Danieli 10 - NTETO INJEGA CIA MURUNGU KIRI ANTU BONTHE

Danieli kwona kîoneki arî rûtere rwa mûuro jwa Tigirisi

¹ Mwakeene jwa îthatû jwa waathani bwa Koreshi mûnene wa Parasia, Danieli ûrîa weetagwa Beliteshaza nî aaguûrîîrue rûteto. Naru rûteto rûu rwarî rwa mma, îndî rwarî na inya mono kûmenyeka. We nî aarûmenyere ûrîa rûkuuga na njîra ya kîoneki.

² Îgiita rîu ûûni Danieli nî ndaaithikîrîte biumia bithatû.

³ Gûtî biakûrîa ndaarîjaga bibiega kana nyama kana nyua ndibei, kana ncanûra mûtuundu, mwanka biumia bithatû birathira.

⁴ Ntukû ya mîrongo îîrî na inya ya mweri jwa mbere jwa mwaka jûu, nî ndaarûngami rûteere rwa mûuro jûrîa mûnene jwa Tigirisi.

⁵ Ndîraciûkia meetho ndîroona mûraîka wakari ta muntû weekîrîte nguû ciaatumi na ndigi cia bamba, na aciogeete kauna na mûcibi jwa thaabu ya kuuma Ufazi.

⁶ Mwîrî jwaawe jwakengakengaga ta tuiga twa goro, na ûthiû bwaawe bwenagia ta rweni, na meetho jaawe jaathaaraga ta riûa, na njara ciaawe na magûrû jaawe biathongi ta îturutia rîteendereetue buru, nako kajû kaawe gaakari ta kajû ka antû babaingî.

⁷ Naani ûûni Danieli ninka nî ni ndoonere kîoneki kîu. Antû barîa twaarî nabo gûtîbio boonere, îndî nî baamakîre baraambîrîria gûteetema na baramatûka gûciitha.

⁸ Tontû bûû, ndîratigwa ninka ndîroona kîoneki kîu gîa kûrigaria. Naani ndîrathirîrwa nî inya, na ûthiû bwaakwa bûragarûka mono, ûntû muntû atîngîûmba kûûmenya.

⁹ Ndîkwigua kajû kaawe, ndîragwa nthîgûrû na ûthiû ndîragirîka.

¹⁰ Rîu njara îrangwata îrambûkîîria. Njara ciaakwa na maru nîka biateetemaga.

¹¹ Mûraîka ûu arambîîra atîrî, “Gwe Danieli, ûrî muntû ûmwende mono rûngama ûthikîîre nteto irîa ngûkwarîria, nîûntû nîka ntûmi kîrî gwe.” Nawe rîrîa aambaragîria nteto iu cionthe, ndaarûngami nkiinainaga.

¹² Areeta na mbere kûmbîîra atîrî, “Danieli menya ûkîra, nîûntû kuuma ntukû ya mbere îrîa wainyiîrie ûkîendaga kûmenya mantû Mûrungu nî aaigîrue maromba jaaku. Naani mbîjîte nîûntû bwa maromba jau.

¹³ Mûraîka ûrîa wa ûnene bwa Parasia nî aangitarîrie ntukû mîrongo îîrî na îmwe. Nîrîo Mikaeli ûrîa ûmwe wa araîka barîa anene eejîre gûnteethia. Tontû bûû, nkûmûtiga na mûnene wa Parasia.

¹⁴ Naani ndeeja gûkwonia ûrîa antû beenu bagaakara matukûûne ja mûthia. Kîoneki gîkî kîegiî matukû jarîa jakeeja.”

¹⁵ Aathiria kuuga mantû jau nî ndeenîkîre meetho nthîgûrû ndîraaga ûntû bwa kuuga.

¹⁶ Mûraîka ûu wakari ta muntû nawe rî, arantongithia mîromo. Naani ndaambîrîria kwaria, ndîramwîra atîrî, “Itû mwathi waakwa, kîoneki gîkî kîmbîkîrîte ûrûrû mono, ntî na inya.

¹⁷ Nîatîa ûûni nthûûmba ya mwathi waakwa, mpûûmbîkia kwarîria mwathi waakwa? Ûûni gûtî inya ntigi nayo na ntîgwikia mîrukî bwega.”

¹⁸ O kaîrî mûraîka ûu wakari ta muntû arantongithia ndîragwata inya.

¹⁹ Arambîîra atîrî, “Gwe muntû ûrî ûmwende mono, tiga gûkîra. Gîa na thîîrî. Gîa inya na ûûmîîrie.” Nawe rîrîa aambarîîrie nî ndaagwatîre inya ndîramûcokeria atîrî, “MWATHANI Mweneinya waakwa nî ambarîrie nîûntû ndîkûgwata inya.”

²⁰ Rîu arambûûria atîrî, “Nî ûkûmenya nîkî ûntû ndeeja kîrî gwe? Ûûni ngaacoka ndwee na mûraîka wa Parasia na ndaathiranîria nawe, rîu mûraîka wa Agriiki akeeja.

²¹ Îndî ngakwîra mantû jarîa jaandîki yukuune rîa mma. Gûtî ûngî ûkûrwaa arî rûteere rwaakwa tiga Mikaeli mûraîka wa Israeli.”