Danieli 12 - NTETO INJEGA CIA MURUNGU KIRI ANTU BONTHE

Îgiita rîa mûthia

¹ Mûraîka ûu areeta na mbere arambîîra, “Kagiita kau mûraîka ûrîa mûnene Mikaeli, ûrîa ûkaragia antû beenu akaumîra. Rîu gûkagîa îgiita rîa thîîna înene mono kuuma nthîgûrû îkûûmbwa. Îgiita rîu rîakinya antû beenu bonthe barîa baandîki yukuune rîa Mûrungu bakoonokua.

² Bonthe barîa bakuîte bagookîîra, bamwe beete ûtûûroone bwa kenya na kenya, na bangî beete kûrîa bageekîrithua nthao kenya na kenya.

³ Nabo barîa boome bakathaara ta weerû bwa îgûrû, nabo barîa baritanîte antû kûthithia mantû jamaagîru bakathaara ta njota cia îgûrû kenya na kenya.

⁴ “Îndî gwe Danieli kunîka nteto iji, wikûjîre yukuune mwanka îgiita rîa mûthia. Antû babaingî nabo bageetaga gûkû na kûrîa bagîcwaa kûmenya ûrîa gûgakara.”

⁵ Rîu ûûni Danieli ndîraraithîîria ndîroona antû baîrî barûngami rûteere rwa mûuro, ûmwe rûteere rûrû, na ûngî rûteere rûngî.

⁶ Naani ndîrooria mûraîka ûrîa warûngami mûuroone rûgûrû atîrî, “Mantû jaja ja kûrigaria jagaakinya mûthia rî?”

⁷ Mûraîka ûu arookîîria njara cio-ijîîrî bwa îgûrû, araciîtia riîtweene rîa Mûrungu ûrîa ûtûûraga o kenya, atî mantû jau nî ja kagiita ka mîaka îthatû na nusu. Rîrîa antû ba Mûrungu bagatiga gûkanûkua mantû jau jonthe jakeethîrwa jagûkarîka.

⁸ Nî ndaigîrue ûu augîre, îndî ntaamenyere mantû jau. Ndîramûûria atîrî, “Itû mwathi waakwa, nîatîa mantû jau jagakinya mûthia?”

⁹ Nawe aracokeria atîrî, “Danieli, îta nîûntû nteto iji nî ciingi na yuku rîakunîkwa mwanka îgiita rîa mûthia.

¹⁰ Antû babaingî bakatherua. Barîa baaî nabo batîmenya mantû, îndî bo bageeta na mbere kûthithia ûthûûku. No barîa boome akî bakamenya mantû.

¹¹ Kuuma rîrîa igongwana bia ntukû bigatiga kûritwa, naku nî kuuma rîrîa mûrungu jwa mûng'uanano jûkarûngîkwa kîûrûûne, ntukû ngiri, na magana jaîrî ja mîrongo kenda (1,290).

¹² Kîtharimo nî kîrî muntû ûrîa ûgakara eetîkîtie mwanka ntukû ngiri na magana jathatû, ja mîrongo îthatû, ja mîrongo îthatû na ithaano (1,335) ithire.

¹³ Îndî gwe îta ûtuîke mwîtîkua mwanka mûthia. Gwe ûgaakua, îndî mûthiroone ûkariûka kûjûkia îtuui rîaaku.”