Danieli 5 - NTETO INJEGA CIA MURUNGU KIRI ANTU BONTHE

Kîatho kîa Belishaza

¹ Mûnene Belishaza nî aathithîrie kîatho gîkînene na areeta atongeeria ngiri îmwe baranyunyanîra ndibei amwe.

² Belishaza akûnyua ndibei, ararita Waatho atî into bia thaabu na fetha birîa îthe Nebukadineza aataîre kuuma kîûrûûne kîa Jerusalemu bigîîrwe nîkenda mûnene, na atongeeria bau bangî, na aka baawe, na aka baawe ba gwîka banyua nabio.

³ Rîu into biu bia thaabu na bia fetha, birîa biajûkîtue kuuma kîûrûûne kûu Jerusalemu birareetwa. Mûnene amwe na atongeeria bangî, na aka baawe, na aka baawe ba gwîka baranyua nabio.

⁴ Baranyua ndibei na barakumia mîrungu îrîa yathithîtue na thaabu na fetha na îturutia na chuuma na mîtî na maiga.

⁵ O rîu njara îraumîra îraandîka rûthingoone rwa gîkaro kîa mûnene au kwerekana na gîtugî gîa kûrîkîîra taawa na mûnene aroona njara îîu îkîandîkaga.

⁶ Mûnene aratuka ûthiû na araagwatwa nî ûguaa mono, mwanka magûrû jaawe jarambîrîria gûteetema, jakîringanagîra maru.

⁷ Mûnene areetana nainya arauga aringi-biama, na Ababiloni, barîa boome, na barîa baijî mantû ja njota beete kîrî we. Mûnene areera antû barîa boome ba Babiloni atîrî, “Muntû ûrîa ûkaanthomera mwandîko jûjû na ambîîre ûrîa jûkuuga ageekîrwa nguû cia mûkû, na mûkathî jwa thaabu nkingo, na atuîke wa bathatû kîrî ûnene nthîgûrûûne.”

⁸ Rîu antû ba mûnene barîa boome baraumîra, îndî bararemwa nî kûthoma mwandîko na bararemwa kûmwîra ûrîa jûkuuga.

⁹ Mûnene Belishaza nî aatukîre ûthiû athîînîte mono; na kinya atongeeria baawe bataarî na bwa kûthithia.

¹⁰ Ng'ina wa mûnene nîûntû nî aarî akwigua tûjû twa mûnene na atongeeria baawe, areeta nyomba îîu yaarî na kîatho arauga atîrî, “Mûnene arotûûra kenya! Menya withîînia na kûthûgaania kana ûtuka ûthiû.

¹¹ Ndeene ya nthîgûrû yaaku kûrî na muntû ûrî na Roho wa mîrungu. Rîrîa abaagu aathanaga, muntû ûu nî aarî na ûmenyo, na ûûme ta bwa mîrungu. Abaagu Nebukadineza nî aamweetherie mûrûngamîîri wa aringi-biama, na aringia, na Ababiloni barîa boome, na barîa baijî mantû ja njota,

¹² nîûntû nî oonerwe arî na Roho ûmwega buru wa ûmenyo, na ûûme bwa kûmenya ûrîa irooto bikuuga, na ûrîa ntaî ikuuga, na bwa kûthiria mathîîna jamaingî. Muntû ûu Danieli nîwe mûnene aaere riîtwa Beliteshaza. Nandî rî, Danieli nî eetwe akwîre ûrîa mwandîko jûu jûkuuga.”

Danieli kwîrana ûrîa mwandîko jûkuuga

¹³ Danieli nî aareeterwe kîrî mûnene. Mûnene aramwîra atîrî, “Nîgwe Danieli, ûmwe wa atae barîa ba kuuma Juda, barîa baaba aareetere kuuma Juda?

¹⁴ Nî mbigîtue nteto ciaaku atî Roho wa mîrungu arî ndeene yaaku, na atî ûrî na ûmenyo na ûûme bwa kûrigaria.

¹⁵ Nandî rî, antû barîa boome na aringia, nî barîîkîtie kûreetwa mbere yaakwa nîkenda banthomera mwandîko jûjû na bambîîra ûrîa jûkuuga. Îndî batîroomba kûmbîîra ûrîa ûntû bûu bûkuuga.

