1Sam 4 - NTETO INJEGA CIA MURUNGU KIRI ANTU BONTHE

Afilisti gûtaa Îthandûkû rîa kîrîkanîro Kîa MWATHANI

¹ Îgiita rîu Afilisti nî baaibangîre beeta kwithûkîra Aisraeli. Tontû bûû kinya Aisraeli baraibanga bareeta kûrwaa nabo. Aisraeli nî baambîre kambî yaao Ebenezeri na Afilisti baraamba kambî yaao Afeki.

² Afilisti nî beekîre mbûûtû yaao îtumîte rwari nîkenda îrwaa na Aisraeli. Rîrîa ndwaa yamatîre, Aisraeli nî boombîrwe na arûme ta ngiri inya (4,000) barooragîrwa ndweene.

³ Rîrîa barîa batigarîre bacokere kambîîne, akûrû ba Israeli nî baugîre atîrî, “Nîmbi îtûmîre MWATHANI arekeeria Afilisti batûciinda naarua? Gatûgîîre Îthandûkû rîa kîrîkanîro kîa MWATHANI kuuma Shilo tûreete aja nîkenda eeja gatîgatî geetû na atwonokia kuuma kîrî anthû beetû.”

⁴ Rîu antû baratûmwa Shilo kûgîîra Îthandûkû rîa kîrîkanîro kîa MWATHANI Mweneinya, ûrîa ûthûngûrîtue îgûrû rîa akerubimu. Ataana ba Eli bobaîrî, Hofini na Fineasi nî beetanîrie na Îthandûkû rîa kîrîkanîro kîa Mûrungu.

⁵ Rîrîa Îthandûkû rîa kîrîkanîro kîa MWATHANI rîaikîrue kambîîne, Aisraeli bonthe nî baaringîre gîtuma gîkînene mwanka nthî îrateetema.

⁶ Nabo Afilisti bakwigua gîtuma barooria, “Gîtuma kîu gîkînene kîaringwa kambîîne ya Ahibirania nî kîa mbi?” Rîrîa bamenyere atî Îthandûkû rîa MWATHANI rîkûretwa kambîîne,

⁷ Afilisti baraigua ûguaa mono. Rîu barauga, “Kûrî mûrungu jweeja kambîîne. Wûi nanû kîrî tuî tontû ûntû ta bûbû bûtooneka kaîrî!

⁸ Wûi nanû kîrî tuî! Nûû ûûmbîkia gûtûtunyûkia kuuma njareene cia mîrungu îrî na inya ûjû? Îîjî nîyo mîrungu îrîa yathirîrie Amisri na ikanûkia bia mîrimo bûûrîîne.

⁹ Gîeni ûchamba, na bûciande ta arûme, îbuî Afilisti, bûtîkeeje kwaa nkombo cia Ahibirania ta ûrîa bararî nkombo cieenu. Bûciande ta arûme bûrwe nabo.”

¹⁰ Rîu Afilisti bararwaa, baracinda Aisraeli. Aisraeli baramatûka o muntû areeta nja yaawe; na ndwaa îîu îreethîrwa îrî înene mono, tontû asikarî ba Israeli barîa beetîte na magûrû nî booragîrwe ngiri mîrongo îthatû (30,000).

¹¹ Îthandûkû rîa kîrîkanîro nî rîataîrwe na ataana ba Eli bobaîrî, Hofini na Fineasi baroragwa.

Gûkua kwa Eli

¹² Muntû ûmwe wa mwîrîga jwa Benjamini aramatûka kuuma ndweene areeta Shilo o ntukû îîu. Aatambûrangîte nguû ciaawe na aciakîte tîîri kîongo kwonania nî aithîkîrîte.

¹³ Rîrîa akinyîre, Eli nî aakarîrîte gîtî kîaawe arî rûteere rwa njîra araithîrîtie nîûntû nî aamakagîra mono Îthandûkû rîa kîrîkanîro. Rîrîa muntû ûu aatonyere ntûûreene na areerana nteto, ntûûra yonthe îrambîrîria kûrîra.

¹⁴ Rîrîa Eli aigîrue kîrîro kîu, arooria, “Gîtuma kîu kîonthe nî kîa mbi?” Rîu muntû areetanga kîrî Eli na aramwîra ûrîa kwaarî.

¹⁵ Îgiita rîu Eli aarî na ûkûrû bwa mîaka mîrongo kenda na înaana na meetho jaawe nî jaûrîte na atonaga.

¹⁶ Muntû ûu areera Eli atîrî, “Ndauma ndweene îgiita rîrî; matûkîre kuuma ndweene naarua.” Eli aramûûria, “Gûkarîre atîa, mûtaana waakwa?”

¹⁷ Muntû ûu waareteete nteto aramûcokeria, “Aisraeli nî bamatûkîre Afilisti, na antû booragwa babaingî mono, kinya ataana baaku bobaîrî, Hofini na Fineasi nî booragîrwe na Îthandûkû rîa kîrîkanîro rîatawa.”

¹⁸ Rîrîa muntû ûu aagwetere Îthandûkû rîa kîrîkanîro, Eli nî aagwîre nthî na mûgongo kuuma gîtîîne kîaawe, au akarîrîte rûteere rwa mwîrîga araunîka nkingo nîûntû nî aarî ûmûkûrû na ûmûnoru mono. Nawe nî aarî agûtongeeria Aisraeli mîaka mîrongo îna (40).

Gûkua gwa ntigwa ya Fineasi

¹⁹ Mwekûrû wa Fineasi mûtaana wa Eli, nî aarî ûmûrito na aarî akuî kûewa kaana. Rîrîa aigîrue atî Îthandûkû rîa kîrîkanîro rîgûtawa, na atî îthe na mûkûrû waawe bagûkua, aragwatwa nî mûrimo jwa mwana araewa kaana.

²⁰ Eengeretie gûkua, eejûkia barîa bamûteethagîîria akîewa mwana baramwîra, “Ûgákîra, tontû ûgûciara kaîjî.” Îndî aataabacokeria kana abanoga.

²¹ Nî eetîre kaana kau riîtwa Ikabodi, narîo nî ta kuuga, “Ûkumio bûkûthaama kuuma Israeli!” Nîûntû Îthandûkû rîa kîrîkanîro nî rîaarî rîkûjûkua na îthe na mûkûrû waawe baakua.

²² Ningî arauga, “Ûkumio nî bûthaamîte kuuma Israeli, nîûntû Îthandûkû rîa kîrîkanîro nî rîtaîtûe.”