2Ane 21 - NTETO INJEGA CIA MURUNGU KIRI ANTU BONTHE

Manase mûnene wa Juda

¹ Manase aarî na ûkûrû bwa mîaka îkûmi na îîrî rîrîa aaere mûnene wa Juda. Nawe aathanîre mîaka mîrongo îtaano na îtaano arî Jerusalemu. Ng'ina eetagwa Hefuziba.

² Nî aathithîrie mantû jamathûûku mbere ya MWATHANI o ta jarîa mîgongo îrîa MWATHANI eengîîre Israeli yathithagia.

³ Nî aakîre gûntû kûrîa mîrungu ya mîng'uanano yaathaathagîrua kûrîa îthe Hezekia aathûûkangîtie. Ningî nî aakîîre mûrungu jwa Baali iritîro bia igongwana na arathithia mûrungu jwa mûng'uanano jwa Ashera o ta ûrîa Ahabu mûnene wa Israeli aathithîtie. Ningî we nî aathaathayia njota cionthe cia îgûrû.

⁴ Aracoka araaka iritîro bia igongwana bia kûthaathagîria mîrungu ya mûng'uanano kîûrûûne. MWATHANI nî aaugîîte atî nî Jerusalemu agaatua kûthaathagîrua.

⁵ Îndî Manase nî aakîre iritîro bia igongwana bia kûthaathagîria njota cionthe. Aabiakîre biaragoone bio-biîrî bia kîûrû.

⁶ Ningî nî aaritîre mûtaana waawe arî kîgongwana gîa gwakîîria. Manase nî eetaga kûringîrua na kwonerwa mantû nî aringia na antû barîa baranagîria na roho cia antû barîa baakuîre. Nî aathithîrie mantû jamathûûku mbere ya MWATHANI, aratûma MWATHANI athûûra.

⁷ Aracoka areeka Mûrungu jwa mûng'uanano jûrîa jweetagwa Ashera kîûrûûne. Aajwîkîre o arîa MWATHANI eerîte Daudi na Solomoni atîrî: Aja Jerusalemu, kîûrûûne gîkî nîku nthuurîte kuuma kîrî nthîgûrû yonthe ya antû ba Israeli nîkenda nthaathagîrua ku kenya na kenya.

⁸ Këethîra antû ba Israeli bakambathîkîra na bathingate maathana jaakwa jonthe jarîa ndanenkeere nthûûmba yaakwa Musa, rîu ntîreka bathaamua bauma nthîgûrûûne îrîa ndaanenkerete biûjûjû biaao.

⁹ Îndî antû ba Juda bararega kwigua. Mûnene Manase arabatongeeria kûthithia moothûûku jamanene nkûrûki ya moothûûku jarîa jaathithagua nî mîgongo îrîa MWATHANI eengîîre antû ba Israeli.

¹⁰ “Nthûûmba cia MWATHANI iroria nî ciaarîrie mantû jarîa MWATHANI aaciîrîte irauga atîrî:

¹¹ Manase, mûnene wa Juda nî aathithîtie mantû jaja jamathûûku nkûrûki ya jarîa jonthe jaathithîtue nî Akanaani. Ningî nî aatûmîre antû ba Juda bathithia meeyia bathingatîte mîrungu yaawe ya mîng'uanano.

¹² Tontû bûû, MWATHANI Mûrungu wa Israeli ariuga atîrî: Nkareetera Jerusalemu na Juda ûthûûku bûbûnene bûrîa o muntû wonthe ûrîa ûkabwigua agakaandûka matû.

¹³ Ngaakanûkia ntûûra ya Jerusalemu o ta ûrîa ndaakanûkîrie antû ba Jerusalemu, mbegere bathire buru.

¹⁴ Nkeerûkîra antû baakwa, barîa bagaatigara na mbanenkanîre kîrî anthû baao, barîa bakabaithûkîra na batae nthîgûrû yaao.

¹⁵ Nkaathithîria antû baakwa ûu nîûntû nî bathithîtie mantû jamathûûku mbere yaakwa na banthûûria, kuuma rîrîa biûjûjû biaao biaaumîre Misri mwanka naarua tûrî.”

¹⁶ Nkûrûki ya jau, Manase nî ooragîre antû babaingî mono bataarî na maatia, mwanka aroojûria tûjîra twa Jerusalemu tharike. Amwe na bûu, nî aatongeererie Juda meeyiene ja kûthaathayia mîrungu ya mîng'uanano.

¹⁷ Najo mantû jangî jonthe jarîa mûnene Manase aathithîrie, na kinya meeyia jarîa aathithîtie jaandîki yukuune rîa ngono cia anene ba Juda.

¹⁸ Manase nawe nî aakuîre na arathikwa kamuundeene geetagwa Uza, karîa kaarî gîkaroone kîa mûnene. Amoni mûtaana waawe araa mûnene

Amoni mûnene wa Juda

¹⁹ Amoni aaere mûnene wa Juda arî na ûkûrû bwa mîaka mîrongo îîrî na îîrî. Aathanîre mîaka îîrî arî ntûûreene ya Jerusalemu. Ng'ina eetagwa Meshulemethi, mwarî wa Haruzi kuuma ntûûreene ya Jotiba.

²⁰ Nî aathithîrie mantû jamathûûku mbere ya MWATHANI o ta jarîa îthe Manase aathithîtie.

²¹ Nî aathithagia mantû jonthe jarîa îthe aathithagia. Ningî nî aathaathayia mîrungu ya mîng'uanano îrîa îthe aathaathayia.

²² Nî aareganîre na MWATHANI, Mûrungu wa biûjûjû biaawe na ararega kwathîkîra maathana ja MWATHANI.

²³ Nabo atongeeria baawe ba njûûrî nî baamûkunyanîîre na baramûûragîra gîkaroone kîa mûnene.

²⁴ Îndî antû ba Juda nî booragîre barîa bonthe baakunyanîrîte mûnene Amoni. Ningî baraeethia Josia mûtaana waawe mûnene wa Juda.

²⁵ Najo mantû jangî jarîa Amoni aathithîrie nî jaandîki yukuune rîa ngono cia anene ba Juda.

²⁶ Nî aathikîrwe mbîrîreene yaawe kamuundeene karîa geetagwa Uza, na Josia mûtaana waawe araa mûnene