2Ane 22 - NTETO INJEGA CIA MURUNGU KIRI ANTU BONTHE CATHOLIC EDITION

Josia mûnene wa Juda

¹ Josia aarî na ûkûrû bwa mîaka înaana rîrîa aaere mûnene wa Juda. Aathanîre mîaka mîrongo îthatû na jûmwe arî Jerusalemu. Ng'ina eetagwa Jedida, mwarî wa Adaia kuuma ntûûreene ya Bozikathi.

² Nî aathithagia mantû jameega mbere ya MWATHANI. Nî aathithagia mantû o ta jarîa kîûjûjû kîaawe Daudi athithagia atatigana najo.

Kwonwa kwa yuku rîa Waatho

³ Mwakeene jwa îkûmi na înaana jwa waathani bwa mûnene Josia nîrîo aatûmîre Shafani mûtaana wa Azalia, Azaria mûtaana wa Meshulamu. Shefani aarî karani. Mûnene Josia aramîra atîrî,

⁴ “Îta kîrî Hilikia mûthînjîri-Mûrungu ûrîa mûnene ûmwîre nî amenye ûrîa mbeecha ing'ana irîa ciûthûranagua nî athînjîri-Mûrungu barîa bakaragia mwari jwa kîûrû kuuma kîrî antû.

⁵ Ûmwîre anenkanîre mbeecha iu kîrî barîa barûngamîrîte ngûgî ya gwaka kîûrû kûrîa kîthûkangi. Nabo batumîre mbeecha iu kûrîaa aaki.

⁶ Nabo nî: aaki na mbaaû, na aaki na maiga, na abundi bangî. Ningî bagûre nacio mîtî na maiga nîûntû bwa kûthithia kîûrû kûrîa kîthûkangi.”

⁷ Arûngamîîri bau ba mwako baarî eetîkua. Tontû bûû, gûtaarî na gîtûmi kîa kûbooria boonanie ûrîa mbeecha iu ciaatumagîrwa.

⁸ Hilikia mûthînjîri-Mûrungu ûrîa mûnene nî eerîre Shafani ûû waarî karani atîrî, “Ndîkwona yuku rîa Waatho kîûrûûne.” Hilikia aranenkera Shafani yuku rîu. Shafani ararîthoma.

⁹ Shafani, karani nî eetîre kîrî mûnene aramwîra atîrî, “Nthûûmba ciaaku ikûûthûrania mbeecha irîa iraarî kîûrûûne na cianenkanîra mbeecha iu kîrî antû barîa barûngamîrîte mwako.”

¹⁰ Ningî Shafani areera mûnene atîrî, “Hilikia mûthînjîri-Mûrungu, akûnenkera yuku.” Rîu Shafani arathomera mûnene rîo.

¹¹ Rîrîa mûnene aigîrue nteto irîa ciathomerwe kuuma yukuune rîa Waatho nî aatambûrangîre nguû ciaawe.

¹² Mûnene areeta Hilikia mûthînjîri-Mûrungu na Ahikamu mûtaana wa Shafani ûrîa waarî karani na Asaia ûrîa waatumîkagîra mûnene, arabeera atîrî,

¹³ “Îteeni bûkambûûrîrie mantû kîrî MWATHANI, na bûûrîrie antû ba Juda bonthe mantû jeegiî Yuku rîrî rîonora. Nîkwîthîrwa nî athûûri mono nî tuî nîûntû biûjûjû bieetû bitaathithîrie mantû jonthe jarîa jaandîki Yukuune rîrî.”

¹⁴ Tontû bûû, Hilikia mûthînjîri-Mûrungu, na Ahikamu, na Akibori, na Shafani, na Asaia nî beetîre kîrî Hulida, ûrîa waarî mûka-kîroria, na aarî mûka wa Shalumu mûtaana wa Tikiva. Tikiva aarî mûtaana wa Harihasi. Shalumu nîwe waarî mûmenyeeri wa nguû cia biatho kîûrûûne. Hulida aatûûraga Jerusalemu rûteereene rûrîa rwaarî rûgwakwa kaîrî. Nabo nî baamwîrîre mantû jarîa jaakarîkîte.

¹⁵ Hulida nî aabeerîre bacoke kîrî mûnene, bamwîre ûrîa MWATHANI Mûrungu wa Israeli aaugîîte.

¹⁶ “MWATHANI ariuga ûjû: ‘Atîrî, ngaakanûkia ntûûra ya Jerusalemu na antû baayo, o ta ûrîa kwaandîki Yukuune rîu mûnene athoma.

¹⁷ Nîkwîthîrwa nî bareganîte naani, na baaîîthîria mîrungu ya mîng’uanano ubaani, tontû bûu, nî banthûûrîîtie. Nî nthûûri nî Jerusalemu mono na mûthûûro jwaakwa jûtîthira.

¹⁸ Mûnene wa Juda nî arabûtûmîte bwîja kûmûûrîria mantû kuuma kîrî ni MWATHANI. Mwîreeni ûûni MWATHANI Mûrungu wa Israeli ndîmwîra ûjû: Gwe nî ûraigîrue mantû jarîa ûrathomeerwe Yukuune,

¹⁹ na nî ûrairirîre na wainyiiyia mbere yaakwa; watambûranga nguû ciaaku kwonania kwithikîîra na wankaîra ûkîrîraga, nîûntû bwa ûrîa ndîraugîîte nkaathiria ntûûra ya Jerusalemu na antû baayo. Nî ndîraugîîte atî nkaeethia ntûûra îîjî îgaanjo na mîeethie gûntû gûkûrume. Îndî nkwigua îromba rîaaku.

²⁰ Naani ntîrekeeria woona îkanûkia rîrîa ngakanûkia ntûûra ya Jerusalemu, nîûntû gwe ûkeethîrwa ûgûkua na wathikwa.” Nabo atûmwa baracoka kwîra mûnene nteto iu.