¹⁶ Îndî nî mbigîîtue woomba kûmenya ûrîa mantû jakari na nî wiijî kûthiria thîîna inyiingî. Nandî rî, woomba kûnthomera mwandîko jûjû na wambîîra ûrîa jûkuuga ûgeekîrwa nguû cia mûkû na wîkîrwe nkingo yaaku mûkathî jwa thaabu na ûtuîke muntû wa bathatû kîrî ûnene nthîgûrûûne îîjî mbathaga.”

¹⁷ Rîu Danieli areera mûnene atîrî, “Kara na biewa biaaku, ûbiejane kîrî muntû ûngî ûrîa gwe ûkeenda; îndî nkathomera mûnene mwandîko na mwîre ûrîa jûkuuga.

¹⁸ Mûrungu Ûrîa Ûrî Îgûrû buru nîwe waanenkeere abaagu Nebukadineza waathani na ûnene na ûkumio, na inya.

¹⁹ Tontû bwa ûnene bûu aamûnenkeere, antû ba mîgongo yonthe, na ba nthiomi cionthe beetaga mbere yaawe bagîteetemaga. Arîngîkwenda kûûraga muntû, kana gûtigia muntû mwoyo, kana kûaa muntû gîtîîo, kana gwîkîrithia muntû nthao, no u aathithagia atîkwona wa kûmûûria ûntû.

²⁰ Îndî rîrîa aikumîrie mono, na aroomia nkoro mono arathûûka, nawe araritwa ûnenene na aratunywa mwago jwaawe.

²¹ Nawe areengwa kuuma kîrî antû aragîa mathûgaanio ta ja nyamû cia kîthaka. Aambîrîîrie kûrîjaaga nyaki ta ndeegwa, na aragwîrwa nî îme, mwanka rîrîa aamenyere atî Mûrungu Ûrîa Ûrî Îgûrû buru, nîwe weejanaga ûnene kîrî antû, akaabûnenkanîra kîrî o muntû ûrîa akwenda.

²² Naagwe mûtaana waawe Belishaza ûtiinyiîtie nkoroone kinya keethîra nî ûkûmenya jaja jonthe.

²³ Gwe ûciûkîîrîtie na rwikumio îgûrû rîa MWATHANI Mûrungu Mweneinya ûrîa ûrî îgûrû. Wauga ûreeterwe into birîa bitumagîrwa nyomba ya MWATHANI; naagwe amwe na atongeeria baaku, na aka baaku, na aka baaku ba gwîka bwanyua ndibei nabio. Ningî ûgûkumia mîrungu ya thaabu na ya fetha, na ya îturutia, na ya chuuma, na ya mîtî, na ya maiga îrîa îtîûmbaga kwona, kana kwigua, kana kûmenya ûntû. Îndî gwe ûtîkumagia Mûrungu ûrîa ûkweete mwoyo, na ûmenyagîîra mîîtîre yaaku yonthe.

²⁴ Kîu nîkîo gîtûmi areeta njara yaandîka rûthingoone.

²⁵ “Mwandîko jûu jwaandîki mantû jaja: MENE, MENE, TEKELI, na PARASINI.

²⁶ Mwandîko jûjû naju jûriuga ûjû: MENE nî kuuga Mûrungu nî atarîte ntukû îrîa waathani bwaaku bûgaakara mbere atîrabûthiria;

²⁷ TEKELI nî kuuga ûûgwe nî ûthimi kîthimine wooneka ûtî na ûrito bwa kûng'ana;

²⁸ PERESI nî kuuga nthîgûrû îrîa waathaga nî îgaanîtue yaanenkanîrwa kîrî Amedia na Aparasia.”

²⁹ Rîu Belishaza arauga Danieli eekîrwe nguû cia mûkû, na eekîrwe nkingo yaawe mûkathî jwa thaabu na gûtûmîîrua mantû jamwegiî atî nîwe muntû wa bathatû kîrî ûnene nthîgûrûûne îîu.

³⁰ O ûtukû bûu bungwa mûnene Belishaza ûu Mûkalidea arooragwa.

³¹ Dario ûrîa Mûmede araa mûnene wa nthîgûrû îîu arî na ûkûrû bwa mîaka mîrongo îtaantatû na îîrî (62).