma kîrîa kîtheru kîa Mûrungu waakwa;

²¹ nkîrombaga o ûu Gabrieli ûrîa ndooneete kîonekiine kîa mbere nî eejîre kîrî ni îgiita rîa kîgongwana kîa ûgoro aburûûkîte.

²² Nawe areeja arambîîra atîrî, “Gwe Danieli, ndîkwîja gûkwaa ûûme na ûmenyo.

²³ Rîrîa ûkûrombaga kûrî ûntû ûcokeerue na nîbu ndeeja gûkwîra, nîûntû gwe nî wendi mono. Tontû bûû, thikîîra rûteto ûmenye ûrîa kîoneki gîkuuga.

²⁴ “Mûrungu nî augîîte mîaka mîrongo mûgwanja mainda mûgwanja nîjo eekîte ja kûthaûra antû beenu, na ntûûra yeenu îrîa ntheru kuuma meeyiene na ûthûûkuune. Meeyia jakarekerwa na waagîru bwîthagîrwe bûrî o magiita jonthe, nîkenda kîoneki na ûroria bûbû bûkoojûra, na kîûrû kîrîa kîtheru gîaakwe.

²⁵ “Tontû bûû, menya na mma atî kuuma rîrîa Jerusalemu îkeerwa yaakwe mwanka rîrîa mwîtûûrîrua maguta mûnene akeeja mîaka mûgwanja mainda mûgwanja Jerusalemu îgaakwa amwe na njîra ciaayo na nthingo indîkie, na îgakara o mîaka mîrongo îtaantatû na îîrî mainda mûgwanja, îndî îgiita rîu rîkeethîrwa rîrî rîa mîthangîko.

²⁶ Nyuma ya îgiita rîu mwîtûûrîrua maguta ûu akooragwa; na gûtîkîo akooragîrwa. Ntûûra na kîûrû bikaathirua nî njûûrî înene ya barîa bakaithûkîra. Mûthiro jûkeeja ta îkoondoria rîa mûguû, rîreete ndwaa na kwînyangua kûrîa Mûrungu augîrîte.

²⁷ Mûnene ûu ageekanîra kîrîkanîro na antû babaingî îgiita rîa mîaka mûgwanja, na nusu ya îgiita rîu yaathira akathiria kûritwa kwa igongwana na biewa. Mûrungu jwa mûng'uanano jûkarûngîkwa kîûrûûne arîa atheru, najû jûgakara o mwanka rîrîa ûrîa ûkajûrûngîka akaathirua ta ûrîa Mûrungu augîîte.”