Danieli 7 - NTETO INJEGA CIA MURUNGU KIRI ANTU BONTHE

Danieli kwona nyamû inya kîrootoone

¹ Kûrî mwakeene jwa mbere jwa waathani bwa Belishaza mûnene wa Babiloni, Danieli nî aarootere na aroona kîoneki amami gîtandeene kîaawe ûtukû. Nawe nî aandîkîre kîrooto kîu akîonanagia ûrîa gîakari.

² Danieli aandîkîre arauga atîrî, “Nî ndoonere kîoneki ûtukû mami, ndîroona ruuo rwa nteere cio-inya cia nthîgûrû rûkiurutana îrieene rîrîa rînene.”

³ Nyamû inya înene mono nî ciaumîîre îrieene, nacio itang'uaneene.

⁴ Nyamû ya mbere yakari ta ngatûnyi îndî yaarî na mathagu ta ja ndiiû. Mîraithîîrîtie o ûu, mathagu jau jarakûûrwa, na îrookîîrua îrarûngamua na magûrû jaîrî ta muntû. Ningî nyamû îîu îreekîrwa mathûgaanio ta ja muntû.

⁵ “Ningî rî, nyamû ya ijîîrî yaakari ta ndûû. Nayo yarûngami na rûteere rûmwe; na nî yaarûmîte mbaru ithatû na maîgo. Nayo îreerwa atîrî, ‘Îta ûrîe nyama inyiingî.’”

⁶ Nyuma ya ûu ndîraraithîîria ndîroona nyamû îngî îkari ta nkarî, îrî na mathagu jana; mathagu jau jakari ta ja nyoni. Nyamû îîu yaarî na mîtwe îna, na nî yaanenkeri waathani.

⁷ Nyuma ya ûu nî ndoonere nyamû ya inya. Nayo yaarî nyamû îmbîî buru na ya kûmakania, na yaarî na inya înene mono, na maîgo jamanene ja chuuma. Nakîo kîonthe kîrîa yooragaga nî yatambûrangaga na nî yaarîjaga na îgakinyanga kîrîa gîatigaraga na magûrû. Nî yaarî na ngoji îkûmi, nayo yaarî mwanya buru na nyamû ingî cionthe irîa ndaarî ndîkwona.

⁸ Naani ndaithîîrîtie ngoji iu, nî ndoonere karûgoji kauma gatîgatîîne ka ngoji iu ingî. Karûgoji kau karakûra ngoji ithatû îrîa ciaarî o. Karûgoji kau kaarî na meetho ta ja muntû, na nî kaarî na kanyua kaaragia mantû ja gwikumia.

Kîoneki kîegiî ûrîa ûtwîre o kenya na kenya

⁹ Ndaraithîîria o ûu, ndîroona ndûriga ciarûngîkwa. Nawe ûrîa ûtwîre o kenya na kenya arakarîra rûriga rwaawe. Ningî nî eekîrîte nguû injerû ta nkamia, na mûtuundu jwa mûtwe jwaawe jwatheri jûkeerûa ta bamba. Naru rûriga rwaawe rwaarî na magûrû jaakanaga mwanki.

¹⁰ Naju mûuro jwa mwanki jûraumîra au mbere yaawe. Antû ngiri mangiri nî ciamûtumîkagîra, na bangî ngiri îkûmi mainda ngiri îkûmi ciarûngami mbere yaawe. Najo mauku jarakunûrwa îgamba rîraambîrîria.

¹¹ Naani ntegeete o ûu, no ndaigagua nteto irîa rûgoji rwaragia cia gwikumia. Naani ndaithîrîîtie o ûu, nyamû îîu îrooragwa na kiimba kîaayo kîreenyangua na kîranenkanîrwa kîîthîîrua na mwanki.

¹² Nacio nyamû iu ingî iratunywa waathani, îndî ûtûûro bwaacio bûroongeerwa nîkenda ikara o kagiita gagakai.

¹³ “Naani kîrootoone ûtukû nî ndoonere kîonekiine muntû ûkari ta mûtaana wa muntû arî îtuune. Nawe nî eetîre kîrî ûrîa wa ntwîre, aroonanua kîrî ûu wa ntwîre.

