Danieli 3 - NTETO INJEGA CIA MURUNGU KIRI ANTU BONTHE

Mûnene Nebukadineza kuuga antû bonthe bathathayie gîtugî kîa thaabu

¹ Mûnene Nebukadineza nî aathithîrie gîtugî kîa thaabu kîa ûraaja bwa mita mîrongo îthatû (30m) gwitia bwa îgûrû, na mita ithatû (3m) wariî. Arauga kîrûngîkwe mûgwanthî jwa Dura jûrîa jûrî kûu nthîgûrûûne Babiloni.

² Rîu mûnene Nebukadineza aroothûrania nchaama, na arûngamîîri, na atongeeria, na athani kîrîra, na eeki mîthithû, na agambi, na atongeeria bangî bonthe ba nthîgûrû, nîkenda beeta kwona gîtugî kîu arûngîkîte gîkîathûrwa.

³ Nchaama, na arûngamîîri, na atongeeria, na athani kîrîra, na eeki mîthithû, na agambi, na atongeeria bangî bonthe ba nthîgûrû baroothûrana nîkenda boona gîtugî kîrîa mûnene Nebukadineza arûngîkîte gîkîathûrwa. Bararûngama mbere ya gîtugî kîu.

⁴ Nawe mûtûmîîria arauga na kajû gakanene atîrî, “Buî antû ba mîgongo, na mîthemba yonthe na ba nthiomi cionthe,

⁵ Rîrîa bûkaigua kajû ka tarumbeta na wandîîndî, na mûtûrirû, na kînanda kîa ndigi, na kîa ndigi inyiingî, na ndwîmbo cia mîthemba yonthe, bwigwîthie nthîgûrû bûthaathayie gîtugî kîa thaabu kîrîa mûnene Nebukadineza arûngîkîte.

⁶ Muntû wonthe ûrîa ûkarega gûturia maru athathayia gîtugî kîu, o rîu akagwaatwa agerwe mwankiine jûmûnene.”

⁷ Tontû bûû, rîrîa antû bonthe baigîrue kajû ka tarumbeta, na wandîîndî, na mûtûrirû, na kînanda kîa ndigi, na kîa ndigi inyiingî, na ndwîmbo cia mîthemba yonthe, antû ba mîgongo yonthe, na ba mîthemba yonthe, na ba nthiomi cionthe baraturia maru barathathayia gîtugî kîa thaabu kîrîa mûnene Nebukadineza aarî akûrûngîka.

Acoore ba Danieli bathatû kwîrwa nî ndemi

⁸ Îgiiteene rîu nî kwaumîîre Ababiloni bamwe barambîrîria gwîkîra Ayahudi îgi.

⁹ Nî beerîre mûnene Nebukadineza atîrî, “Mûnene ûrotûûra kenya!

¹⁰ Gwe itû mûnene nî ûritîte Waatho atî antû bonthe baigua kajû ka tarumbeta, na mûtûrirû, na wandîîndî na gîempe na ngita na kînanda kîa ndigi, na ndwîmbo cia mîthemba îmingî, baturie maru bathaathayie gîtugî kîrîa kîa thaabu.

¹¹ Muntû ûrîa ûkaarega gûturia maru akîthaathayia akagerwa mwankiine jwa nkunîi.

¹² Kûrî na Ayahudi bamwe, nabo nî: Shadraka na Meshaki na Abedinego, barîa ûthuurîte bamenyagîîra nthîgûrû, batîgûkwathîkîra gwe mûnene. Bo batîtumîkagîra mîrungu yaaku kana bathathayia gîtugî kîa thaabu kîrîa ûrûngîkîte.”

¹³ Nebukadineza nî aathûûrîre mono, arauga Shadraka na Meshaki na Abedinego baikue kîrî we. Antû bau nabo baraikua kîrî mûnene.

¹⁴ Nebukadineza arabooria atîrî, “Nî mantû ja mma atî gwe Shadraka, na Meshaki, na Abedinego bûtîtumîkagîra mîrungu yaakwa kana bûthathayia gîtugî kîa thaabu kîrîa ndûngîkîte?

¹⁵ Nandî ithûranîreni rîrîa bûkaigua kajû ka tarumbeta, na ka mûtûrirû, na ka wandîîndî, na gîempe na ngita na kînanda kîa ndigi, bûturie maru bûthathayie mûng'uanano jûrîa nthithîtie bwega jwaathongoma mono. Îndî bûkëeja kûrega kûthathayia, o ntûti bûkaagerwa mwankiine jwa nkunîi. A-rî, nî mûrungu jûrîkû jûkabwonokia kuuma njareene ciaakwa?”

