Danieli 6 - NTETO INJEGA CIA MURUNGU KIRI ANTU BONTHE

Danieli arî îrinyeene rîa ngatûnyi

¹ Dario nî oonere kwagîrîte athuura nchaama cia kûrûngamîîra nthîgûrû yonthe îrîa aathaga.

² Ningî arathuura arûngamîîri ba nchaama iu bathatû, na ûmwe waabo aarî Danieli. Nchaama iu nîcio ciamenyagîîra mantû ja mûnene jatîkathûûke, mûnene atîkeeje kwona ûntû bûbûthûûku.

³ Danieli ûu nî oonanîrie akîûmbaga ngûgî nkûrûki ya arûngamîîri bau bangî na nkûrûki ya nchaama cionthe, nîûntû nî aarî na Roho wa kûrita ngûgî bwega. Mûnene arabanga kûmwethia mûtongeeria wa nthîgûrû yonthe îrîa aathaga.

⁴ Nabo arûngamîîri bau bangî amwe na nchaama nî baacwîre ûntû bwegie ûtongeria bwa nthîgûrû îîu bwa kûthûûkia Danieli kîrî mûnene, îndî baraaga bwa kûmûthûûkia nabu na baraaga yaatia noo rîmwe. Nîkwîthîrwa Danieli aarî mwîtîkua na ataarî na yaatia noo rîmwe.

⁵ Antû bau nîrîo baugîre atîrî, “Tûtîona ûntû bûbûthûûku bwa kûthitangîra Danieli, tiga tûgacwaa ûntû bwegiî Waatho bwa Mûrungu waawe.”

⁶ Tontû bûû, arûngamîîri bau na nchaama bararîîkania bareeta kîrî mûnene baramwîra atîrî, “Gwe mûnene Dario ûrotûûra kenya!

⁷ Arûngamîîri baba ba nthîgûrû bonthe, na nchaama, na barîa baeejanaga kîrîra, na atongeeria bangî nî beetîkanîrîtie atî mûnene nî arite Waatho na auge bûthingatwe bûtîkaunwe. Waatho bûu buuge, ‘Menya muntû kinya ûrîkû aromba mûrungu kinya jûrîkû kana aromba muntû ûngî kinya ûrîku tiga gwe gwenka antû a ntukû mîrongo îthatû. Nawe ûrîa ûkauna Waatho bûu itû mûnene, nî agerwe îrinyeene rîa ngatûnyi.’

⁸ Nandî rî, itû mûnene andîkithia Waatho bûu na ûbûringe mûûri nîkenda bûtîkeeje kûgarûrwa, kûringana na waatho bwa Amedia na Aparasia bûrîa bûtîgarûragwa.”

⁹ Tontû bûû, mûnene Dario araringa mûûri Waatho bûu.

¹⁰ Rîrîa Danieli aamenyere atî Waatho bûu bûgwîkîrwa caini, nî aatonyere nyomba yaawe. Araitia kanyomba ka îgûrû karîa karî na ndiricha ciarugûri cierekerete Jerusalemu. Nawe nî aarombaga jathatû o ntukû. Aarombaga agîkaathaga Mûrungu waawe o ta ûrîa aathithagia mbereene.

¹¹ Rîu antû bau baarî na nkireba nî beetîre bareethîra Danieli akîrombaga na kwerenca Mûrungu waawe.

¹² Nabo bareeta kîrî mûnene baramwîra atîrî, “Itû mûnene! Anga gwe ûteekîîre Waatho caini bûrîa bwaugaga atî muntû ûrîa ûkaromba mûrungu jûngî kana muntû ûngî tiga gwe wenka ntukû mîrongo îthatû itîthiri, muntû ûu akagerwa îriinyene rîa ngatûnyi?” Mûnene nawe aracokia arauga, “Waatho bûu bûtîûmba kûgarûrwa, kûringana na waatho bwa Amedia na bwa Aparasia, bûrîa bûtîgarûragwa.”

¹³ Nabo antû bau baramûcokeria atîrî, “Danieli ûrîa ûmwe wa atae ba kuuma Juda atîathîkîrîte Waatho bûu wîkîrîte caini, kana akwathîkîra gwe mûnene! Îndî we arombaga jathatû o ntukû.”

