2Sam 4 - NTETO INJEGA CIA MURUNGU KIRI ANTU BONTHE CATHOLIC EDITION

Kûûragwa kwa Ishiboshethi

¹ Rîrîa Ishiboshethi, mûtaana wa Saûlû, aîgîrue Abuneri akûûragîrwa Heburoni, araigua ûguaa mono na antû ba Israeli yonthe baramaka.

² Îgiita rîu mûtaana ûu wa Saûlû nî aarî na atongeeria ba aithûki; ûmwe eetagwa Baanaha na ûngî Rekabu. Bo-baîrî baarî ataana ba Rimoni kuuma Beerothi, mwîrîga jwa Benjamini. (Beerothi yataragwa îrî ya mwîrîga jwa Benjamini).

³ Antû ba mbere ba ntûûra îîu baarî bakûmatûka beeta Gitaimu na batwîre ku mwanka naarua îîjî.

⁴ Jonathani, mûtaana wa Saûlû, nî aarî na mûtaana waawe eetagwa Mefiboshethi. Rîrîa nteto cia kûûragwa gwa Saûlû na Jonathani naarîa Jezereeli ciakinyîre, Mefiboshethi aarî na ûkûrû bwa mîaka îtaano, nawe mûgwati wa mwana ûu aramûjûkia nîkenda amatûka, îndî tontû bwa mpwîî mwana aragwa aroonja magûrû.

⁵ Nandî Rekabu na Baanaha bareeta nja ya Ishiboshethi, barakinya thaa thita bareethîra Ishiboshethi anogoki.

⁶ Mûka ûrîa waarî mwariine akîeraga nkano nî aarî akwigua toro athinka. Tontû bûû, Rekabu na Baanaha baratonya nyomba.

⁷ Baratonya nyomba ya kûmama, bareethîra Ishiboshethi arî toroone îndito, baramûûraga. Baramûgiita mûtwe bareeta naju ûtukû bûnthe bagitanîrîtie kîguuruune kîa Jorodani.

⁸ Baraikîria Daudi mûtwe jûu Heburoni baramwîra, “Jûjû nî mûtwe jwa Ishiboshethi, mûtaana wa Saûlû, mûnthû waaku ûrîa ûcwaga gûkûûraga. Naarua nîyo ntukû îrîa MWATHANI akûrîîria kîrî Saûlû na antû ba nja yaawe.”

⁹ Daudi aracokeria ataana ba Rimoni ûrîa wa kuuma Beerothi atîrî, “Ndîciîtia riîtweene rîa MWATHANI ûrîa ûtûûraga mwoyo, ûrîa ûmbonoketie moogwatiine jamaingî,

¹⁰ kinya muntû ûrîa weejîre Zikilagi arambîîra, ‘Saûlû agûkua,’ akîthûgaanagia nî mantû jameega akûmbîîra, ndaamûjûkîrie ndîramûûraga. Nîrîo îrîi ndaamweere nîûntû bwa kûmbîîra nteto iu!

¹¹ Nkathithia bûng'ana îndî nkûrûki kîrî antû babaaî barîa booragîte muntû ûmwagîru amami nyomba yaawe? Nkarîiya tharike yaawe kuuma kîrî buî, mbûthirie buume nthîgûrû.”

¹² Daudi araathana nthaka ciaawe ciûrage Rekabu na Baana; bagiitwe njara na magûrû. Barabacuuria akuî na karia ka Heburoni. Barajûkia mûtwe jwa Ishiboshethi barajûthika kaburiine ya Abuneri kûu Heburoni.