¹⁶ Shadraka, na Meshaki, na Abedinego baracokeria mûnene atîrî, “Tuî rî, Nebukadineza, tûtîkwenda gûkwîra noo atîa ûntûûne bûbû.

¹⁷ Këethîrwa nîu gûgakara ûu, Mûrungu weetû ûrîa tûtumîkagîra agaatwonokia mwankiine jwa nkunîi na kuuma njareene ciaaku gwe mûnene.

¹⁸ Îndî kinya akarega gûtwonokia, nî kaaba ûmenye gwe mûnene atî, tuî tûtîtumîkîra mîrungu yaaku kana tûthaathayia gîtugî kîa thaabu kîrîa ûrûngîkîte.”

Danieli na acoore baawe bo-bathatû kûgiitîrwa kûûragwa

¹⁹ Nebukadineza nî aathûûrîre mono, na ûthiû bwaawe bûragarûka nî mûthûûro nîûntû bwa Shadraka na Meshaki na Abedinego. Tontû bûû, arauga mwanki jwa nkunîi jwongeerwe mainda mûgwanja nkûrûki ya ûrîa jwîthagîrwa jûkari.

²⁰ Areera nchamba imwe cia njûûrî yaawe itheeke Shadraka na Meshaki na Abedinego îbagere mwankiine jûu.

²¹ Antû bau baraoogwa beekîrîte nguû ciaao, na ndwambambio, na nkobia ciaao, na nguû ciaao ingî, baragerwa mwankiine jwa nkunîi.

²² Îndî nîûntû waatho bwa mûnene bûtaarî na mûceetho na mwanki naju jwaarî jûmûnene mono, ndûmûrî cia mwanki nî ciaîthîrie antû barîa bageraga Shadraka na Meshaki na Abedinego mwankiine.

²³ Nabo antû bau bo-bathatû, Shadraka na Meshaki na Abedinego baragwa mwankiine baogi.

²⁴ Mûnene Nebukadineza arigari mono nî ookîrîîre ntûti arooria barîa bamwathaga kîrîra atîrî, “Anga tî antû bathatû tûgerere mwankiine?” Nabo baaramûcokeria, “Îî nîu tûthithîrie mûnene.”

²⁵ Mûnene arabeera atîrî, “Nî nkwona antû bana bagîîtaîtaga mwankiine gatîgatî. Nabo batîkûya. Muntû wa bana akari ta mûtaana wa mîrungu.”

Antû barîa bathatû kûrekeerua na kûewa gîtîîo

²⁶ Rîu Nebukadineza areetaîta akuî na mûromo jwa nkunîi îîu na arauga atîrî, “Shadraka na Meshaki na Abedinego, buî nthûûmba cia Mûrungu Ûrîa Ûrî Îgûrû buru, umeni bwîje aja!” Shadraka na Meshaki na Abedinego barauma mwankiine.

²⁷ Nacio nchaama, na arûngamîîri, na atongeeria, na aathi mûnene kîrîra, baroothûrana baroona atî mwanki jûtaarî jûkûîîthia mîîrî ya antû bau. Ningî mîtuundu ya mîtwe yaao îtaarî îkûya, na nguû ciaao itaarî ikûya na bataanunkaga toogi.

²⁸ Nebukadineza arauga, “Mûrungu wa Shadraka na Meshaki na Abedinego arokumua, we ûtûmîte mûraîka oonokia nthûûmba ciaawe irîa imwîtîkîtie ciaregana na waatho bwa mûnene ciainenkanîra mîîrî ciîthua antû a gûtumîkîra na kûthaathayia mûrungu jûngî jûtî Mûrungu waao.

²⁹ Tontû bûû, ndîkûrita Waatho atî kîrî antû ba mîgongo yonthe, na nthiomi cionthe, muntû ûrîa ûkaaria bûbûthûûku mantûûne jegiî Mûrungu wa Shadraka na Meshaki na Abedinego bagaatûranua magûrû, na nyomba ciaao ciîthue; nîûntû gûtî mûrungu jûngî jûûmba kwonokia ûjû.”

³⁰ Rîu mûnene araneneia Shadraka na Meshaki na Abedinego nthîgûrûûne ya Babiloni.