¹⁴ Rîrîa mûnene aaigîrue nteto iu, nî aathangîkîre mono, na arathûgaania njîra ya kwonokia Danieli. Aracwaa ûrîa akûthithia mwanka kûratuka.

¹⁵ Rîu antû bau beekîte nkireba bareeta kîrî mûnene baramwîra atîrî, “Mûnene itû menya atî bûbû nî waatho bwa Amedia na bwa Aparasia bûrîa bûtîûmba kûgarûrwa bunka mûnene arîkîtie kûbûrita.”

¹⁶ Rîu mûnene arauga Danieli areetwe na agerwe îrinyeene rîa ngatûnyi. Mûnene areera Danieli atîrî, “Mûrungu ûrîa ûtumîkagîra magiita jonthe arokwonokia!”

¹⁷ Narîo iiga nî rîekîrwe mûromoone jwa îrinya rîrainga. Mûnene nawe araringa mûûri jwaawe iigeene rîu na kinya atongeeria baawe bararinga mîûûri yaao iigeene rîu, nîkenda gûtî muntû ûteethia Danieli.

¹⁸ Mûnene aracoka gîkaroone kîaawe, ararara atîrûmîte gantû. Gûtî mantû jakûmûgwîria athithîrue ûtûkû bûu na atoonere toro.

¹⁹ Gûgûkîa, mûnene arookîîra areetanga na mpwîî îrinyeene rîa ngatûnyi.

²⁰ Nawe akuîîria îrinya rîa ngatûnyi rîrîa Danieli aarî, areeta Danieli na kajû gakanene aithikîrîte mono, aramwîra atîrî, “Itû Danieli, nthûûmba ya Mûrungu ûrîa ûrî mwoyo, Mûrungu waaku ûrîa ûtumîkagîra magiita jonthe, agûkwonokia kuuma kîrî ngatûnyi?”

²¹ Danieli areera mûnene atîrî, “Gwe mûnene ûrotûûra mwanka kenya.

²² Mûrungu waakwa atûmîte mûraîka waawe, akunika ngatûnyi tûnyua, nacio gûtî ûntû bûbûthûûku iranthithîria, nîûntû ûûni meethoone jaawe ndîoneka ntîthûûkîtie. Ningî kinya kîrî gwe mûnene gûtî ûntû nthithîtie bûbûthûûku.”

²³ Rîu mûnene nî aagwîrîrue mono arauga Danieli aritwe îrinyeene rîa ngatûnyi, nawe gûtî ûntû aathithîrîtue nî ngatûnyi bûbûûî noo atîa, nîûntû we nî eetîkîtie Mûrungu waawe.

²⁴ Mûnene arauga antû barîa baathitangîte Danieli bareetwe bagerwe îrinyeene rîu rîa ngatûnyi. Nabo antû bau, amwe na aka baao, na aana baao baragerwa îrinyeene, na kinya mbere ya bagwa îrinyeene nthîgûrû, ngatûnyi nî ciaarî ikûbakiinda ciabatambûranga na kûbaunanga mîrûitû yaao tûchunchî tûchunchî.

²⁵ Rîu mûnene Dario araandîkîra antû bonthe ba mîgongo yonthe, na nthiomi cionthe barîa baatwîre nthîgûrûûne yonthe arauga atîrî, “Jûkieni nkeethî!

²⁶ Ûûni ngwîka waatho bwa kuuga atî nthîgûrû kunthe kûrîa mbathanaga, antû bakîrage na batîaage Mûrungu wa Danieli. Nîkwîthîrwa nî Mûrungu ûrîa ûrî mwoyo, ûrîa ûtûûraga kenya na kenya. Ûnene bwaawe bûtîkorothirua kana waathani bwaawe bûkinya mûthia.

²⁷ Nîwe ûtunyûkagia na akoonokia; athithagia mantû ja kûrigaria na akaringa biama gûkû nthîgûrû na îgûrû na nîwe woonoketie Danieli kuuma kîrî ngatûnyi irî na inya.”

²⁸ Tontû bûû, Danieli arathinyaara rîrîa Dario aathanaga na îgiita rîa waathani bwa Koreshi ûrîa Mûparasia.