¹⁴ Muntû ûu aranenkerwa waathani, na ûnene, na ûkumio, nîkenda antû bonthe, ba nthîgûrû cionthe, na nthiomi cionthe bamûtumîkagîra. Waathani bwaawe nî bwa kenya na kenya, nabu ûnene bwaawe bûtîkorothirua kinya rî.”

Ûrîa kîoneki kîu kîaugaga

¹⁵ “Ûûni Danieli nî ndaathîînîre nkoroone mono, ndîrarigarua mono nî kîoneki kîu.

¹⁶ Ndîrakuîrîria ûmwe wa barîa baarûngami au ndîramwîra ambîîre ûûma bwa mantû jau jonthe. Tontû bûû, arambîîra ûrîa mantû jau jakari na ûrîa jaugaga.

¹⁷ Arambîîra atîrî, ‘Nyamû iji nene cio-inya nî anene bana barîa bakathana nthîgûrûûne.

¹⁸ Nabo atheru ba Ûrîa Ûrî Îgûrû buru nîbo bakaajûkia ûnene bûtuîke bwaao kenya na kenya.’”

¹⁹ Naani nî ndeendere kûmenya ûûma bwa nyamû ya inya irîa yaarî na mwanya na nyamû ingî cionthe. Nyamû îîu yaarî îmbîî mono nayo nî yaathiragia barîa yaagwataga na nkunyû ciaayo cia îturutia na maîgo jaayo ja chuuma, îkabakinyangîra nthî buru.

²⁰ Ningî nî ndeendaga kûmenya bwa ngoji îkûmi irîa ciaarî mûtwe jwaayo na bwa karûgoji karîa kaumîte nyumeene karakûûra ngoji ingî ithatû. Karûgoji kau karîa kaarî na meetho na mûromo na nî kaaragia nteto cia gwikumia. Nako nî kaamakanagia nkûrûki ya ngoji ingî cionthe.

²¹ Ntegeete o ûu karûgoji kau karaambîrîria kûrwaa na atheru, nako nî kaboombaga.

²² Mwanka rîrîa Ûrîa wa ntwîre eejîre aragiita îgamba atî atheru ba Ûrîa Ûrî Îgûrû buru nîbo barî ûûmeene. Îgiita nî rîaakinyîre atheru baranenkerwa ûnene.

²³ “Ningî arambîîra mantû jegiî nyamû ya inya, atîrî, ‘Gûkeethîrwa kûrî na waathani bwa jana nthîgûrûûne nabu bûkeethîrwa bûrî mwanya buru na moonene jangî jonthe. Nabu bûkaathiria nthîgûrû yonthe bûmîtuutie nthî, bûmîgitange tûchunchî tûchunchî.

²⁴ Nacio ngoji irîa îkûmi nî anene îkûmi barîa bakaatha ûnene bûu. Nawe mûnene ûngî akaumîra, na akeethîrwa arî mwanya buru na anene bau bangî, na akarita anene barîa bathatû waathaniine.

²⁵ Mûnene ûu akaaria mantû jatîbuui jegiî Ûrîa Ûrî Îgûrû buru, na akainyîîria athani ba Ûrîa Ûrî Îgûrû buru, na akageria kûgarûra biatho na waatho bwa îgiita rîu. Nabo antû ba Mûrungu bakaanenkanîrwa kîrî mûnene ûu îgiita rîa mîaka îthatû na nusu.

²⁶ Îndî koti îgakara nthî îmûgiitîre îgamba, nawe atuunywe waathani, na ûnene bwaawe bûthirue buru.

²⁷ Îndî waathani na inya ya mîgongo yonthe ya nthîgûrû îkanenkanîrwa kîrî antû babatheru ba Ûrîa Ûrî Îgûrû buru, nabu wathani bwaao bûgaatûûra kenya, na mîgongo yonthe îkaabatumîkagîra na kûbaathîkîra.’

²⁸ “Jûjû nîju mûthia jwa mantû jau. Ûûni Danieli nî ndaamakîre mono nî mantû jau ndîratuka ûthiû, îndî ndîreeka mantû jau nkoroone.”