2Sam 24 - NTETO INJEGA CIA MURUNGU KIRI ANTU BONTHE

Daudi kuuga antû batarwe

¹ MWATHANI araakanwa nî mûthûûro o kaîrî nîûntû bwa Israeli. Aratûma Daudi nîkenda abacwîra thîîna. Aramwîra, “Îta ûtarithie antû ba Israeli na Juda.”

² Tontû bûû, Daudi areera Joabu mûtongeeria wa njûûrî atîrî, “Îteeni amwe na atongeeria bangî ba njûûrî kîrî mîîrîga ya Israeli kuuma Dani mwanka Beerisheba, bûtare antû bûmenye nî bang'ana.”

³ Îndî Joabu areera mûnene, “MWATHANI Mûrungu waaku arongeera antû mainda îgana nkûrûki ya barîa barî o nandî, ûrî mwoyo ûkaboona. Nîkî tontû ûkwenda ûntû bûû bûthithua?”

⁴ Daudi arakinyîîria Joabu na atongeeria bau ba njûûrî mwanka baraathîkîra. Tontû bûû, barauma kîrî mûnene bareeta gûtara antû ba Israeli.

⁵ Barauna mûuro jwa Jorodani barambîrîria gûtara kwambia na ntûûra ya Aroeri, na ntûûra irîa irî gatîgatî ka Kîguuru muntû eetîte bwa Gadi, na ntûûra ya Jazeri.

⁶ Rîu baracoka baratarana ntûûreene ya Gileadi na Kadeshi irîa irî nthîgûrû ya Hiti. Baracoka baratarana Dani kuuma au bareeta bwa rûgûrû mwanka Sidoni.

⁷ Bareeta baratarana ntûûreene yaakîri rûthingo rwa gûkaria ya Tiro, na ntûûreene cionthe cia Ahivi na Akanaani na nyumeene Beerisheba îrîa îrî rûteere rwa ûmotho bwa Juda.

⁸ Tontû bûû, bagwîta barakurukania ntûûra cionthe cia nthîgûrû bareeta Jerusalemu nyuma ya mîeri kenda na ntukû mîrongo îîrî.

⁹ Joabu areera mûnene ûrîa antû bang'ana. Ndene ya Israeli nî kwaarî na arûme ngiri magana janaana (800,000) na ndeene ya Juda arûme ngiri magana jataano (500,000) barîa barîngîûmba kûrwaa ndweene.

¹⁰ Nyuma ya antû gûtarwa, Daudi araigua bûbûûî nkoroone, areera MWATHANI, “Nî mbîîtie mono kûthithia ûntû bûu! Itû MWATHANI ndakûromba ûrekeere nthûûmba yaaku tontû nî nthithîtie ûntû bwa waa.”

¹¹ Kûrî gûkea rûûnene Daudi agîûkîîra, MWATHANI areethîrwa arîkwîra Gadi ûrîa kîroria kîa Daudi atîrî,

¹² “Îta wîîre Daudi, ‘MWATHANI ariuga, thuura ûntû bûmwe kîrî jaja jathatû nîkenda nkûthithîria bu.’”

¹³ Tontû bûû, Gadi areeta kîrî Daudi, aramwîra, “Thuura bûmwe; mpara înene nthîgûrûûne yaaku antû a mîaka îthatû, kana kûmatûka anthû baaku beenganîte naagwe antû a mîeri îthatû, kana kûgîe mîrimo ya mîthemba îmîthûûku ntukû ithatû. Mpa îcokio rîa kwîra ûrîa ûntûmîte.”

¹⁴ Daudi aracokeria Gadi atîrî, “Ndî thîîneene înene mono. Îndî nî kaaba tûgakanûkua nî MWATHANI tontû arî kîaao, antû a antû bankanûkia.”

¹⁵ Tontû bûû, MWATHANI aratûma mîrimo îmîthûûku ya mîthemba îmingî ndeene ya Israeli. Mîrimo îîu îrakara o kuuma rûkîîrî mwanka îgiita rîrîa rîeranîri. Antû barakua ngiri mîrongo mûgwanja (70,000) kuuma Dani mwanka Beerisheba.

¹⁶ Mûraîka wa MWATHANI aagûtambûrûkia njara akanûkia Jerusalemu, MWATHANI nî aagarûrîre mathûgaanio jaawe ja kûbathiria areera mûraîka atîrî, “Tigana nabo, îkanûkia rîkûng'ana!” Mûraîka aarî agûkinya îtîîriine rîa muntû weetagwa Arauna wa kuuma Jebusi.

¹⁷ Rîrîa Daudi oonere mûraîka ûu wooragaga antû, nî eerîre MWATHANI atîrî, “Nî ni mbîîtie ndathithia mantû jamathûûku, îndî antû barîa ntongeeretie nîatîa bo bathithîtie? Ndakûromba ûnthangîkie ninka amwe na antû ba mûciî jwa baaba.”

¹⁸ O ntukû îîu kîroria Gadi areeja kîrî Daudi aramwîra, “Itia wîîte waake kîritîro kîa igongwana kîa kûritîra MWATHANI kîgongwana îtîîriine rîa Arauna.”

¹⁹ Nîu Daudi arathithia ûu Gadi amwîrîte o ta ûrîa MWATHANI aathanîte.

²⁰ Arauna arîkwona mûnene na nthûûmba ciaawe baîtîîtie kîrî we, areeta kûbathagana. Araigwîthia ûthiû bûtirîte nthî kwonania ûrîa eekîrîte mûnene,

²¹ Arauna arooria mûnene atîrî, “Mwathi waakwa mûnene, nîmbi yatûma wîîja?” Daudi aramûcokeria, “Kûgûra îtîîri rîaaku mbaka kîritîro kîa igongwana nthaathayia MWATHANI kenda nchai îtiga kûthîînia antû.”

²² Arauna areera Daudi, “Rîjûkie mwathi waakwa, na ûrite kîewa kîa gwakîîria o kîrîa ûkwenda. Ndegwa, mîûûro na icoki birîa bithekaga ndeegwa, bitumîre birî nkû.”

²³ Arauna aranenkera mûnene biu bionthe na aramwîra, “MWATHANI Mûrungu waaku aroetîkîra kîrîa ûkamûritîra.”

²⁴ Îndî mûnene areera Arauna, “Arî ka ngakûgûrîra, ntîûmba kûritîra MWATHANI Mûrungu waakwa kîewa kîa gwakîîrua ntîritîte no mbi.” Tontû bûû, Daudi aragûra îtîîri amwe na ndeegwa ûgûri bwa shekeli cia fetha mîrongo îtaano.

²⁵ Daudi araaka kîritîro kîa igongwana au araritîra MWATHANI igongwana bia gwakîîria na bia gûcwaa thîîrî. Rîu MWATHANI araigua maromba nîûntû bwa nthîgûrû ya Israeli, na nchai irathira.