2Sam 5 - NTETO INJEGA CIA MURUNGU KIRI ANTU BONTHE

Daudi kwaa mûnene wa Israeli na nthîgûrû ya Juda

¹ Rîu antû ba mîîrîga ya Israeli bareeta Heburoni kîrî Daudi baramwîra atîrî, “Tuî tûrî maîndîîndî na tharike îmwe naagwe.

² Mbereene, kinya rîrîa Saûlû aatwathaga nîgwe watongeragia njûûrî cia Israeli ndweene na MWATHANI arakwîra agakweethia mûrîîthi wa antû baawe Israeli, na wee mûtongeeria waao.”

³ Tontû bûû, akûrû ba Israeli bonthe bareeja Heburoni kîrî Daudi, nawe mûnene Daudi arabaciîtîria areeka kîrîkanîro nabo mbere ya MWATHANI. Nabo baramwîtûûrîria maguta araa mûnene wa Israeli.

⁴ Daudi aambîrîîrie kwaathana aarî na ûkûrû bwa mîaka mîrongo îthatû (30), na aathanîre antû a mîaka mîrongo îna (40).

⁵ Aathîre Juda antû a mîaka mûgwanja na mîeri îtaantatû arî Heburoni na araatha Juda na Israeli antû a mîaka mîrongo îthatû na îthatû (33) arî Jerusalemu.

Daudi kûjûkia Jerusalemu

⁶ Rîu kagiita karakinya rîrîa Daudi na asikarî baawe beetîre kwithûkîra Jerusalemu. Antû barîa batwîîre ku Ajebu bathûgaanagia Daudi atîûmba kûûra ntûûra îîu amîtaa bakiugaga, “Atîûmba gûkûrûka ndeene tontû akeeja kinya antû barîa batîonaga na ithua batîmûreka akûrûka.”

⁷ Amwe na kuuga ûu Daudi arataa gitiiro gûntû kûrîa kwairigîîri mono Zaiûni kîracoka gwîtwa “Ntûûra ya Daudi.”

⁸ Daudi ntukû îîu arauga, “Kûrî muntû ûthwîre Ajebu nkûrûki yaakwa? Nîu nî etîîre mûtaroone jwa rûûjî atonye ntûûreene nîkenda oorage ithua na atumuumu.” Nîkîo tontû kuugagwa atî, “Ithua na atumuumu batîkûrûka nyomba ya Mûrungu.”

⁹ Daudi agûtaa gitiiro kîîu, aratûûra ku arakîa riîtwa “Ntûûra ya Daudi.” Araaka rûthingo rûrathiûrûka kwambîrîîria Milo gûcoka bwa ndeene.

¹⁰ Daudi areeta na mbere akîgîtaga inya, tontû MWATHANI Mûrungu Mweneinya nî aarî amwe nawe.

¹¹ Hiramu mûnene wa Tiro nî aatûmanîre kîrî Daudi, na aramûtûmîra mîtî ya mîtarakwa na atea ba mbaaû, na atea ba maiga, nabo baraakîra Daudi nyomba.

¹² Rîu Daudi aramenya atî MWATHANI akûmûrikia ja mûnene wa Israeli, na atî aakûûjûria waathani bwaawe ûkumio nîûntû bwa antû baawe Israeli.

¹³ Daudi nî eetîre na mbere kûjûkia aka ba gwîka na eekûrû bangî ba kuuma Jerusalemu, nyuma ya kuuma Heburoni, nabo baramûciarîra ataana na aarî bangî.

¹⁴ Aana barîa Daudi aagîîre nabo arî Jerusalemu baarî baba: Shamua, na Shobabu, na Nathani, na Solomoni, na

¹⁵ Ibihari, na Elishua, na Nefegi, na Jafia, na

¹⁶ Elishama, na Eliada na Elifeleti.

Daudi Kûûmbana kîrî Afilisti

¹⁷ Rîrîa Afilisti baigîrue atî Daudi aagwîtûûrîrua maguta aa mûnene wa Israeli, Afilisti nî baumagarîre bonthe bareeta kûmûcwaa. Daudi nawe akwigua mantû jau, areenama giiciithoone.

¹⁸ Afilisti bakwîîja nî baataambîre baroojûra mûuro junthe jwa Refaimu.

¹⁹ Daudi arooria MWATHANI atîrî, “Mbîte nkarwee na Afilisti? Ûkaabanenkanîra njareene ciaakwa?” MWATHANI aramûcokeria, “Îî îta, naani nî mma nkaanenkanîra Afilisti njareene ciaaku!”

²⁰ Tontû bûû, Daudi areeta Baali-perazimu, na aroombîra Afilisti o. Arauga atîrî, “MWATHANI nî aakondoretie anthû baakwa ta îkondoria rîa mûguû.” Tontû bûû, Daudi areeta antû au Baali-perazimu

²¹ Afilisti bakûmatûka baratiga mîrungu yaao ya mîng'uanano. Daudi na asikarî baawe baramîjûkia bareeta nayo.

²² O kaîrî Afilisti bareeta baranyagana kîguuruune kîa Refaimu.

²³ Daudi o kaîrî arooria MWATHANI kîrîra. MWATHANI aramûcokeria atîrî, “Ûgéeta gûtirimana ndweene nabo, îndî bathiûrûke ûbaume bwa nyuma rûteere rûrîa rwerekeene na mîtî ya balisamu.

²⁴ Rîrîa ûkaigua gîtuma kîa makinya kîîjîrîte îgûrû rîa mîtî îîu, rîu umbuthûke, tontû MWATHANI akeethîrwa arî mbere yaaku, kûûra mbûûtû ya Afilisti.”

²⁵ Daudi arathithia o ta ûrîa MWATHANI aamwathîte, araûûra Afilisti kuuma Geba mwanka Gezeri.